ខេត្តបាត់ដំបង ៖ រឿងរ៉ាវស្នេហាមួយបានក្លាយជារឿងឆ្លងខេត្តយ៉ាងស្មុគស្មាញ រវាងយុវជនឈ្មោះផុន កុសល និងនាងហួរ ចំប៉ា ហើយទីបំផុតយុវជនឈ្មោះផុន កុសល ត្រូវស្លា.ប់ដោយជនដៃដល់វាយផុងលលាដ៍ក្បាល និងអារ.កដៃទាំងសងខាង រួចសពត្រូវបានគេអូសយកទៅប្លុងចោលនៅក្នុងចំការដំឡូងមី ។ ការស្លា.ប់នេះ
ខេត្តបាត់ដំបង ៖ រឿងរ៉ាវស្នេហាមួយបានក្លាយជារឿងឆ្លងខេត្តយ៉ាងស្មុគស្មាញ រវាងយុវជនឈ្មោះផុន កុសល និងនាងហួរ ចំប៉ា ហើយទីបំផុតយុវជនឈ្មោះផុន កុសល ត្រូវស្លាប់ដោយជនដៃដល់វាយផុងលលាដ៍ក្បាល និងអារ.កដៃទាំងសងខាង រួចសពត្រូវបានគេអូសយកទៅប្លុងចោលនៅក្នុងចំការដំឡូងមី ។ ការស្លាប់នេះត្រូវបានគេសង្ស័យថា ជាអំពើប្លន់សម្លាប់យកម៉ូតូ ។ ប៉ុន្តែក្រោយមកបែរជាទាក់ទិនទៅនឹងរឿងគំនុំទៅវិញ ដែលទីបំផុតបុរសចំណាស់ជាឪពុកនាងហួរ ចំប៉ា និងរូបនាងផ្ទាល់ត្រូវបានឃាត់ខ្លួនមួយរយៈ លុះក្រោយមកក៏ត្រូវបានដោះលែងវិញ ។
ការឈានទៅចាប់ខ្លួនឪពុកខាងស្រី ជុំវិញការស្លាប់របស់គូស្នេហ៍នាងចំប៉ាជាកូនស្រីនេះដោយសារតែគាត់បានព្រលយពាក្យ៣ ទៅ៤ថ្ងៃមុនមានការស្លាប់ គឺឱ្យឪពុកម្តាយខាងប្រុសចាំទទួលយកខ្មោចកូនទៅ បើមិនយកកូនស្រីមកឱ្យវិញ ។ ហើយមិនយូរប៉ុន្មានបន្ទាប់ពីមានសម្តីព្រមាននោះ ស្រាប់តែយុវជនផុន កុសល ក៏បានរងគ្រោះដល់អាយុជីវិតមែន ។
តាមប្រភពព័ត៌មានទាក់ទិននឹងរឿងរ៉ាវស្នេហាស្មុគស្មាញនេះត្រូវបានដឹងថា មានករណីសម្លាប់អ្នករត់ម៉ូតូឌុបម្នាក់ដោយការចាក់សម្លាប់ហើយអារ.កដៃទាំងសងខាង និងវាយផុងលលាដ៍ក្បាលពីក្រោយ រួចអូសសពយកទៅចោលក្នុងព្រៃដំឡូងមី នៅក្នុងភូមិអូរដាលើ ឃុំបឹងរាំង ស្រុកកំរៀង ខេត្តបាត់ដំបង កាលពីល្ងាចថ្ងៃទី៦ សីហា ២០១១ វេលាម៉ោង៦ និង៣០នាទី តាមផ្លូវពីផ្សារឡែម ទៅភូមិដូង ព្រំប្រទល់ថៃ ។ ការសម្លាប់នេះ តាមការសន្និដ្ឋានរបស់សមត្ថកិច្ចប៉ូលិស និងប៉េអឹមថា ជារឿងគំនុំ គឺមិនមែនជាអំពើប្លន់នោះទេ ។
លោកប៉ោ វណ្ណៈ មេបញ្ជាការកងរាជអាវុធហត្ថខេត្តបានថ្លែងថា ករណីប្លន់សម្លាប់នេះ គឺជារឿងគំនុំ ទើបលោកឈានទៅដល់ការឃាត់ខ្លួនទៅតាមដីការបស់សាលាដំបូងខេត្តលេខ៤០ អស.២០១១ ដែលចុះហត្ថលេខាដោយលោកនួន សាន ព្រះរាជអាជ្ញា ឱ្យឃាត់ខ្លួនឈ្មោះអៀង ស្រ៊ុន ហៅម៉ាច ភេទប្រុស អាយុ៥២ឆ្នាំ និងកូនស្រីឈ្មោះហួរ ចំប៉ា អាយុ១៩ឆ្នាំ នៅភូមិព្រៃក្តី ឃុំត្រពាំងធំខាងត្បូង ស្រុកត្រាំកក់ ខេត្តតាកែវ ។ ការឃាត់ខ្លួននេះ គឺពាក់ព័ន្ធនឹងការស្លាប់របស់ឈ្មោះផុន កុសល ភេទប្រុស អាយុ២២ឆ្នាំ នៅភូមិពងទឹក ឃុំសំរោង ស្រុកត្រាំកក់ ខេត្តតាកែវ ដែលបានពង្រត់កូនក្រមុំគេឈ្មោះនាង ចំប៉ា ទៅ និងប្រកបរបរជាអ្នករត់ម៉ូតូឌុបនៅស្រុកកំរៀង ខេត្តបាត់ដំបង ។ ការចាប់ឃាត់ខ្លួននេះដែរ ដោយសារមានការពាក់ព័ន្ធទៅនឹងការស្រឡាញ់គ្នាជាមួយកូនស្រីរបស់ឈ្មោះអៀង ស្រ៊ុន ហៅម៉ាច នោះតែម្តង។
ទាក់ទិននឹងករណីនេះ តាមការស៊ើបអង្កេតរបស់កងរាជអាវុធហត្ថស្រុកកំរៀង សហការជាមួយកម្លាំងកងរាជអាវុធហត្ថខេត្តបាត់ដំបង និងកងរាជអាវុធហត្ថខេត្តតាកែវ បានឱ្យដឹងថា ឈ្មោះផុន កុសល ដែលស្លាប់គឺជាអ្នករត់ម៉ូតូឌុបដែលបានពង្រត់កូនស្រីរបស់ឈ្មោះអៀង ស្រ៊ុន ហៅម៉ាច ចេញពីផ្ទះនៅស្រុកត្រាំកក់ អស់រយៈពេលជាងមួយខែ ហើយឈ្មោះម៉ាច ជាឪពុកខាងស្រីបានបោះពាក្យសម្តីថា «បី ឬបួនថ្ងៃទៀតចាំទៅយកខ្មោចកូន មកបូជាផង» ដែលនិយាយមិនទាន់ផុតពីមាត់ផង ក៏ស្រាប់តែឈ្មោះផុន កុសល ស្លាប់មែន ។ ការបោះពាក្យសម្តីនេះគឺឈ្មោះម៉ាចក៏បានសារភាពនៅទីបញ្ជាការកងរាជអាវុធហត្ថខេត្តតាកែវដែរ តែឈ្មោះម៉ាចនិយាយថា «គាត់ខឹងខ្លាំងពេក ទើបប្រើពាក្យសម្តីរបៀបនេះ ក្រោយមកក៏ចំពេលមានចោរប្លន់ម៉ូតូឌុបឈ្មោះផុន កុសល ហើយចាក់សម្លាប់គេតែម្តង ។ ចំណុចនេះគឺដោយសាររូបគាត់និយាយមិនបានគិតមុខគិតក្រោយជាសម្តីជាន់ដានចោរ ។
ទោះជាយ៉ាងណា ក្រោយពីការនាំខ្លួនចូលទៅក្នុងសវនាការសួរចម្លើយរួចមក នៅជុំវិញ ការស្លាប់នេះ សមត្ថកិច្ចកងរាជអាវុធហត្ថខេត្តបាត់ដំបងបានពិនិត្យទៅឃើញពុំមានពាក់ព័ន្ធទៅនឹងឈ្មោះអៀង ស្រ៊ុន ហៅម៉ាចនេះទេ ទើបសាលាដំបូងខេត្តបាត់ដំបងបានលើកលែងការចោទប្រកាន់ឈ្មោះម៉ាច និងកូនស្រីឱ្យនៅក្រៅឃុំជាបណ្តោះអាសន្នសិន ហើយកងរាជអាវុធហត្ថខេត្តបាត់ដំបង និងខេត្តតាកែវ សហការគ្នាស្រាវជ្រាវបន្ត ដើម្បីវែកមុខឃាតកឱ្យទាល់តែឃើញថា តើឃាតកនោះជាអ្នកណា? ចំពោះសពយុវជនផុន កុសល ក្រោយពីត្រូវឃាតកសម្លាប់ក៏ត្រូវបានក្រុមគ្រួសារ និងសង្សារឈ្មោះហួរ ចំប៉ា ដឹកមកបូជានៅភូមិពងទឹក ឃុំសំរោង ស្រុកត្រាំកក់ ខេត្តតាកែវ ដែលជាទីលំនៅរបស់សព ។
តាមឪពុករបស់សពផុន កុសល គឺលោកសុខ ជៀប អាយុ៥០ឆ្នាំ នៅភូមិពងទឹក ឃុំសំរោង ស្រុកត្រាំកក់ ខេត្តតាកែវ បាននិយាយថា កូនប្រុសគាត់ឈ្មោះផុន កុសល បានស្រឡាញ់នាងហួរ ចំប៉ា មានរយៈ ពេល៣ ទៅបួនឆ្នាំហើយ ហើយគាត់បានទៅស្តីដណ្តឹងតាមប្រពៃណីដែរ តែឪពុកម្តាយខាងស្រី គេបង្គាប់ដល់ទៅ៥.០០០ដុល្លារ ។ ដោយសារគាត់គ្មានលុយកាក់ចេះតែសំងំស្ងៀមរហូតដល់ពួកគេទាំងពីរនាក់នាំគ្នារត់ទៅរកស៊ីនៅស្រុកកំរៀងអស់រយៈពេលជាងមួយខែ ស្រាប់តែទទួលដំណឹងថា ចោរប្លន់យកម៉ូតូ ហើយចាក់សម្លាប់កូនគាត់ ។ ទោះបីជាបែបណា ស្របពេលដែលឪពុកខាងស្រីបោះពាក្យសម្តីថា «ពីរបីថ្ងៃទៀត ឱ្យពួកគាត់ជាឪពុកម្តាយទៅយកខ្មោចកូនមកដុត» ទើបមានការសង្ស័យ ។
ចំណែកលោកស្រីជៀម ហួន ជាម្តាយសពយុវជនផុន កុសល បានបន្តថា កន្លងមកគឺមានរឿងទាស់ទែងគ្នារហូតដល់ឪពុកខាងស្រីមកវាយតប់ពួកគាត់ដល់ផ្ទះ ហើយមានការប្តឹងប្តល់គ្នាទៅប៉ុសិ៍្តរដ្ឋបាលឃុំសំរោង ម្តងរួចមកហើយ ដោយឪពុកខាងស្រីបានសងជំងឺចិត្តដល់ខាងគាត់ចំនួន៤០ម៉ឺនរៀលថែមទៀតផង ។
គ្រួសារសពនៅតែសំណូមពរដល់សមត្ថកិច្ច ខេត្តបាត់ដំបង និងខេត្តតាកែវ សូមជួយវែកមុខ រកឃាតកដែលបានសម្លាប់កូនរបស់គាត់យ៉ាងព្រៃផ្សៃឱ្យឃើញផង និងសូមឱ្យព្រលឹងកូនរបស់គាត់ជួយបំភ្លឺផ្លូវជួយបង្ហាញសមត្ថកិច្ចឱ្យឆាប់វែកមុខរកឃាតកយកមកកាត់ទោសតាមផ្លូវច្បាប់ ៕
ចែករំលែកព័តមាននេះ