ខេត្តកណ្តាល ៖ កាលពីព្រឹកថ្ងៃទី១៦ សីហា ឆ្នាំ២០១១ ប្រតិភូសាខាកាកបាទក្រហមកម្ពុជាខេត្ត ដឹកនាំដោយលោកហេ កាន់ ប្រធានគណៈកម្មាធិការសាខា រួមដំណើរដោយលោកហាក់ ប៊ុនធឿន អនុប្រធានគណៈកម្មាធិការសាខា, លោកជំទាវ អៀង វុឌ្ឍី ឈុន ស៊ីរុន, លោកជំទាវ ដូញូ ប៊ុន សម, លោកជំទាវ អុល ណារ៉ាន់ ជឹម សុខខុន លោក-លោកស្រីជាសមាជិក សមាជិកាគណៈកម្មាធិការសាខា សមាជិកទ្រទ្រង់ មន្ត្រីក្រុមប្រតិបត្តិសាខា បានចុះចែកជំនួយសង្គ្រោះជូនប្រជាពលរដ្ឋរងគ្រោះដោយខ្យល់ព្យុះចំនួន១០គ្រួសារ គ្រួសាររងគ្រោះដោយរន្ទះបាញ់ស្លាប់១គ្រួសារ និងគ្រួសាររងរបួសដោយរន្ទះបាញ់២គ្រួសារ នៅសាលាឃុំទំនប់ធំ ស្រុកពញាឮ ។ អញ្ជើញចូលរួមជាកិត្តិយសក្នុងឱកាសនោះមានលោកឆេង សារឿន រដ្ឋលេខាធិការក្រសួងទំនាក់ទំនងជាមួយព្រឹទ្ធសភា រដ្ឋសភា និងអធិការកិច្ច ព្រមទាំងក្រុមការងារ, គណៈអភិបាលស្រុក ក្រុមប្រឹក្សាឃុំ និងមន្ត្រីរាជការជុំវិញសាលាស្រុក-ឃុំជាច្រើនរូបទៀត ។
បន្ទាប់ពីលោកតុង ស៊ីវមី អភិបាលស្រុក និងជាប្រធានគណៈកម្មាធិការអនុសាខាស្រុក អានរបាយការណ៍ស្វាគមន៍រួចមក លោកហេ កាន់ និងលោកឆេង សារឿន បានមានមតិសំណេះសំណាលដោយពាំនាំនូវការផ្តាំផ្ញើសាកសួរសុខទុក្ខពីសំណាក់លោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនចំពោះបងប្អូនជនរងគ្រោះទាំងអស់ដោយក្តីនឹករលឹក ។ លោកបានថ្លែងអំណរគុណដល់អាជ្ញាធរដែនដីគ្រប់លំដាប់ថ្នាក់ ដែលកន្លងមកក៏ដូចជាបច្ចុប្បន្ន បាននិងកំពុងយកចិត្តទុកដាក់ខ្ពស់ចំពោះសុខទុក្ខរបស់ប្រជាពលរដ្ឋរងគ្រោះប្រកបដោយទឹកចិត្តមនុស្សធម៌ ។ សព្វថ្ងៃកាកបាទក្រហមកម្ពុជាកំពុងតែមានសកម្មភាពយា៉ងមមាញឹកនៅទូទាំងប្រទេស ដោយផ្តោតទៅលើវិស័យស្នូល៤គឺ ការងារគ្រប់គ្រងគ្រោះមហន្តរាយ, ការអប់រំសុខភាព និងថែទាំសុខភាពបឋមក្នុងសហគមន៍, ការលើកកម្ពស់គោលការណ៍គ្រឹះ-តម្លៃមនុស្សធម៌ និងការអភិវឌ្ឍស្ថាប័ន-អភិវឌ្ឍធនធាន។
ពិសេស បន្ទាប់ពីការគិតគូរចំពោះជនរងគ្រោះដោយសារមេរោគអេដស៍ លោកជំទាវកិត្តិព្រឹទ្ធបណ្ឌិតប្រធាន ក៏បានផ្តោតការយកចិត្តទុកដាក់ចំពោះសុខភាពមាតា និងទារកផងដែរ ព្រោះថា បញ្ហានេះគឺជាកិច្ចការប្រឈមថ្មីមួយដែលកំពុងតែកើតមាននៅពេលបច្ចុប្បន្ន ។ ជានិច្ចកាល លោកជំទាវកិត្តិព្រឹទ្ធបណ្ឌិតប្រធាន តែងតែយកចិត្តទុកដាក់ខ្ពស់ចំពោះសុខទុក្ខប្រជាពលរដ្ឋរងគ្រោះ និងងាយរងគ្រោះនៅទូទាំងព្រះរាជាណាចក្រកម្ពុជា ដោយមិនរើសអើង ឬប្រកាន់និន្នាការនយោបាយ និងអនុវត្តតាមគោលការណ៍គ្រឹះទាំង៧របស់ចលនាកាកបាទក្រហម សមតាមពាក្យស្លោកមួយឃ្លាថា «ទីណាមានទុក្ខលំបាក ទីនោះមានកាកបាទក្រហមកម្ពុជាចុះជួយសង្គ្រោះ» ។
លោកស្រី គង់ សារីយា៉ នាយិកាសាខាបានអាននាមសប្បុរសជនដែលបានផ្តល់ជំនួយសង្គ្រោះដល់ជនរងគ្រោះ ហើយជំនួយជាសម្ភារដែលគ្រួសាររងគ្រោះទាំង១៣គ្រួសារទទួលបានក្នុង១គ្រួសារៗមាន អង្ករ២៥គីឡូក្រាម, ខោអាវ១កញ្ចប់, សារុង១ និងគ្រឿងឧបភោគបរិភោគចំនួន១៧មុខបន្ថែមទៀត ។ ចំពោះថវិកាដែលបានផ្តល់ជូនគ្រួសាររងគ្រោះដោយខ្យល់ព្យុះ១០គ្រួសារ និង១គ្រួសារដែលរងគ្រោះដោយរន្ទះបាញ់ស្លាប់បានទទួលថវិកាចំនួន៤០ម៉ឺនរៀល ហើយ២គ្រួសារទៀតដែលរងរបួសដោយរន្ទះបាញ់បានឧបត្ថម្ភក្នុងមួយគ្រួសារថវិកាចំនួន២៥ម៉ឺនរៀល ។
បន្ទាប់ពីពិធីចែកអំណោយ ប្រតិភូសាខាបានបន្តដំណើរទៅពិនិត្យមើលការដំឡើង និងរៀបចំបំពាក់គ្រែសម្រាកព្យាបាលជំងឺ និងគ្រែសម្រាប់ពិនិត្យស្ត្រីមានផ្ទៃពោះនៅមណ្ឌលសុខភាពឃុំទំនប់ធំ ស្រុកពញាឮ ដែលជាអំណោយរបស់លោកឆេង សារឿន និងក្រុមការងារចុះជួយឃុំ ។
សប្បុរសជនដែលបានឧបត្ថម្ភសម្ភារ និងថវិការួមមាន លោកលឹម គានហោ រដ្ឋមន្ត្រីក្រសួងធនធានទឹក និងឧតុនិយម ថវិកា៥០មឺុនរៀល, លោកជំទាវ អៀង វុឌ្ឍី ឈុន ស៊ីរុន ថវិកា២០ម៉ឺនរៀល និងសារុង១០, លោកជំទាវ គឹង ចាន់ឌី គន់ គីម ថវិកា៥០ម៉ឺនរៀល, លោកជំទាវ កុល សំអុល ថវិកា១០ម៉ឺនរៀល, លោកជំទាវ ជឹម សុខខុន ថវិកា១០ម៉ឺនរៀល, លោកជំទាវ ដូញូ ប៊ុន សម ថវិកា២០ម៉ឺនរៀល, លោកជំទាវ ឈុន សាម៉ឺឌី កៅ ប៊ុនហុង ថវិកា១០ម៉ឺនរៀល, លោកជំទាវ ឈួ ចក្ត្រា អ៊ាវ ចំរើន ថវិកា១០ម៉ឺនរៀល, លោកជំទាវ ប្រាក់ សុគន្ធា ថវិកា៨ម៉ឺនរៀល, លោកជាវ តាយ ថវិកា២០មឺុនរៀល, លោកស្រី សុខ សុវណ្ណារី ថវិកា១០ដុល្លារ និងខោអាវ១០កញ្ចប់, លោកស្រីកិច អៃដាគន្ធារី ថវិកា១០ម៉ឺនរៀល, លោកមាស សឿន និងលោកស្រីកើត សាវ៉ាន ថវិកា២៤ម៉ឺនរៀល, លោកស្រី កាន កឿន ៥ម៉ឺនរៀល និង១០ដុល្លារ, លោកខាត់ ប៊ុណ្ណា និងលោកស្រី ហួរ សិទ្ធី ថវិកា៤០ម៉ឺនរៀល, លោកជំទាវ វដ្តី សម សាគុណ ថវិកា៥ដុល្លារ, លោកជំទាវ ឃឹម ស៊ីវខេង ហែម បូរ ថវិកា៤ម៉ឺនរៀល, លោកស្រី ឃ្លាំង សំបូរ អ៊ូ ឈាង ថវិកា១០ម៉ឺនរៀល, លោកគួយ ខាយម៉េង ថវិកា១០ម៉ឺនរៀល, លោកជំទាវម៉ែន ស្រីពៅ ថវិកា១០ម៉ឺនរៀល, លោកប៉ែន វុទ្ធី ថវិកា១០ម៉ឺនរៀល, លោកស្រីគន់ រដ្ឋា លន់ សុផាត ថវិកា១០ម៉ឺនរៀល និង១០ដុល្លារ, លោកជំទាវហែន ស្រីឡែន ស៊ិន ខ័ណ្ឌី ថវិកា១០ម៉ឺនរៀល និង១០ដុល្លារ, លោកស្រី ចាន់ លក្ខណា អិន វ៉ានវិបុល ថវិកា១០ម៉ឺនរៀល និង១០ដុល្លារ, លោកជំទាវ ទឹម ស៊ីលីតា ហ៊ួត ហ៊ាង ថវិកា១០ម៉ឺនរៀល និង១០ដុល្លារ, លោកឆេង សារឿន ថវិកា១លានរៀល និងក្រុមការងារលោកតុង ស៊ីវមី អភិបាលស្រុកពញាឮ ទឹកស៊ីអ៊ីវ១០យួរ និងទឹកត្រី១០យួរ ៕
ចែករំលែកព័តមាននេះ