សហរដ្ឋអាមេរិក ៖ អស់រយៈពេលជាច្រើនឆ្នាំកន្លងមកហើយ ដែលសហរដ្ឋអាមេរិកបានព្រមានប្រទេសដទៃកុំឱ្យទុកចិត្តលើប្រាក់កម្ចីពីបណ្តាធនាគាររដ្ឋចិន។ ប៉ុន្តែរបាយការណ៍ថ្មីមួយបានបង្ហាញពីភាពហួសចិត្ត ដោយបណ្តាក្រុមហ៊ុនអាមេរិកខ្លួនឯង គឺជាអ្នកខ្ចីលុយពីធនាគាររដ្ឋចិនច្រើនជាងគេបំផុតលើពិភពលោក។ យោងរបាយការណ៍ចេញផ្សាយ កាលពីថ្ងៃទី១៨ ខែវិច្ឆិកា…
សហរដ្ឋអាមេរិក ៖ អស់រយៈពេលជាច្រើនឆ្នាំកន្លងមកហើយ ដែលសហរដ្ឋអាមេរិកបានព្រមានប្រទេសដទៃកុំឱ្យទុកចិត្តលើប្រាក់កម្ចីពីបណ្តាធនាគាររដ្ឋចិន។ ប៉ុន្តែរបាយការណ៍ថ្មីមួយបានបង្ហាញពីភាពហួសចិត្ត ដោយបណ្តាក្រុមហ៊ុនអាមេរិកខ្លួនឯង គឺជាអ្នកខ្ចីលុយពីធនាគាររដ្ឋចិនច្រើនជាងគេបំផុតលើពិភពលោក។
យោងរបាយការណ៍ចេញផ្សាយ កាលពីថ្ងៃទី១៨ ខែវិច្ឆិកា ឆ្នាំ២០២៥ ដោយ AidData ដែលជាវិទ្យាស្ថានស្រាវជ្រាវនៅឯសាកលវិទ្យាល័យ William & Mary សហរដ្ឋអាមេរិក បានបង្ហាញថា បណ្តាក្រុមហ៊ុនអាមេរិកបានខ្ចីលុយពីបណ្តាធនាគាររដ្ឋចិនប្រមាណជាង ២០០ពាន់លានដុល្លារអាមេរិក ក្នុងរយៈពេល ២៥ឆ្នាំកន្លងមកនេះ ដែលច្រើនជាងបណ្តាក្រុមហ៊ុនប្រទេសផ្សេងទៀតនៅលើពិភពលោក។ ប៉ុន្តែកម្ចីទាំងនោះ ត្រូវបានខ្ចីដោយសម្ងាត់ និងបានបញ្ជូនទៅតាមរយៈក្រុមហ៊ុនស្រមោលបរទេសនៅឯកោះ Cayman, Bermuda, Delaware និងទីតាំងផ្សេងទៀត ដើម្បីជួយបិទបាំងប្រភពដើម។
ការផ្តល់ប្រាក់កម្ចីភាគច្រើន ដើម្បីជួយដល់បណ្តាក្រុមហ៊ុនចិន សម្រាប់ទិញភាគហ៊ុននៅក្នុងក្រុមហ៊ុនអាមេរិក ភាគច្រើនផ្តោតក្នុងវិស័យបច្ចេកវិទ្យាសំខាន់ៗ និងសន្តិសុខជាតិ រួមទាំង ការផលិតមនុស្សយន្ត ឧបករណ៍អេឡិចត្រូនិក និងបច្ចេកវិទ្យាជីវសាស្ត្រផងដែរ។ជាឧទាហរណ៍ នៅឆ្នាំ ២០១៥ ធនាគាររដ្ឋចិនបានផ្តល់ប្រាក់កម្ចី ១,២ពាន់លានដុល្លារដល់ក្រុមហ៊ុនឯកជនចិនមួយ ដើម្បីទិញភាគហ៊ុន ៨០% នៅក្នុងក្រុមហ៊ុន Ironshore ដែលជាក្រុមហ៊ុនធានារ៉ាប់រងអាមេរិក ហើយអតិថិជននៅទីនោះ រួមមានទាំងបុគ្គលពីទីភ្នាក់ងារស៊ើបការណ៍សម្ងាត់កណ្តាល (CIA) និងការិយាល័យស៊ើបអង្កេតសហព័ន្ធ (FBI)។ លុះក្រោយមក មន្ត្រីអាមេរិកបានដឹងរឿងនេះ ហើយបានបញ្ជាឱ្យលក់ចេញភាគហ៊ុននោះភ្លាមតែម្តង។
នៅឆ្នាំដដែលនោះ រដ្ឋាភិបាលចិនបានបោះពុម្ពផ្សាយផែនការ «ផលិតចិនឆ្នាំ ២០២៥» ឬ «Made in China 2025» ដោយផ្តោតកាន់តែខ្លាំងលើការទិញទ្រព្យសកម្មបច្ចេកវិទ្យាជាន់ខ្ពស់នៅក្រុមហ៊ុនបរទេស។ បន្ទាប់ពីការចេញផ្សាយនោះមក ការផ្តល់ប្រាក់កម្ចីដែលផ្តោតលើវិស័យសំខាន់ៗដូចជា ការផលិតមនុស្សយន្ត ការពារជាតិ បច្ចេកវិទ្យាពហុជំនាញនៃវិទ្យាសាស្ត្រកុំព្យូទ័រ និងជីវបច្ចេកវិទ្យាបានកើនឡើងពី ៤៦% ដល់ ៨៨%។
របាយការណ៍ AidData បានរកឃើញថា ប្រទេសចិនបានផ្តល់ប្រាក់កម្ចីប្រមាណជាង ២ ទ្រីលានដុល្លារ ចាប់ពីឆ្នាំ ២០០០ ដល់ឆ្នាំ ២០២៣ ដល់ប្រទេសចំនួន ២០០ នៅទូទាំងពិភពលោក ពោលកើនឡើងទ្វេដង បើធៀបនឹងការប៉ាន់ប្រមាណពីមុន ដោយមិនត្រឹមតែផ្ដល់ប្រាក់កម្ចីដល់ប្រទេសក្រីក្រប៉ុណ្ណោះទេ ក្នុងរួមទាំងប្រទេសអ្នកមានផងដែរ។ ក្រៅពីអាមេរិក ដែលជាប្រទេសសេដ្ឋកិច្ចធំជាងគេលើពិភពលោកនោះ បណ្តាក្រុមហ៊ុននៅចក្រភពអង់គ្លេសក៏បានខ្ចីលុយធនាគាររដ្ឋចិនប្រហែល ៦០ពាន់លានដុល្លារ និងនៅបណ្តា សហភាពអឺរ៉ុប (EU) ក៏មានចំណែកប្រហែល ១៦១ពាន់លានដុល្លារផងដែរ៕ ប្រភព ៖ CNN, Reuters និង ABC News
ចែករំលែកព័តមាននេះ