ខេត្តព្រះសីហនុ ៖ កាលពីថ្ងៃទី១១ សីហា ឆ្នាំ២០១១ លោកទិត វុទ្ធី អភិបាលស្រុកព្រៃនប់ បាននាំយកអំណោយមួយចំនួនដែលបានមកពីការជួយឧបត្ថម្ភរបស់សប្បុរសជនក្នុងស្រុកទៅប្រគល់ជូនជនចាស់ជរាចំនួន៥នាក់ ដែលពួកគាត់កំពុងជួបការលំបាកផ្នែកជីវភាព។ ការប្រគល់អំណោយបានធ្វើឡើងនៅក្នុងលំនៅឋានលោកគួច សំណាង ស្ថិតក្នុងភូមិវាលមាស ឃុំវាលរេញ ស្រុកព្រៃនប់ ដោយមានការនិមន្តនិងអញ្ជើញចូលរួមពីព្រះគ្រូចៅអធិការវត្តចំនួន៦អង្គដឹកនាំដោយព្រះតេជគុណ ឈឹម យុត ព្រះអនុគណស្រុកនិងជាព្រះគ្រូចៅអធិការវត្តវាលមាស លោកហែម វុទ្ធី ក្រុមប្រឹក្សាស្រុកនិងភរិយា លោកនាយកវិទ្យាល័យហ៊ុន សែន វាលរេញ រួមទាំងសប្បុរសជនជាច្រើនរូបទៀត។
លោកហែម វុទ្ធី បានឱ្យដឹងថា មនុស្សចាស់ដែលពួកគាត់ជួបការលំបាកក្នុងជីវភាពទាំង៥នាក់ ហើយមកទទួលអំណោយនាពេលនេះមាន ១-លោកតានួន អាយុ៧៦ឆ្នាំ ២-លោកយាយរ៉ូ អាយុ៨៨ឆ្នាំ ៣-លោកយាយហ្គិច គុណ អាយុ៧៥ឆ្នាំ ៤-លោកយាយយា៉ន អាយុ៧២ឆ្នាំ ទាំង៤នាក់រស់នៅភូមិវាលមាស ឃុំវាលរេញ និង៥-លោកយាយផុយ អាយុ៧៨ឆ្នាំ រស់នៅភូមិបឹងវែង ឃុំវាលរេញ ។ ពួកគាត់ទាំង៥នាក់នេះក្នុងម្នាក់ៗទទួលបានអង្ករ៥០គីឡូក្រាម មីមួយកេស និង៥កញ្ចប់ ទឹកត្រី១យួរ ទឹកស៊ីអ៊ីវ១យួរ ស្ករស ប៊ីចេង សាប៊ូ ត្រីខ ស្ករគ្រាប់ នំ ខោអាវ១កំប្លេ និងប្រាក់ចំនួន៥ម៉ឺនរៀល។
លោកទិត វុទ្ធី អភិបាលស្រុក ថ្លែងថា អំណោយដែលនាំយកមកចែកជូននាពេលនេះបានមកពីការជួយឧបត្ថម្ភពីព្រះសង្ឃចំនួន៦វត្តដឹកនាំដោយព្រះតេជគុណឈឹម យុត ហើយនៅក្នុងនោះដែរក៏មានការជួយពីសប្បុរសជនជាអាជីវករ និងលោកហែម វុទ្ធី ក្រុមប្រឹក្សាស្រុកនឹងភរិយា និងសាលាស្រុក។ នេះសបញ្ជាក់ឱ្យឃើញពីការរួមចំណែកមួយយ៉ាងធំធេងពីសំណាក់សប្បុរសជន ក្នុងការជួយឧបត្ថម្ភគាំទ្រយ៉ាងអស់ពីចិត្តពីថ្លើម ដោយសុខចិត្តចំណាយថវិកាផ្ទាល់ខ្លួន ដើម្បីចែករំលែកជូនចាស់ជរាក៏ដូចជាទុរគតជនគ្មានទីពឹង៕
ចែករំលែកព័តមាននេះ