រាជធានីភ្នំពេញ ៖ លោកឈឹម សៅគី ទីប្រឹក្សាផ្ទាល់សម្តេចអគ្គមហាសេនាបតីតេជោហ៊ុន សែន អនុរដ្ឋលេខាធិការទីស្តីការគណៈរដ្ឋមន្ត្រី និងជាព្រឹទ្ធបុរសសមាគមសិស្ស-និស្សិត បញ្ញវន្ត ក្មេងវត្ត កាលពីរសៀលថ្ងៃទី២២ខែសីហា ឆ្នាំ២០១១ ដោយមានការចូលរួមដំណើរពីប្រធាន និងសមាជិកអចិន្ត្រៃយ៍សមាគម សិស្ស-និស្សិតបញ្ញវន្តក្មេងវត្ត បាននាំយកអំណោយរបស់សម្តេចអគ្គមហាសេនាបតីតេជោហ៊ុន សែន និងលោកជំទាវកិត្តិព្រឹទ្ធបណ្ឌិតទៅចែកជូនដល់សិស្ស-និស្សិតដែលស្នាក់នៅក្នុងវត្តលង្កា ព្រះកុសុមារាមចំនួន២៥០នាក់ ។
សម្ភារដែលនាំយកទៅចែកជូនរួមមាន អង្ករចំនួន៤តោន ថវិកាចំនួន២៦លាន៣សែន២ម៉ឺនរៀល ក្រមា២៥០ អាវដៃវែង២៥០ និងកង់៣៣គ្រឿង ក្នុងនោះនិស្សិតម្នាក់ៗទទួលបានអាវដៃវែងចំនួន១ ក្រមា១ និងថវិកា២ម៉ឺនរៀល។ដោយឡែក និស្សិតអត់មានកង់ជិះចំនួន៣៣នាក់ បានទទួលក្នុងម្នាក់ៗកង់១គ្រឿង ។ ជាពិសេសអង្ករចំនួន៤តោន និងថវិកា២លានរៀល ប្រគេនដល់សម្តេចមហាអរិយវង្សព្រះចៅអធិការវត្តលង្កាព្រះកុសុមារាម ។
នៅក្នុងឱកាសនោះ លោកឈឹម សៅគី បានពាំនាំនូវការផ្តាំផ្ញើសាកសួរសុខទុក្ខពីសំណាក់សម្តេចតេជោហ៊ុន សែន និងលោកជំទាវ ចំពោះប្អូនៗសិស្ស-និស្សិតដែលមកពីតាមបណ្តាខេត្តមកស្នាក់នៅរៀនសូត្រតាមវត្តអារាមទូទាំងប្រទេស ពិសេសវត្តលង្កា ដែលមានការខ្វះខាតជីវភាព ប៉ុន្តែនៅតែខិតខំរៀនសូត្រដោយពុំមានការរារែកឡើយ។ លោកឈឹម សៅគី បានបញ្ជាក់ថា ដើម្បីជួយរំលែកនូវការខ្វះខាតទាំងនេះ សម្តេចតេជោហ៊ុន សែន និងលោកជំទាវបានឱ្យសមាគមសិស្ស-និស្សិតបញ្ញវន្តក្មេងវត្តនាំយកអំណោយទាំងនេះមកឧបត្ថម្ភជូនប្អូនៗទាំងអស់ ។ ទោះបីជាអំណោយនេះបន្តិចបន្តួចក្តី តែក៏ជាការបង្ហាញឱ្យឃើញនូវការគិតគូររបស់សម្តេចតេជោនិងលោកជំទាវចំពោះប្អូនៗទាំងអស់ ព្រោះសម្តេចចាត់ទុកប្អូនៗទាំងអស់ជាទំពាំងស្នងឫស្សីរបស់ប្រទេសជាតិ ។
ក្រោយពីទទួលអំណោយពីគណៈអធិបតីរួចហើយ តំណាងសិស្ស-និស្សិតប្រចាំវត្តលង្កា បានឡើងថ្លែងអំណរគុណយ៉ាងជ្រាលជ្រៅចំពោះសម្តេចចតេជោហ៊ុន សែន និងលោកជំទាវហើយប្តេជ្ញាចិត្តថា បោះឆ្នោតឱ្យគណបក្សប្រជាជនកម្ពុជាគ្រប់អាណត្តិ គាំទ្របេក្ខភាព សម្តេចតេជោហ៊ុន សែន ជានាយករដ្ឋមន្ត្រីគ្រប់អាណត្តិ ពិសេសវៀរចាកការសេពគ្រឿងញៀន ល្បែងស៊ីសង និងអំពើអបាយមុខគ្រប់ប្រភេទ តាមការណែនាំរបស់លោកឈឹម សៅគី ដោយខិតខំកសាងខ្លួនឱ្យក្លាយជាប្រជាពលរដ្ឋល្អដើម្បីបម្រើប្រជាពលរដ្ឋនិងប្រទេសជាតិពេល អនាគត ៕
ចែករំលែកព័តមាននេះ