រាជធានីភ្នំពេញ ៖ អ្នកនាំពាក្យអគ្គស្នងការដ្ឋាននគរបាលជាតិ សូមបដិសេធចំពោះវីដេអូមួយ​ដែលបង្ហាញពីសកម្មភាពសមត្ថកិច្ចបានបំពានលើរូបរាងកាយស្ត្រី​ជាជនសង្ស័យក្នុងករណី​រំដោះអ្នកទោសចេញពីសាលាដំបូងខេត្តស្វាយរៀង ។ នេះបើយោងតាមអគ្គស្នងការដ្ឋាននគរបាលជាតិប្រកាសនាថ្ងៃទី​២០ វិច្ឆិកា ឆ្នាំ​២០២៥ នេះ ។

ផ្អែកតាមការពិនិត្យ និងស្រាវជ្រាវ សមត្ថកិច្ចរកឃើញថា សកម្មភាពនេះ ជាវីដេអូក្លែងក្លាយ​បង្កើតឡើងបច្ចេកវិទ្យាបញ្ញាសប្បនិម្មិត (AI) ដែលបង្កើតឡើងដោយប្រទេសជិតខាង​ក្នុងចេតនាញុះញង់ វាយប្រហាររាជរដ្ឋាភិបាល និងកិត្តិយសនគរបាលជាតិកម្ពុជា ។

ក្នុងន័យនេះ អគ្គស្នងការដ្ឋាននគរបាលជាតិ សូមអំពាវនាវដល់សាធារណជន និងអ្នកប្រើប្រាស់បណ្តាញសង្គម​បញ្ឈប់ការចែកចាយវីដេអូខាងលើនេះ ចៀសវាងនាំឲ្យមានការភាន់ច្រឡំ ដែលធ្វើឲ្យប៉ះពាល់កិត្តិយសនគរបាលជាតិកម្ពុជា ។

អគ្គស្នងការដ្ឋាននគរបាលជាតិ នឹងចាត់វិធានការផ្លូវច្បាប់ ចំពោះបុគ្គលដែលបន្តការចែកចាយវីដេអូក្លែងក្លាយនេះ ។