ខេត្តពោធិ៍សាត់ ៖ នៅព្រឹកថ្ងៃទី២០ ខែវិច្ឆិកា ឆ្នាំ២០២៥នេះ ទឹកស្ទឹងពោធិ៍សាត់ បានហក់ឡើងខ្លាំងហូរចូលក្នុងបរិវេណសាលាខេត្ត និងចូលលើកោះសំពៅមាស ដែលមិនធ្លាប់មានពីមុនមក ។ …
ខេត្តពោធិ៍សាត់ ៖ នៅព្រឹកថ្ងៃទី២០ ខែវិច្ឆិកា ឆ្នាំ២០២៥នេះ ទឹកស្ទឹងពោធិ៍សាត់ បានហក់ឡើងខ្លាំងហូរចូលក្នុងបរិវេណសាលាខេត្ត និងចូលលើកោះសំពៅមាស ដែលមិនធ្លាប់មានពីមុនមក ។
ស្ថិតក្នុងស្ថានភាពបែបនេះ លោក ខូយ រីដា អភិបាលនៃគណៈអភិបាលខេត្ត បានដឹកនាំកម្លាំងចុះអន្តរាគមន៍តាំងពីរំលងអធ្រាត្រតាមកន្លែងដែលទឹកជំនន់គំរាមកំហែងខ្លាំងលើដងផ្លូវ និងផ្ទះប្រជាពលរដ្ឋដោយបានចលនាច្រកដី និងដីខ្សាច់ទប់ទឹក និងរំដោះប្រជាពលរដ្ឋ សត្វពាហនៈ ទ្រពសម្បត្តិ ទៅដាក់នៅទីទួលសុវត្ថិភាព ។
ទឹកជំនន់នេះ បណ្ដាលមកពីភ្លៀងធ្លាក់ជាប់ៗគ្នានៅប៉ែកខាងលើជួរភ្នំក្រវ៉ាញហូរបុកធ្លាក់ចូលស្ទឹងពោធិ៍សាត់ មកជន់លិចដោយអន្លើ ក្នុងក្រុងពោធិ៍សាត់ និងស្រុកកណ្ដៀង បង្កការលំបាកក្នុងការធ្វើដំណើរលិចស្រែស្រូវផលដំណាំ និងសត្វពាហនៈរបស់ប្រជាពលរដ្ឋ ។
មន្ទីរធនធានទឹក និងឧតុនិយមខេត្តបានប្រកាសថា ស្ថានភាពទឹកស្ទឹងពោធិ៍សាត់ នៅថ្ងៃទី២០ វិច្ឆិកា នេះ ដល់កម្រិតប្រកាសអាសន្នហើយ សូមអាជ្ញាធរគ្រប់លំដាប់ថ្នាក់ និងប្រជាពលរដ្ឋទូទាំងខេត្តពោធិ៍សាត់ ពិសេស ប្រជាពលរដ្ឋរស់នៅតាមដងស្ទឹងត្រូវមានការប្រុងប្រយ័ត្នខ្ពស់ ដើម្បីចៀសវាងនូវគ្រោះថ្នាក់ផ្សេងៗដែលអាចកើតមានជាយថាហេតុ។
ដោយឡែក ស្ថិតក្នុងស្ថានភាពបែបនេះ រដ្ឋបាលខេត្តពោធិ៍សាត់ ក៏បានចេញសេចក្ដីជូនដំណឹងអំពីស្ថានភាពទឹកជំនន់ក្នុងខេត្តពោធិ៍សាត់នេះ ដើម្បីឲ្យប្រជាពលរដ្ឋមានការប្រុងប្រយ័ត្ន និងសូមឲ្យអាជ្ញាធរគ្រប់លំដាប់ថ្នាក់ កងកម្លាំងប្រដាប់អាវុធ មន្ទីរអង្គភាព យកចិត្តទុកដាក់ជួយអន្តរាគមន៍ដល់ប្រជាពលរដ្ឋនៅគ្រប់ទីកន្លែងទាំងអស់ ៕
ចែករំលែកព័តមាននេះ