ខេត្តបាត់ដំបង ៖ ប្រតិភូសភាពាណិជ្ជកម្មថៃចំនួន២៣រូបនៅខេត្តតាមព្រំដែនជាមួយ កម្ពុជាដឹកនាំដោយលោកបណ្ឌិតសារ៉ូត សាគុណរ៉ាត់ នាយកផ្នែកសេដ្ឋកិច្ចអិនឌូឆាយណានៃសាកលវិទ្យាល័យបូរផានៅខេត្ត ឈុនបូរី បានជួបសំណេះសំណាលជាមួយតំណាងសភាពាណិជ្ជកម្មខេត្តបន្ទាយមានជ័យ នាព្រឹកថ្ងៃទី២២ សីហា និង
ខេត្តបាត់ដំបង ៖ ប្រតិភូសភាពាណិជ្ជកម្មថៃចំនួន២៣រូបនៅខេត្តតាមព្រំដែនជាមួយកម្ពុជាដឹកនាំដោយលោកបណ្ឌិតសារ៉ូត សាគុណរ៉ាត់ នាយកផ្នែកសេដ្ឋកិច្ចអិនឌូឆាយណានៃសាកលវិទ្យាល័យបូរផានៅខេត្តឈុនបូរី បានជួបសំណេះសំណាលជាមួយតំណាងសភាពាណិជ្ជកម្មខេត្តបន្ទាយមានជ័យនាព្រឹកថ្ងៃទី២២ សីហា និងវេលារសៀលជួបជាមួយតំណាងសភាពាណិជ្ជកម្មខេត្តបាត់ដំបង រួចបន្តទៅខេត្តសៀមរាបទៀត។
លោកបណ្ឌិតសារ៉ូត សាគុណរ៉ាត់ ថ្លែងថា កម្ពុជាពិតជាមានការរីកចម្រើនយ៉ាងឆាប់រហ័សគ្រប់ហេដ្ឋារចនាសម្ព័ន្ធទាំងអស់ ហើយពេលនេះវិស័យសេដ្ឋកិច្ចកំពុងចាប់ផ្តើមងើបឡើងវិញធ្វើឱ្យទីផ្សារអន្តរជាតិមានការចាប់អារម្មណ៍ខ្លាំងទៅលើស្បៀងដែលត្រូវនាំចេញពីប្រទេសកម្ពុជាទៅកាន់ពិភពលោក។ រូបលោកនិងប្រតិភូទាំងអស់សុំធ្វើការស្វែងយល់ពីក្រុមហ៊ុនបៃតងកម្ពុជាមានទីតាំងនៅក្រុងបាត់ដំបងដែលមានលោកឧកញ៉ាភួ ពុយ ប្រធានសភាពាណិជ្ជកម្មខេត្តបាត់ដំបង និងជានាយកក្រុមហ៊ុនបៃតងកម្ពុជា អំពីការបង្កើតសហគមន៍កសិករ និងសកម្មភាពដំណើរការផលិតស្បៀងសម្រាប់នាំចេញ។
លោកឧកញ៉ាភួ ពុយ មានប្រសាសន៍ថា ក្រុមហ៊ុនបៃតងកម្ពុជាកើតឡើងនៅឆ្នាំ២០០៨ ប៉ុន្តែទើបតែមានដំណើរការល្អឆ្នាំ២០១០ និងឆ្នាំ២០១១នេះហើយកំពុងតែពង្រឹងប្រជាកសិករក្នុងសហគមន៍បន្ថែមទៀតលើការដាំដុះស្រូវ ត្រូវប្រើប្រាស់ជីឱ្យបានត្រឹមត្រូវ និងបន្សុទ្ធពូជស្រូវទៅតាមកម្រិតស្តង់ដាអន្តរជាតិ ។ ជាមួយនេះបានដំឡើងម៉ាស៊ីនសម្រាប់សម្ងួតស្រូវដែលអាចសម្ងួតបាន៣០០តោនក្នុង១ថ្ងៃម៉ាស៊ីនកិនស្រូវខ្នាតធំកិនបាន២៥០តោនក្នុង១ថ្ងៃ និងម៉ាសីុនកែច្នៃសម្អាតវេចខ្ចប់បាន៧២០តោនក្នុង១ថ្ងៃ។ ចំពោះផែនការ និងទិសដៅរយៈពេលវែង ក្រុមហ៊ុនមានទិសដៅ៣ចំណុចសំខាន់គឺ១-ជំរុញការផលិតស្រូវរបស់សមាជិកសហគមន៍បៃតងដែលមាននៅខេត្តពោធិ៍សាត់ បាត់ដំបង និងបន្ទាយមានជ័យក្នុងការផ្គត់ផ្គង់ពូជស្រូវ ជី និងសម្ភារបច្ចេកទេសកសិកម្ម។ ២-បង្កើនសមត្ថភាពកែច្នៃសម្រាប់សេចក្តីត្រូវការក្នុងនិងក្រៅប្រទេសលើផែនការ១.៥០០តោន ក្នុង១ថ្ងៃដែលសព្វថ្ងៃមានសមត្ថភាពផលិតបាន១.២០០តោនក្នុង១ថ្ងៃ និង៣-ពង្រីកទីផ្សារក្នុង និងក្រៅប្រទេសដែលសព្វថ្ងៃកំពុងតែមានទីផ្សារខ្លាំងនៅប៉ែកអឺរ៉ុប។
លោកបណ្ឌិតសារ៉ូត សាគុណរ៉ាត់ បញ្ជាក់ថា លោកមានបំណងបង្កើតជាសមាគម៤ប្រទេសមានថៃ ឡាវ កម្ពុជា និងវៀតណាម ក្នុងការនាំស្បៀងចេញទៅកាន់ទីផ្សារអន្តរជាតិ តែយើងត្រូវការសិក្សាស្វែងយល់រួមគ្នាដើម្បីកំណត់តម្លៃលក់លើទីផ្សារអន្តរជាតិឱ្យបានច្បាស់លាស់ព្រោះប្រទេសយើងទាំង៤សុទ្ធតែមានសក្តានុពលផ្នែកកសិកម្មដូចគ្នា ៕
ចែករំលែកព័តមាននេះ