សម្ពោធអណ្តូងស្នប់អំណោយអង្គការមូលនិធិWe love u ដល់សាលាស្រុកបាទី

ថ្ងៃទី ២៣ ខែ សីហា ឆ្នាំ ២០១១
ម៉ោង ០៨:៤០
sara

ខេត្តតាកែវ ៖ លោកសូរ ឃុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍រួមដំណើរដោយលោកស្រីគឹម ហេសុ ប្រធានអង្គការមូលនិធិ វី ឡាវ យូ នៃប្រទេសកូរ៉េ កាលពីថ្ងៃទី២១ សីហា បានអញ្ជើញជាអធិបតីក្នុងពិធីសម្ពោធ និងប្រគល់អណ្តូងស្នប់ព្រមទាំងចែកសម្ភារសិក្សាជូនដល់សាលាបឋមសិក្សាសុខ អាន ពត់សរ សាលាបឋមសិក្សាទន្លេបាទី និងសាលាបឋមសិក្សាថ្មទ្រព្យស្ថិតនៅក្នុងស្រុកបាទីខេត្តតាកែវ។ លោកអ៊ូ សុខជា អភិបាលរងស្រុកបាទីបានបញ្ជាក់ថា ស្រុកបាទីមានសាលាចំនួន៦៥កន្លែង ក្នុងនោះសាលាបឋមសិក្សា៥០កន្លែង អនុវិទ្យាល័យ១០ និងវិទ្យាល័យ៥ មានសិស្សសរុបចំនួន៣២.១១២នាក់ ក្នុងនោះសិស្សស្រី១៤.៨៦២នាក់។

លោកអ៊ី សឹងអន អគ្គនាយករងអង្គការមូលនិធិ We love u អន្តរជាតិ បញ្ជាក់ថា អង្គការមូលនិធិ We love u ជាអង្គការអន្តរជាតិរបស់ប្រទេសកូរ៉េ បានធ្វើសកម្មភាពជាច្រើនក្នុងស្រុកបាទីតាំងពីឆ្នាំ២០០៩ មកគឺជួសជុលផ្ទះ ជីកអណ្តូងទឹកជូនប្រជាពលរដ្ឋក្រីក្រនិងផ្តល់សម្ភារសិក្សាដល់សិស្សជាដើម។ ថ្ងៃនេះអង្គការមូលនិធិ ឬ វី ឡាវ យូ បានកសាងអណ្តូងទឹកស្នប់ចំនួន៤កន្លែង បន្ថែមដល់សាលាបឋមសិក្សាចំនួន៣ក្នុងស្រុកបាទី គឺសាលាបឋមសិក្សាថ្មទ្រព្យសាលាបឋមសិក្សាសុខ អានពត់សរនិងសាលាបឋមសិក្សាទន្លេបាទី។

ក្នុងនាមរាជរដ្ឋាភិបាល និងប្រជាពលរដ្ឋស្រុកបាទី លោកសូរ ឃុន បានថ្លែងអំណរគុណយ៉ាងជ្រាលជ្រៅចំពោះអង្គការមូលនិធិ We love u អន្តរជាតិប្រទេសកូរ៉េដែលបានចំណាយថវិកាយ៉ាងច្រើនមកកសាងអណ្តូងទឹកជូនសិស្សសាលាក្នុងស្រុកបាទី សំដៅសម្រួល និងដោះស្រាយទឹកស្អាតសម្រាប់គ្រូ និងសិស្សក្នុងសាលាបឋមសិក្សាទាំងបីបានប្រើប្រាស់។ លោករដ្ឋមន្ត្រីមានប្រសាន៍បន្តថា នេះជាសមិទ្ធផលថ្មីមួយទៀត របស់អង្គការមូលនិធិ We love u ក្នុងការចូលរួមចំណែកជាមួយរាជរដ្ឋាភិបាលកម្ពុជាក្នុងកិច្ចការស្តារ និងអភិវឌ្ឍន៍ហេដ្ឋារចនាសម្ព័ន្ធ វិស័យទឹកស្អាតនៅតាមតំបន់ជនបទ។ លោកបានលើកឡើងផងដែរថា រាជរដ្ឋាភិបាល ក្រោមការដឹកនាំរបស់សម្តេចអគ្គមហាសេនាបតីតេជោហ៊ុន សែន ជាប្រមុខ ប្រទេសជាតិយើង ទទួលបាននូវសុខសន្តិភាព និងស្ថិរភាព ដែលផ្តល់ឱកាស ឱ្យបងប្អូនប្រជាពលរដ្ឋចូលរួមកសាងគ្រប់ហដ្ឋារចនាសម្ព័ន្ធសង្គមជាតិឱ្យមានភាពរីកចម្រើនលូតលាស់ពិសេសវិស័យអប់រំ ដែលជាវិស័យអាទិភាព ឈានឆ្ពោះទៅអភិវឌ្ឍសេដ្ឋកិច្ច និងសង្គមកិច្ច។ លោកសូរ ឃុន បានបំពាក់គ្រឿងឥស្សរិយយសជូនដល់លោកស្រីគឹម ហេសុ ប្រធានអង្គការមូលនិធិ We love u ដែលបានចំណាយថវិកាចូលរួមមកកសាងអណ្តូងទឹកក្នុងស្រុកបាទី និងបានប្រគល់សម្ភារ សិក្សាដែលជាអំណោយរបស់អង្គការមូលនិធិ we love u ជូនដល់សិស្សានុសិស្ស។ ដោយឡែកថវិការបស់ លោកចំនួន១លាន២សែនរៀល ផ្តល់ជូនសាលាបឋមសិក្សាសុខ អានពត់សរសម្រាប់ចាក់ដីក្នុងទីធ្លាសាលា។

បន្ទាប់ពីលោកស្រីគឹម ហេសុ ប្រធានអង្គការ និងលោកឡោ វិរិទ្ធ អនុប្រធានការិយាល័យ អប់រំ យុវជន និងកីឡា ស្រុកបាទីចុះហត្ថលេខាប្រគល់ និងទទួលអណ្តូងទឹករួចមក លោកសូរ ឃុន និងម្ចាស់អំណោយ បានកាត់ខ្សែបូជានិមិត្តរូបសម្ពោធដាក់ឱ្យប្រើប្រាស់អណ្តូងទឹកស្អាត ទាំងបួនកន្លែងគឺអណ្តូងស្នប់២ កន្លែងស្ថិតនៅក្នុងសាលាបឋមសិក្សាសុខ អាន ពត់សរ១កន្លែង ស្ថិតនៅក្នុងសាលាបឋមសិក្សាថ្មទ្រព្យ និងអណ្តូងទឹក១កន្លែងទៀត ស្ថិតក្នុងសាលាបឋមសិក្សាទន្លេបាទី។ អណ្តូងស្នប់ទាំង៤កន្លែងនេះ ចំណាយថវិកាកសាងអស់ចំនួន៨ពាន់ដុល្លារអាមេរិករួមទាំងសម្ភារសិក្សាសម្រាប់ចែកសិស្សទាំងបីសាលាខាងលើអស់ចំនួន៤ពាន់ដុល្លារផងដែរ៕