ខេត្តព្រៃវែង ៖ នៅព្រឹកថ្ងៃទី១៦ សីហា ភ្នាក់ងារសារព័ត៌មានកោះសន្តិភាពប្រចាំខេត្តព្រៃវែង បាននាំយកអំណោយរបស់សប្បុរសជនដែលបានជួយឧបត្ថម្ភតាមរយៈទីចាត់ការកោះសន្តិភាពជូនទៅឪពុក និងទារក ដែលកើតបាន១២ថ្ងៃ ត្រូវម្តាយស្លាប់ចោល កាលពីថ្ងៃទី១ សីហា ២០១១ ដោយការធ្លាក់ឈាម។
លោកយ៉ុន សាមិត្ត ដែលត្រូវជាឪពុករបស់ទារកកំសត់ បានសម្តែងនូវការដឹងគុណ ចំពោះលោកអ្នកជាសប្បុរសជន និងអរគុណចំពោះលោកឧកញ៉ាថុង អ៊ុយប៉ាង និងសហការីដែលលោកបានជួយចុះផ្សព្វផ្សាយឱ្យសប្បុរសជនបានឃើញតាមរយៈទំព័រសារព័ត៌មានកោះសន្តិភាពដ៏មានប្រជាប្រិយភាពនេះ។ ថ្វីបើថវិកានេះមានប្រមាណតិចតួចមែន តែជាសន្តានចិត្តដ៏ល្អប្រពៃកម្ររកបាន។ លោកយ៉ុន សាមិត្ត បានលើកដៃបួងសួងដល់ទេវតា និងវត្ថុស័ក្តិសិទ្ធិលើលោកតាមជួយថែរក្សាអស់លោកសប្បុរសជនឱ្យជួបតែសេចក្តីសុខ និងសេចក្តីចំរើនគ្រប់កាលទាំងពួង។
លោកយ៉ុន សាមិត្ត សុំអំពាវនាវតាមរយៈសារព័ត៌មានកោះសន្តិភាព ចំពោះសប្បុរសជនមេត្តាជួយឧបត្ថម្ភដល់លោកបន្តទៀត ព្រោះគាត់ពុំមានលទ្ធភាពរកលុយទិញទឹកដោះគោចិញ្ចឹមកូនទេ ធ្វើឱ្យទារកជាកូនឈឺ មិនឈប់។ ណាមួយជីវភាពខ្វះខាត ដោយសារកូន៦នាក់ នៅតូចៗពុំទាន់ចេះប្រកបកិច្ចការពឹងលើឪពុកដែលមានមុខរបរជាកម្មករ រកមួយថ្ងៃហូបមួយថ្ងៃស្ទើរមិន គ្រប់។
ថវិកាដែលកោះសន្តិភាពយកទៅជូនដល់ដៃលោកយ៉ុន សាមិត្ត នេះគឺបានទទួលពី លោកអ៊ុំ សាមុត និងអ្នកស្រីចាន់ ម៉ូលី ជាភរិយា បានឧបត្ថម្ភចំនួន២០ដុល្លារ និងលោកសេង គី ផ្ទះ លក់ទាខ្វៃនៅច្បារអំពៅ ផ្លូវជាតិលេខ១ ផ្ទះ លេខ៤០Eo ខណ្ឌមានជ័យ ឧបត្ថម្ភ៣ម៉ឺនរៀល៕
ចែករំលែកព័តមាននេះ