រាជធានីភ្នំពេញ ៖ កម្ពុជាមានគម្រោងទិញឧទ្ធម្ភាគចក្ររបស់ចិន បន្ទាប់ពីប្រទេសចិន បានយល់ព្រមឱ្យកម្ពុជាខ្ចីប្រាក់ប្រមាណ១៩៥លានដុល្លារអាមេរិក ក្នុងពិធីចុះហត្ថលេខាលើកិច្ចព្រមព្រៀងចំនួន២៩ ដែលប្រទេសទាំងពីរបានធ្វើកាលពីថ្ងៃទី២០ សីហា ២០១១ កន្លងមកថ្មីៗនេះ។ អ្នកនាំពាក្យក្រសួងការពារជាតិកម្ពុជា លោកឧត្តមសេនីយ៍ឯកឈុំ សុជាតិ កោះសន្តិភាព មិនទាន់អាចរកសេចក្តីអត្ថាធិប្បាយបាននៅឡើយទេ នៅព្រឹកថ្ងៃទី២៣ សីហា នេះ។
សេចក្តីរាយការណ៍បានឱ្យដឹងនៅថ្ងៃអង្គារ ទី២៣ សីហា ២០១១ នេះថា នេះជាកម្ចីថ្មីមួយទៀតកើតឡើងស្របពេលដែលប្រទេសទាំងពីរកំពុងមានទំនាក់ទំនងស្អិតរមួត ជាមួយគ្នា ខាងពាណិជ្ជកម្ម និងវិនិយោគទុន។ សេចក្តីរាយការណ៍បន្តថា ប្រាក់កម្ចីប្រមាណ១៩៥លានដុល្លារអាេមរិក គឺនឹងត្រូវប្រើប្រាស់ដើម្បីទិញឧទ្ធម្ភាគចក្រយោធាផលិតនៅប្រទេសចិនប្រភេទ Zhi-9 (Z-9) ។
ចំពោះឧទ្ធម្ភាគចក្រប្រភេទ Zhi-9 (Z-9) នេះ ជាម៉ូដែលមួយផលិតតាមគំរូឧទ្ធម្ភាគចក្រប្រភេទ AS 365 Dauphin II របស់ប្រទេសបារាំង ដែលបានផលិតតាំងពីទសវត្សឆ្នាំ៨០ និងត្រូវបានផលិតដោយមានអាជ្ញាប័ណ្ណត្រឹមត្រូវ។ ការទិញនេះដោយសារតែឧទ្ធម្ភាគចក្រយោធារបស់កម្ពុជា មួយចំនួនបានចាស់ទ្រុឌទ្រោម ជាពិសេសកម្ពុជា មានតែឧទ្ធម្ភាគចក្រប៉ុន្មានគ្រឿងប៉ុណ្ណោះ សម្រាប់ដំណើរការក្នុងពេលបច្ចុប្បន្ន៕
ចែករំលែកព័តមាននេះ