រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់សាលាក្តីខ្មែរក្រហមចេញ ផ្សាយនៅថ្ងៃទី១៦ សីហា ២០១១ នេះបានឱ្យដឹងថា សវនាការស្តីពីបញ្ហាកាយសម្បទាជនជាប់ចោទក្នុងសំណុំរឿង០០២ អៀង ធីរិទ្ឋ និងនួន ជា នឹងត្រូវចាប់ផ្តើមនៅវេលាម៉ោង៩ព្រឹកថ្ងៃទី២៩ រហូតដល់ថ្ងៃទី៣១សីហា២០១១ខាងមុខ។
រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់សាលាក្តីខ្មែរក្រហមចេញ ផ្សាយនៅថ្ងៃទី១៦ សីហា ២០១១ នេះបានឱ្យដឹងថា សវនាការស្តីពីបញ្ហាកាយសម្បទាជនជាប់ចោទក្នុងសំណុំរឿង០០២ អៀង ធីរិទ្ឋ និងនួន ជា នឹងត្រូវចាប់ផ្តើមនៅវេលាម៉ោង៩ព្រឹកថ្ងៃទី២៩ រហូតដល់ថ្ងៃទី៣១សីហា២០១១ខាងមុខ។
សេចក្តីប្រកាសព័ត៌មានដដែលបានបញ្ជាក់ទៀត ថា ការចូលរួមរបស់សាធារណជន និងប្រព័ន្ធផ្សព្វផ្សាយក្នុងសវនាការនេះ ត្រូវបានរៀបចំឡើងដើម្បីអនុញ្ញាតឱ្យមានការសួរសំណួរដល់អ្នកជំនាញដែលត្រូវបានចាត់តាំង ឡើងគឺលោកសាស្ត្រាចារ្យចន ខាំបែល និងការអំណះអំណាងជំទាស់ផ្សេងៗ ដែលលើកឡើងដោយមេធាវីការពារក្តីអៀង ធីរិទ្ធ និងនួន ជា សហព្រះរាជអាជ្ញា និងដោយសហមេធាវីនាំមុខតំណាងដើមបណ្តឹងរដ្ឋប្បវេណី ទៅលើសេចក្តី សន្និដ្ឋាននៅក្នុងរបាយការណ៍របស់លោកសាស្ត្រាចារ្យខាំបែល ទាក់ទងនឹងជនជាប់ចោទ នួន ជា និងអៀង ធីរិទ្ធ។
លោកសាស្ត្រាចារ្យខាំបែល ត្រូវបានចាត់តាំងដោយអង្គជំនុំជម្រះសាលាដំបូង ដើម្បីធ្វើការវាយតម្លៃអំពីស្ថានភាពសុខភាពរបស់ជនជាប់ចោទទាំងអស់ ដែលតវ៉ាអំពីកាយសម្បទារបស់ខ្លួនក្នុងការចូលរួមសវនាការ ឬលទ្ធភាពអង្គុយ ក្នុងសវនាការរយៈពេលយូរ។ សវនាការទាំងអស់នឹងប្រព្រឹត្តទៅជាសាធាណៈ។
សេចក្តីប្រកាសព័ត៌មានដដែលក៏បានបញ្ជាក់ទៀតថា ព័ត៌មានសម្រាប់សាធារណជន នៅក្នុងសាលសវនាការរបស់សាលាក្តីខ្មែរក្រហមមានកៅអីចំនួន៤៨២ ក្នុងនោះកៅអីចំនួន១៤០ត្រូវបានរក្សាទុកសម្រាប់ដើមបណ្តឹងរដ្ឋប្បវេណីក្នុងសំណុំរឿង០០២ មន្ត្រីការទូត និងតំណាងប្រព័ន្ធផ្សព្វផ្សាយ។ ចំណែកកៅអីដែលនៅសល់ នឹងត្រូវផ្តល់ជូនដល់សាធារណជនទូទៅតាមគោលការណ៍មកមុនបានមុននៅថ្ងៃសវនាការ។
អង្គការក្រៅរដ្ឋាភិបាល សាលារៀន និងស្ថាប័នផ្សេងៗទៀតដែលមានបំណងនាំក្រុមសាធារណជនមកចូលរួមក្នុងសវនាការត្រូវចុះឈ្មោះជាមុន។ អ្នកដែលមានអាយុក្រោម១៦ ឆ្នាំ នឹងមិនត្រូវអនុញ្ញាត ឱ្យចូលក្នុងសាលសវនាការឡើយ ហើយអ្នកដែលមានអាយុចន្លោះពី១៦ ដល់១៨ឆ្នាំអាចចូលបានលុះត្រាតែមានមនុស្សចាស់មកជាមួយ។ សាធារណជនត្រូវតែមានអាកប្បកិរិយាថ្លៃថ្នូរ និងសមរម្យគ្រប់ពេលវេលា និងមានសម្លៀកបំពាក់សមរម្យ។ មិនអនុញ្ញាតឱ្យយកទូរស័ព្ទដៃ ម៉ាស៊ីនថតរូប កុំព្យូទ័រយួរដៃ ឧបករណ៍ថតសំឡេង កាបូបធំៗអាហារ ឬក៏ភេសជ្ជៈចូលក្នុងសាលសវនាការឡើយ ៕
ចែករំលែកព័តមាននេះ