កីឡាករប្រដាល់ដ៏ល្បីឈ្មោះរបស់ហ្វ៊ីលីពីនម៉ានី ប៉ាក់គីអាវបាននិយាយថា ខ្លួននឹងជួបប្រកួតជាមួយកីឡាករអាមេរិកហ្វ្លយ មេវេដឌ័រនៅឆ្នាំក្រោយ ។
ការអះអាងអំពីការជួបគ្នានេះអំឡុងពេលប៉ាក់គីអាវជួបជាមួយលោក Peter Maniatisពិធីករទូរទស្សន៍ប្រដាល់ Ko Boxingរបស់អូស្ត្រាលីនៅឯសណ្ឋាគារ Sofitel Hotel ក្រុងម៉ានីល។ ប៉ាកគីអាវនិយាយថា៖«ខ្ញុំនឹងប្រកួតជាមួយកីឡាករមេវេដឌ័រនៅឆ្នាំក្រោយ»។
ការចរចាឲ្យមានការជួបប្រកួតគ្នារវាងប៉ាក់គីអាវនិងមេវេដឌ័រធ្លាប់បានទទួលបរាជ័យ២លើករួចមកហើយក្នុងរយៈពេល២ឆ្នាំចុងក្រោយនេះ។ គេសង្កេតឃើញថា ចំណុចដែលភាគីទាំងពីរមិនអាចឈានដល់ការព្រមព្រៀងគ្នានោះគឺពេលវេលានិងបែបបទនៃការធ្វើតេស្តឈាម ។
តាមការប្រកាសរបស់ប៉ាក់គីអាវលើកនេះមានន័យថា រូបគេព្រមទាំងលោកបប់ អារ៉ាំបានត្រៀមខ្លួនរួចជាស្រេចក្នុងការទទួលយកការទាមទាររបស់កីឡាករមេវេដឌ័រ។ ប៉ុន្តែខណៈដែលឧបសគ្គមួយទើបតែបានដោះស្រាយរួច ឧបសគ្គថ្មីមួយទៀតក៏បានកើតឡើងខណៈដែលឪពុករបស់មេវេដឌ័រទាមទារមិនសមរម្យមួយ។
លោកអារ៉ាំនិយាយថា ៖«ឪពុករបស់កីឡាករមេវេដឌ័រនិយាយថា«yes» ប៉ុន្តែថា ប៉ាក់គីអាវមិនត្រូវអនុញ្ញាតឲ្យហ្វឹកហាត់នៅប្រទេសហ្វុីលីពីនឡើយ »។ លោកអារ៉ាំបន្តថា៖«យើងពិតជាមិនបានរារាំងមិនឲ្យការប្រកួតកើតឡើងទេ។ យើងនឹងព្យាយាមធ្វើអ្វីគ្រប់យ៉ាងតាមដែលអាចដើម្បីឲ្យការប្រកួតនេះកើតឡើង។ តែយ៉ាងណា យើងក៏មិនអាចរត់តាមមនុស្សនេះដែរដ្បិតអីប្រសិនជាយើងធ្វើតាមគេ នោះយើងនឹងមិនអាចសម្រេចបានអ្វីទាំងអស់»។
សូមបញ្ជាក់ថាទាំងប៉ាក់គីអាវទាំងមេវេដឌ័រសុទ្ធតែត្រូវឡើងរេញប្រកួតជាមួយគូប្រកួតផ្សេងពីគ្នានៅឡាសវេហ្គាសក្នុងពេលខាងមុខដូចគ្នា។ ប៉ាក់គីអាវនឹងជួបប្រកួតជាមួយកីឡាករម៉ិកស៊ិកចូអាន ម៉ានូអែល ម៉ាកហ្គេសថ្ងៃទី១២វិច្ឆិកានៅសង្វៀន MGM Grand Gardenខណៈមេវេដឌ័រត្រូវជួបជាមួយកីឡាករវិចទ័រ អូទីសនៅថ្ងៃទី១៧ខែកញ្ញានៅសង្វៀនដដែលដូចប៉ាក់គីអាវ៕
ចែករំលែកព័តមាននេះ