រាជធានីភ្នំពេញ ៖ កាលពីថ្ងៃទី១៦ សីហា ប្រតិភូសាខាកាកបាទក្រហមកម្ពុជាខេត្តកណ្តាល ដឹកនាំដោយលោកហាក់ ប៊ុនធឿន អនុប្រធានគណៈកម្មាធិការសាខា បានអញ្ជើញទៅទទួលអំណោយសប្បុរសធម៌ពីលោកច័ន្ទ សារុន និងលោកជំទាវ សុខ កែវ ព្រមទាំងបុត្រាបុត្រី ស្ថិតនៅភូមិគ្រឹះលេខ៦០ ផ្លូវលេខ៣១០ សង្កាត់បឹងកេងកងទី១ ខណ្ឌចំការមន ។ អញ្ជើញចូលរួមក្នុងពិធីនេះមាន លោកជំទាវ សុខ កែវ ច័ន្ទ សារុន, លោកស្រី តុង អៀង សាឡាន ត្រូវជាម្តាយមីងមកពីប្រទេសបារាំង, លោកសារុន វិធុរ៉ាក់, លោកស្រី សារុន វិធុរា៉ និងស្វាមី, កញ្ញា សារុន វិធុរ័ត្ន និងកញ្ញាសារុន វិធុរាសី ដែលត្រូវជាបុត្រាបុត្រី ព្រមទាំងមានការចូលរួមពីសំណាក់លោក លោកស្រីជាសមាជិក សមាជិកាគណៈកម្មាធិការសាខា និងមន្ត្រីក្រុមប្រតិបត្តិការសាខាជាច្រើនរូបទៀត ។
លោកជំទាវ សុខ កែវ ច័ន្ទ សារុន បានមានប្រសាសន៍សំណេះសំណាល ដោយសម្តែងនូវការគាំទ្ររាល់បេសកកម្មរបស់កាកបាទក្រហមកម្ពុជា ក្រោមការដឹកនាំដ៏ឈ្លាសវៃនៃលោកជំទាវកិត្តិព្រឹទ្ធបណ្ឌិត ប៊ុន រា៉នី ហ៊ុន សែន និងបានសម្តែងនូវក្តីអាណិតអាសូរយា៉ងក្រៃលែងដល់ជនងាយរងគ្រោះ និងជនរងគ្រោះទាំងឡាយនៅក្នុងខេត្តកណ្តាល ។ លោកជំទាវក៏បានថ្លែងអំណរគុណ និងកោតសរសើរបុត្រាបុត្រីទាំង៤នាក់ ដែលជាកូនល្អ មានចិត្តកតញ្ញូចំពោះឪពុកម្តាយ ជាពិសេសបានប្រារព្ធខួបកំណើតឱ្យម្តាយក្នុងជន្មាយុគម្រប់៦១ឆ្នាំ កាលពីថ្ងៃសៅរ៍ ទី១៣ សីហា ឆ្នាំ២០១១ កន្លងទៅថ្មីៗនេះ ។ លោកជំទាវបន្តថា ដោយមើលឃើញអំពីតម្រូវការចាំបាច់របស់សាខាក្នុងការឆ្លើយតបដល់ជនរងគ្រោះ និងជនងាយរងគ្រោះដោយគ្រោះមហន្តរាយផ្សេងៗនៅក្នុងរដូវវស្សានេះ លោកជំទាវ និងក្រុមគ្រួសារក៏បានរំលែកចំណងដៃមួយចំណែកពីពិធីបុណ្យខួបកំណើតជួយដល់សាខាកាកបាទក្រហមកម្ពុជាខេត្តកណ្តាល មានអង្ករ១តោន ទឹកបរិសុទ្ធឱរា៉ល់៣០កេស មីយើងចំនួន៣០កេស ដែលមានតម្លៃជាទឹកប្រាក់ស្មើនឹង៨២៥ដុល្លារសហរដ្ឋអាមេរិក និងថវិកាចំនួន៣លានរៀល ដើម្បីសាខាចាត់ចែងប្រើប្រាស់ក្នុងការងារមនុស្សធម៌ ។
ជាការឆ្លើយតប លោកហាក់ ប៊ុនធឿន មានប្រសាសន៍សំណេះសំណាលដោយបានថ្លែងអំណរគុណយា៉ងជ្រាលជ្រៅចំពោះលោកជំទាវ សុខ កែវ ច័ន្ទ សារុន និងក្រុមគ្រួសារ និងវាយតម្លៃខ្ពស់នូវកាយវិការដ៏ល្អប្រពៃប្រកបដោយទឹកចិត្តមនុស្សធម៌ពិតៗដែលបានស្ម័គ្រចិត្តបរិច្ចាគនូវទ្រព្យធនរបស់ខ្លួន ផ្តល់ជាវិភាគទានដល់សាខាកាកបាទក្រហមកម្ពុជាខេត្ត ដើម្បីបង្កលក្ខណៈឱ្យសាខាមានលទ្ធភាពក្នុងការឆ្លើយតបចំពោះតម្រូវការនៃប្រជាពលរដ្ឋងាយរងគ្រោះ និងពលរដ្ឋរងគ្រោះដោយគ្រោះមហន្តរាយផ្សេងៗ ។ លោកបានចាត់ទុកកាយវិការនេះថា ជាកាយវិការគំរូដ៏ល្អប្រពៃថ្លៃថ្លាសម្រាប់ប្រជាពលរដ្ឋទូទៅនៅក្នុងព្រះរាជាណាចក្រកម្ពុជា ដែលនេះបង្ហាញឱ្យឃើញនូវសិល្បៈនៃការចែករំលែកក្នុងការជួយគ្នាទៅវិញទៅមក នៅគ្រាលំបាករបស់ប្រជាពលរដ្ឋខ្មែរយើង ។ លោកសន្យាយកថវិកា និងសម្ភារអំណោយទាំងនេះទៅចាត់ចែងប្រើប្រាស់ក្នុងសកម្មភាពមនុស្សធម៌ ពិសេសការឆ្លើយតបគ្រោះមហន្តរាយចំពោះជនរងគ្រោះទូទាំងខេត្តកណ្តាលឱ្យមានតម្លាភាព និងត្រឹមត្រូវតាមគោលការណ៍គ្រឹះទាំង៧ប្រការរបស់កាកបាទក្រហម។
ឆ្លៀតក្នុងឱកាសខួបកំណើតគម្រប់៦១ឆ្នាំរបស់លោកជំទាវ ក្នុងនាមគណៈកម្មាធិការសាខាកាកបាទក្រហមកម្ពុជា ខេត្តកណ្តាល សូមជូនពរជ័យ សិរីមង្គល វិបុលសុខគ្រប់ប្រការកើតមានដល់លោកជំទាវ និងក្រុមគ្រួសារ សូមប្រកបតែពុទ្ធពរទាំង៤ប្រការ គឺអាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ ៕
ចែករំលែកព័តមាននេះ