ខេត្តតាកែវ ៖ ជនសង្ស័យម្នាក់ត្រូវបានប៉ូលិសស្រុកត្រាំកក់ស្ទាក់ចាប់ ខ្លួនបាន រួចបញ្ជូនទៅកាន់ស្នងការដ្ឋាននគរបាលខេត្តភ្លាមៗ ដើម្បីចាត់ការទៅតាមច្បាប់ បន្ទាប់ពីជនរូបនេះបានលួចម៉ូតូរបស់អ្នកមកហាត់ប្រាណជិះ គេចខ្លួនតែត្រូវប៉ូលិសដេញចាប់ខ្លួនបាន ។ ហេតុការណ៍នេះបានកើតឡើងកាលពីថ្ងៃទី១៤ សីហា វេលា
ខេត្តតាកែវ ៖ ជនសង្ស័យម្នាក់ត្រូវបានប៉ូលិសស្រុកត្រាំកក់ស្ទាក់ចាប់ខ្លួនបាន រួចបញ្ជូនទៅកាន់ស្នងការដ្ឋាននគរបាលខេត្តភ្លាមៗ ដើម្បីចាត់ការទៅតាមច្បាប់ បន្ទាប់ពីជនរូបនេះបានលួចម៉ូតូរបស់អ្នកមកហាត់ប្រាណជិះគេចខ្លួនតែត្រូវប៉ូលិសដេញចាប់ខ្លួនបាន ។ ហេតុការណ៍នេះបានកើតឡើងកាលពីថ្ងៃទី១៤ សីហា វេលាម៉ោង៧ និង៤៥នាទីយប់ ស្ថិតនៅតាមបណ្តោយផ្លូវជាតិលេខ៣ ក្នុងភូមិស្មន់ព្រាម ឃុំអង្គតាសោម ស្រុកត្រាំកក់ ។
លោកអនុសេនីយ៍ឯកអ៊ួន សុខុម អធិការនគរបាលស្រុកត្រាំកក់ បានឱ្យដឹងថា ជនសង្ស័យដែលប៉ូលិសដេញចាប់ខ្លួនបាននេះមានឈ្មោះជា ឆែល ភេទប្រុស អាយុ១៩ឆ្នាំ រស់នៅភូមិពោធិ ឃុំខ្វាវ ស្រុកសំរោង ។ នៅថ្ងៃកើតហេតុវេលាម៉ោង៥ និង៥០នាទីល្ងាច ជនសង្ស័យបានធ្វើសកម្មភាពលួចម៉ូតូរបស់គេជិះគេចខ្លួន បាត់ពេលដែលម្ចាស់ម៉ូតូបញ្ឈរទុករួចទៅហាត់ប្រាណនៅសួនច្បារវិមានឯករាជ្យដោយភ្លេចដកសោចេញ។ ម្ចាស់ម៉ូតូឈ្មោះគាំ ចាន់ណា ភេទ ស្រី អាយុ៣៣ឆ្នាំ រស់នៅភូមិថ្នល់បែក សង្កាត់ រកាក្រៅ ក្រុងដូនកែវ ជិះម៉ូតូធុន C125 ស៊េរីឆ្នាំ ២០០៨ ឡើងតែម២០១០ ពណ៌ខ្មៅ ពាក់ស្លាកលេខ 1C-9970 តាកែវ ។
លោកអធិការបានបន្តទៀតថា ជនសង្ស័យបន្ទាប់ពីលួចម៉ូតូគេបានហើយក៏ជិះតាមផ្លូវជាតិលេខ៣ ឆ្ពោះទៅកាន់រាជធានីភ្នំពេញ លុះជិះដល់ផ្សារថ្នល់បត់ជួបប៉ូលិសចរាចរកំពុងត្រួតពិនិត្យច្បាប់ចរាចរណ៍ ក៏ជិះបកក្រោយវិញចុះតាមផ្លូវលំមកដល់ឃុំលាយបូរ ក៏ត្រូវប៉ូលិសដេញតាមពីក្រោយរហូតដល់ចំណុចខាងលើ ទើបត្រូវចាប់ខ្លួនបាន ។
ស្ត្រីម្ចាស់ម៉ូតូបានប្រាប់កោះសន្តិភាពឱ្យដឹងថា មុនពេលកើតហេតុគាត់បានទុកម៉ូតូលើខឿនសួនច្បារខាងលិចវិមានឯករាជ្យដូចសព្វដងដោយទុកសោជាប់ម៉ូតូ ហើយដើរហាត់ប្រាណព័ទ្ធជុំវិញសួនច្បារ ។ ពេលគាត់កំពុងតែដើរហាត់ប្រាណ ស្រាប់តែឃើញបុរសម្នាក់ឡើងជិះម៉ូតូរបស់គាត់បើកសំដៅទៅទិសខាងលិច ទើបគាត់ស្រែកឆោឡោឡើង និងរាយការណ៍ដល់ប៉ូលិសក្រុងដូនកែវឱ្យជួយអន្តរាគមន៍រហូតតាមចាប់ខ្លួនចោរនោះបាន ។
ជនសង្ស័យជា ឆែល បានសារភាពប្រាប់ប៉ូលិសថា រូបគេពិតជាបានលួចម៉ូតូរបស់គេមែន ពេលលួចបានប្រុងជិះទៅភ្នំពេញ តែត្រូវប៉ូលិសដេញតាមពីក្រោយរហូតចាប់ខ្លួនបានតែម្តង ។
លោកវរសេនីយ៍ត្រីយ៉ុង ញីវ នាយរងការិយាល័យព្រហ្មទណ្ឌកម្រិតស្រាលខេត្តបានឱ្យដឹងថា នៅព្រឹកថ្ងៃទី១៦ សីហា ២០១១ សមត្ថកិច្ចបានបញ្ជូនជនសង្ស័យទៅកាន់សាលាដំបូងខេត្ត ដើម្បីកាត់ទោសតាមច្បាប់ ចំណែកម៉ូតូបានប្រគល់ទៅឱ្យម្ចាស់វិញហើយ ៕
ចែករំលែកព័តមាននេះ