រាជធានីភ្នំពេញ ៖ កាលពីថ្ងៃទី១៩ សីហា នៅទីស្នាក់ការគណបក្សប្រជាជនកម្ពុជា ខណ្ឌ៧មករា មានរៀបចំផ្សព្វផ្សាយខ្លឹមសារសន្និបាតគណៈកម្មាធិការ កណ្តាលលើកទី៣៦អាណត្តិទី៥ ក្រោមអធិបតីភាពលោកងី តាយី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារចុះជួយសង្កាត់
រាជធានីភ្នំពេញ ៖ កាលពីថ្ងៃទី១៩ សីហា នៅទីស្នាក់ការគណបក្សប្រជាជនកម្ពុជា ខណ្ឌ៧មករា មានរៀបចំផ្សព្វផ្សាយខ្លឹមសារសន្និបាតគណៈកម្មាធិការកណ្តាលលើកទី៣៦អាណត្តិទី៥ ក្រោមអធិបតីភាពលោកងី តាយី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារចុះជួយសង្កាត់អូរឫស្សីទី៤ ដោយមានការចូលរួមពីមាជិក សមាជិកាជាច្រើនរូប ។
លោកឡុង សុវណ្ណ អនុប្រធានគណបក្សប្រជាជនកម្ពុជា សង្កាត់អូរឫស្សីទី៤ បានអានខ្លឹមសារសន្និបាតគណៈកម្មាធិការកណ្តាលលើកទី៣៦ អាណត្តិទី៥ (២០, ២១ ខែកក្កដា ឆ្នាំ២០១១) ជូនអង្គពិធីបានជ្រាប។
លោកងី តាយី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារចុះជួយសង្កាត់អូរឫស្សីទី៤ ខណ្ឌ៧មករា បានមានប្រសាសន៍ថា គណបក្សប្រជាជនកម្ពុជារាជធានីភ្នំពេញនាពេលកន្លងមក បានដឹកនាំការងារអភិវឌ្ឍន៍រាជធានីភ្នំពេញឲ្យមានការរីកចម្រើនលើគ្រប់វិស័យ ក្នុងនោះមានដូចជាផ្លូវ ស្ពាន លូ ប្រឡាយ និងសួនច្បារដោយដាក់ភ្លើងបំភ្លឺយ៉ាងស្រស់បំព្រង ធ្វើឲ្យរាជធានីភ្នំពេញកាន់តែមានសោភ័ណភាពគួរជាទីមោទនៈ។ ទាំងនេះគឺដោយសារមានការដឹកនាំប្រកបដោយគតិបណ្ឌិតរបស់សម្តេចអគ្គមហាទាំងបីដែលជាថ្នាក់ដឹកនាំរបស់គណបក្ស ពិសេសសម្តេចអគ្គមហាសេនាបតីតេជោ ហ៊ុន សែន។ លោកប្រធានក្រុមការងារចុះជួយសង្កាត់អូរឫស្សីទី៤ បានរំលឹកដល់ប្រជាពលរដ្ឋក្នុងសង្កាត់អូរឫស្សីទី៤ ឲ្យនាំគ្នាទៅបង់ពន្ធលើអចលនទ្រព្យដែលក្រសួងសេដ្ឋកិច្ច និងហិរញ្ញវត្ថុបានប្រកាសដោយតម្រូវឲ្យប្រជាពលរដ្ឋត្រូវបង់ ហើយនេះគឺជាកាតព្វកិច្ចរបស់ប្រជាពលរដ្ឋដែលត្រូវតែធ្វើ។ ក្នុងឱកាសនោះដែរ លោកបានក្រើនរំលឹកដល់អាជ្ញាធរមូលដ្ឋានឲ្យយកចិត្តទុកដាក់ក្នុងការផ្តល់ព័ត៌មាន និងជួយផ្សព្វផ្សាយទម្រង់នៃការប្រកាសបង់ពន្ធលើអចលនទ្រព្យដល់ប្រជាពលរដ្ឋឲ្យបានគ្រប់ម្ចាស់អចលនទ្រព្យ៕
ចែករំលែកព័តមាននេះ