រាជធានីភ្នំពេញ ៖ ក្រុមគ្រូពេទ្យស្ម័គ្រចិត្តនៃមន្ទីរសុខាភិបាលរាជធានី បានចុះពិនិត្យ និងព្យាបាលជំងឺជូនដល់ប្រជាពលរដ្ឋ៣០០នាក់ ក្នុងនោះមានតាជី យាយជីចំនួន២០នាក់ ដែលការពិនិត្យព្យាបាលនេះធ្វើឡើងនៅក្នុងបរិវេណវត្តសំរោងអណ្តែត សង្កាត់ភ្នំពេញថ្មី ខណ្ឌសែនសុខ កាលពីព្រឹកថ្ងៃទី២០ សីហា ក្រោមអធិបតីភាពលោកវេជ្ជបណ្ឌិតម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានក្រុមការងារចុះជួយខណ្ឌសែនសុខ រួមទាំងលោកវេជ្ជបណ្ឌិតសុខ សុគន្ធ ប្រធានមន្ទីរសុខាភិបាលរាជធានីផងដែរ។
លោកវេជ្ជបណ្ឌិតម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានក្រុមការងារចុះជួយខណ្ឌសែនសុខ បានមានប្រសាសន៍ថា ការព្យាបាលប្រជាពលរដ្ឋដោយក្រុមគ្រូពេទ្យស្ម័គ្រចិត្ត ហើយព្យាបាលតែជំងឺស្រាលៗប៉ុណ្ណោះ បើសិនជាមានជំងឺធ្ងន់ធ្ងរ ក្រុមគ្រូពេទ្យនឹងដឹកតាមរថយន្តទៅសង្គ្រោះនៅឯមន្ទីរ
ពេទ្យ ។ ចំពោះក្រុមគ្រូពេទ្យស្ម័គ្រចិត្តដែលមកព្យាបាលជូនប្រជាពលរដ្ឋគឺសុទ្ធតែក្រុមគ្រូពេទ្យមកពីមន្ទីរសុខាភិបាលរាជធានី។ លោកបន្តថា តាមទិសដៅរបស់រាជរដ្ឋាភិបាលបានកំណត់រួចហើយនៅឆ្នាំ២០១២ ធ្វើយ៉ាងណាកុំឱ្យមានកុមារកើតជំងឺកញ្ជ្រិល និងលុបបំបាត់ជំងឺតេតាណុសទៅលើស្ត្រី និងកុមារ។ ដូច្នេះសូមនាំកុមារ និងណែនាំស្ត្រីជាម្តាយទៅចាក់វ៉ាក់សាំងដើម្បីការពារជំងឺកញ្ជ្រិល និងតេតាណុសឱ្យបានគ្រប់គ្នាដើម្បីសម្រេចឱ្យបានតាមយុទ្ធសាស្ត្ររបស់រាជរដ្ឋាភិបាលកម្ពុជា។
ជាមួយគ្នានេះដែរ លោករដ្ឋមន្ត្រីក្រសួងសុខាភិបាលក៏បានពាំនាំនូវការសួរសុខទុក្ខពីសំណាក់សម្តេចអគ្គមហាសេនាបតីតេជោហ៊ុន សែន និងលោកជំទាវកិត្តិព្រឹទ្ធបណ្ដិតប៊ុន រ៉ានី ហ៊ុន សែន ជូនដល់ប្រជាពលរដ្ឋរស់នៅក្នុងខណ្ឌសែនសុខ និងតាជី យាយជី នៅក្នុងវត្តសំរោងអណ្តែតនេះផងដែរ ។ លោករដ្ឋមន្ត្រីក៏បានណែ នាំស្ត្រីមានផ្ទៃពោះត្រូវទៅពិនិត្យផ្ទៃពោះនៅមណ្ឌលសុខភាព ដើម្បីធានាសុវត្ថិភាពពេលសំរាល និងទៅសំរាលនៅមន្ទីរពេទ្យ ឬមណ្ឌលសុខភាព។
លោកសង្កត់ធ្ងន់ថា រដូវនេះជារដូវវស្សាប្រជាពលរដ្ឋគប្បីការពារជំងឺគ្រុនឈាម ដោយធ្វើអនាម័យតាមលំនៅឋានឱ្យបានស្អាត និងសហការជាមួយភ្នាក់ងារសុខាភិបាលដើម្បីដាក់ថ្នាំសម្លាប់ដង្កូវទឹក ព្រោះថា បើអត់ដង្កូវទឹកក៏អត់មានមូសខ្លា ហើយក៏មិនមានជំងឺគ្រុនឈាមដែរ ៕
ចែករំលែកព័តមាននេះ