រាជធានីភ្នំពេញ ៖ ក្រសួងការពារជាតិបានអំពាវនាវឱ្យកងទ័ពថៃដែលកំពុងឈរជើងនៅប្រាសាទតាក្របី អនុវត្តការងាររបស់ខ្លួនឱ្យបានត្រឹមត្រូវ និងការទទួសខុសត្រូវស្របតាមកិច្ចព្រមព្រៀងដែលភាគីទាំងពីរបានឯកភាពគ្នា ។ ការលើករបស់ក្រសួងការពារជាតិ បន្ទាប់ពីមានការប៉ះទង្គិចពាក្យសំដីគ្នារវាងកងទ័ពថៃ ជាមួយអ្នកទេសចរកម្ពុជា ពេលចូលទស្សនាប្រាសាទតាក្របី…
រាជធានីភ្នំពេញ ៖ ក្រសួងការពារជាតិបានអំពាវនាវឱ្យកងទ័ពថៃដែលកំពុងឈរជើងនៅប្រាសាទតាក្របី អនុវត្តការងាររបស់ខ្លួនឱ្យបានត្រឹមត្រូវ និងការទទួសខុសត្រូវស្របតាមកិច្ចព្រមព្រៀងដែលភាគីទាំងពីរបានឯកភាពគ្នា ។
ការលើករបស់ក្រសួងការពារជាតិ បន្ទាប់ពីមានការប៉ះទង្គិចពាក្យសំដីគ្នារវាងកងទ័ពថៃ ជាមួយអ្នកទេសចរកម្ពុជា ពេលចូលទស្សនាប្រាសាទតាក្របី ហើយបង់ក្រមារបស់ខ្មែរ ។
លោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិ នៅយប់ថ្ងៃទី៥ កក្កដា ឆ្នាំ២០២៥បានបញ្ជាក់ជូនសាធារណជនអំពីករណីប៉ះទង្គិចសម្តីគ្នានៅប្រាសាទតាក្របី រឿងបង់.កក្រមា មានទង់ជាតិកម្ពុជា ថានៅថ្ងៃទី០៥ ខែកក្កដា ឆ្នាំ២០២៥ កាលពីវេលាម៉ោង១៦:៣០នាទី ពេលដែលភ្ញៀវទេសចរកម្ពុជា និងថៃ បានចូលទៅទស្សនាប្រាសាទតាក្របី, នៅពេលកំពុងដើរទស្សនា និងថតរូបកម្សាន្តក៏ស្រាប់តែអ្នកទេសចរជនជាតិថៃមកហាមឃាត់អ្នកទេសចរជនជាតិកម្ពុជា មិនឱ្យថតរូបអនុស្សាវរីយ៍ និងបានសម្តែងអាកប្បកិរិយាចង់ប្រើហិ.ង្សាមកលើអ្នកទេសចរកម្ពុជាថែមទៀត ព្រោះថា អ្នកទេសចរកម្ពុជាមានបង់.កក្រមា ដែលមានរចនាប៉ាក់រូបទង់ជាតិកម្ពុជានៅពីលើ ។
អ្នកនាំពាក្យបន្តថា អាកប្បកិរិយារបស់ជនជាតិថៃ និងទាហានថៃដែលមិនស្គាល់ច្បាប់ទម្លាប់ ធ្វើនេះ គឺផ្ទុយស្រឡះទាំងស្រុងពីអ្វីដែលកងកម្លាំងកម្ពុជា និងទាហានថៃ ដែលឈរជើងនៅទីនោះបានដឹង និងព្រមព្រៀងគ្នាកន្លងមក ។
អំឡុងពេលប្រជាពលរដ្ឋទាំងពីរភាគីកំពុងប្រកែកគ្នា ក៏ស្រាប់តែមានទាហានឈុតខ្មៅថៃ៥នាក់ និងទាហានឯកសណ្ឋានប៉ារ៉ាថៃ៥នាក់ បានឡើងមកប្រើពាក្យសម្តីខ្លាំងៗមកលើប្រជាពលរដ្ឋខ្មែរថែមទៀត ហើយក្នុងចំណោមទាហានថៃ ដែលប្រតិកម្មខ្លាំងមកលើប្រជាពលរដ្ឋខ្មែរនោះ គឺជាកម្លាំងដែលមិនមានភារកិច្ចឈរជើងប្រចាំការនៅលើប្រាសាទទេ គឺគ្រាន់តែជួយជូនភ្ញៀវទេសចរជនជាតិថៃឡើងមកប៉ុណ្ណោះ ដោយមិនបានក្តាប់ព័ត៌មានពេញលេញទើបបណ្តាលឱ្យស្ថានភាពកាន់តែតានតឹងឡើង ។
លោកជំទាវអ្នកនាំពាក្យ បានលើកឡើងទៀតថា ដោយឃើញស្ថានការណ៍នៃការប៉ះទង្គិចគ្នានេះ កងទ័ពកម្ពុជាចំនួន១០នាក់ ដែលមានភារកិច្ចឈរជើងការពារ និងសម្របសម្រួលនៅលើប្រាសាទតាក្របី បានធ្វើអន្តរាគមន៍ ដោះស្រាយសម្របសម្រួលភ្លាមៗ និងប្រាប់ទៅទាហានថៃទាំងនោះថា ការលើកឡើងនេះពុំមាននៅក្នុងចំណុចនៃការព្រមព្រៀងគ្នាជាមុនថា មិនឱ្យពាក់ក្រមាមានរូបទង់ជាតិនោះទេ ដូច្នេះពួកគេមិនអាចហាមឃាត់ប្រជាជនខ្មែរបានឡើយ ព្រោះកន្លងមកក៏មានភ្ញៀវទេសចរជនជាតិថៃមកលេងបានស្លៀកសម្លៀកបំពាក់មានរូបទង់ជាតិថៃយ៉ាងគគ្រឹកគគ្រេងផងដែរ ។
លោកជំទាវ បានបន្ថែមថា បន្ទាប់ពីការសម្របសម្រួលសភាពការណ៍ក៏បានស្ងប់ស្ងាត់ទៅវិញនៅវេលាម៉ោង១៦:៥០នាទី ។ លោកជំទាវបានបញ្ជាក់ថា៖«កម្ពុជាអំពាវនាវឱ្យកងទ័ពថៃ ដែលកំពុងឈរជើងនៅប្រាសាទតាក្របី អនុវត្តការងាររបស់ខ្លួនឱ្យបានត្រឹមត្រូវ និងការទទួលខុសត្រូវ ស្របតាមកិច្ចព្រមព្រៀងដែលភាគីទាំងពីរបានឯកភាពគ្នាហើយ» ។
ជាមួយគ្នានោះដែរ អ្នកនាំពាក្យក្រសួងការជាតិបានអះអាងថា កងទ័ពកម្ពុជាដែលកំពុងឈរជើងនៅទីនោះនឹងបន្តអនុវត្តការងារប្រកបដោយភាពអត់ធ្មត់ ការទទួលខុសត្រូវ និងវិជ្ជាជីវៈខ្ពស់ក្នុងគោលបំណងបង្កបរិយាកាសអំណោយផលដល់ការរក្សាសន្តិភាព សន្តិសុខ ស្ថិរភាព និងទំនាក់ទំនងមិត្តជិតខាងល្អនៅតំបន់ប្រាសាទតាក្របី ៕
ចែករំលែកព័តមាននេះ