រាជធានីភ្នំពេញ ៖ ទស្សនិកជន ជាពិសេស បណ្តាអ្នកសិល្បៈជាច្រើន បានសម្តែងក្តីក្តុកក្តួល និងសោកស្តាយស្ទើរទទួលយកមិនបាន បន្ទាប់ពីបានឮដំណឹងមរណភាពរបស់តារាសម្តែងលោក អ៊ុន សុទ្ធា…
រាជធានីភ្នំពេញ ៖ ទស្សនិកជន ជាពិសេស បណ្តាអ្នកសិល្បៈជាច្រើន បានសម្តែងក្តីក្តុកក្តួល និងសោកស្តាយស្ទើរទទួលយកមិនបាន បន្ទាប់ពីបានឮដំណឹងមរណភាពរបស់តារាសម្តែងលោក អ៊ុន សុទ្ធា ខណៈពេលដែលកន្លងមកតារារូបនេះ ហាក់មិនដែលលេចឮថាលោកមានជំងឺអ្វីនោះ
ឡើយ ។
យ៉ាងណា មុនពេលដែលទទួលមរណភាពនាពេលនេះ លោក អ៊ុន សុទ្ធា ធ្លាប់បង្ហើបអំពីស្ថានភាពជំងឺរបស់លោកប្រាប់ទៅដល់មិត្តភក្តិដ៏ជិតស្និទ្ធិរបស់លោកមួយរូប ហើយលោកក៏បានលាក់បាំងពីស្ថានភាពរបស់លោកមិនឲ្យសាធារណជនដឹងឡើយ ។ បើតាមការរៀបរាប់ពីលោក សឿន វីតា ដែលជាមិត្តភក្តិជិតស្និទ្ធិរបស់លោកអ៊ុន សុទ្ធា បានឲ្យដឹងថា ការទទួលមរណភាពរបស់លោក អ៊ុន សុទ្ធា នាពេលនេះ គឺដោយសារជំងឺរលាកក្រពះធ្ងន់ធ្ងរហើយជំងឺនេះក៏ធ្លាប់ធ្វើឲ្យលោកចូលសង្គ្រោះបន្ទាន់ពីរទៅបីលើកហើយដែរ ។
លោកបន្តថា ខ្ញុំចាំបានថា ចន្លោះឆ្នាំ២០២៤ គាត់ (លោក អ៊ុន សុទ្ធា)បានប្រាប់លោកថា គាត់មានជំងឺមួយគឺមានសាច់ដុះប៉ុនចុងចង្កឹះនៅក្នុងថ្លើម ពេលនោះខ្ញុំក៏ប្រាប់គាត់វិញអោយមើលមែនទែន ដោយសារគ្រួសារគាត់ស្លាប់ដោយសារមហារីកថ្លើម ព្រោះខ្លាចមានដំណរពូជហើយធ្លាក់មកដល់រូបគាត់ដែរ ។
មួយទៀត គាត់ធ្លាប់ប្រាប់ដែរថា គាត់មានបញ្ហាក្រពះពោះវៀន ដោយសារគាត់ហូបមិនទៀង និងនៅម្នាក់ឯង ដោយជីវិតរបស់គាត់ គឺគាត់មិនចង់ពឹងពាក់អ្នកណាម្នាក់ឡើយ ប៉ុន្តែគាត់ចូលចិត្តជួយគេ ហេតុនេះគាត់មិនសូវជារវល់រឿងជំងឺនេះដែរ ។
លោកបញ្ជាក់ថា អំឡុងពេលក្រោយមកទៀត គាត់ក៏មានជំងឺស្ត្រេសមួយទៀត ដោយសារបញ្ហាចំណូលរបស់គាត់បានធ្លាក់ចុះ ព្រោះលោកដឹងថា សុទ្ធាគឺមានមុខរបរតែមួយគត់ គឺសិល្បៈនេះ ហើយបើចំណូលមួយនេះធ្លាក់ចុះ គឺគាត់គិតច្រើន ។
លោកថា ជំងឺស្ត្រេសនេះហើយ ដែលធ្វើឲ្យគាត់គេងមិនគ្រប់គ្រាន់ ញាំមិនគ្រប់គ្រាន់ និងមិនទៀងពេល ហើយបញ្ហានេះបានធ្វើឲ្យប៉ះពាល់ដល់សុខភាពរបស់គាត់ ក្នុងពេលដែលបញ្ហាជំងឺនេះក៏កាន់តែខ្លាំងចាប់តាំងពីដើមឆ្នាំ២០២៥ រហូតធ្វើឲ្យគាត់មិនចេញទៅក្រៅ ដោយសំងំតែនៅក្នុងផ្ទះប៉ុណ្ណោះ ។
លោកសឿន វីតា បានលើកឡើងបន្ថែមទៀតថា ចាប់តាំងពីដើមឆ្នាំថ្មីនេះមក ចំណូលរបស់លោក អ៊ុន សុទ្ធា ក៏ចាប់ផ្តើមកាន់តែខើច ជាហេតុធ្វើឲ្យគាត់លែងចង់ជួបមុខអ្នកណាទាំងអស់ បើទោះបីលោកផ្ទាល់ជាមិត្តភក្តិជិតស្និទ្ធិបំផុត ក៏លោក អ៊ុន សុទ្ធា លែងឆ្លើយតបដែរនៅក្នុងរយៈពេលចុងក្រោយនេះ ។
ទោះជាយ៉ាងណា លោកហាក់មិនចម្លែកឡើយ ព្រោះយល់ថា កន្លងមក នៅពេលដែលលោកទាក់ទងទៅលោក អ៊ុន សុទ្ធា ហើយតែមិនឆ្លើយតបនោះ មិនយូរលោក អ៊ុន សុទ្ធា នឹងទាក់ទងមកលោកវិញមិនខាន ប៉ុន្តែពេលនេះរយៈពេល២សប្តាហ៍ លោក អ៊ុន សុទ្ធា មិនទាក់ទងមកលោកវិញសោះ ទើបទទួលដំណឹងលោកបានទទួលមរណភាពនេះតែម្តង ។
បើតាមលោកសឿន វីតា នៅមុនពេលលោក អ៊ុន សុទ្ធា បានទទួលមរណភាពនាពេលនេះ ស្ថានភាពជំងឺរលាកក្រពះរបស់លោកក៏ធ្លាប់ធ្វើទុក្ខខ្លាំងដែរ ហើយក្រុមគ្រួសារក៏បាននាំគាត់ទៅព្យាបាលនៅមន្ទីរពេទ្យរុស្សីផងដែរ ។
លោកថា សម្រាប់ការព្យាបាលនោះ នៅថ្ងៃទី១ ដល់ថ្ងៃទី៣ អាការៈរបស់គាត់រាងធូរស្រាល ប៉ុន្តែចូលដល់ថ្ងៃទី៤ គាត់ចាប់ផ្តើមធ្វើទុក្ខ ហើយពេទ្យក៏រុញគាត់ចូលទៅបន្ទាប់សង្គ្រោះបន្ទាន់ ប៉ុន្តែដោយសារគាត់ទ្រាំលែងបាន និងបុកចូលមកបេះដូង ហើយដាច់ខ្យល់មិនអាចជួយសង្គ្រោះ
បាន ។
យ៉ាងណា សម្រាប់មរណភាពរបស់លោក អ៊ុន សុទ្ធា នាពេលនេះ លោកចាត់ទុកជាការបាត់បង់មិត្តភក្តិ និងបងប្អូនដ៏ល្អបំផុតមួយរូប ព្រោះលោក អ៊ុន សុទ្ធា ជាមនុស្សតែម្នាក់ដែលតែងតែជួយលើកទឹកចិត្ត និងជួយជាថវិកាខ្លះៗមកដល់រូបលោក និងក្រុមគ្រួសារក្នុងអំឡុងពេលដែលលោកធ្លាក់ខ្លួនខ្លាំង ។
គួរបញ្ជាក់ថា តារាសម្តែងលោក អ៊ុន សុទ្ធា បានទទួលមរណភាពកាលពីថ្ងៃទី១៩ ខែវិច្ឆិកា ឆ្នាំ២០២៥ ដោយរោគាពាធ ក្នុងអាយុ៤០ឆ្នាំ ខណៈពេលដែលពិធីបុណ្យសពតារារូបនេះធ្វើឡើងនៅក្នុងគេហដ្ឋានផ្ទះលេខ 1B ផ្លូវលេខ១៧ សង្កាត់កាកាបទី១ ខណ្ឌពោធ៍សែនជ័យ រាជធានីភ្នំពេញ ៕
ចែករំលែកព័តមាននេះ