នាវាទេសចរណ៍ខ្នាតយក្ស «Odyssey» បានធ្វើដំណើរចាកចេញពីកម្ពុជាហើយ ក្រោយជួបវិបត្តិប្រេងឡើងថ្លៃ ជាប់គាំងនៅកំពង់ផែក្រុងព្រះសីហនុ អស់ច្រើនថ្ងៃ
- ព្រះសីហនុ
ខេត្តព្រះសីហនុ ៖ នាវាទេសចរណ៍អន្តរជាតិ «Odyssey» ខ្នាតយក្ស ដែលជាប់គាំងនៅកំពង់ផែក្រុងព្រះសីហនុ អស់រយៈពេលជាច្រើនថ្ងៃ ក្រោយជួបវិបត្តិប្រេងឡើងថ្លៃ ពេលនេះបានធ្វើដំណើរចាកចេញពីកំពង់ផែស្វយ័ត ខេត្តព្រះសីហនុ ហើយ កាលពីព្រឹកថ្ងៃទី ៤ វិច្ឆិកា ឆ្នាំ២០២៦នេះ ។ គួររំលឹកថា នាវាទេសចរណ៍ខ្នាតយក្ស ជាប់គាំងនៅក្រុងព្រះសីហនុ ដោយសារវិប.ត្តិប្រេង
មន្ត្រីនគរបាលអន្តោប្រវេសន៍ច្រកទ្វារកំពង់ផែស្វយ័ត ខេត្តព្រះសីហនុ បានឲ្យដឹងនាព្រឹកថ្ងៃទី៤ ខែ វិច្ឆិកា ឆ្នាំ ២០២៦ នេះថា បច្ចុប្បន្នភាពជុំវិញនាវាទេសចរណ៍អន្តរជាតិ Odyssey ខ្នាតយក្ស ដែលជាកម្មសិទ្ធិរបស់ក្រុមហ៊ុន Villa Vie Residences ដែលមានប្រវែងប្រហែល ២០០ម៉ែត្រ និងបានដឹកអ្នកដំណើរប្រមាណជាង ២០០នាក់ (ភាគច្រើនជាជនជាតិអាមេរិក) ព្រមទាំងបុគ្គលិកបម្រើការចំនួន ១៥៦នាក់ ធ្វើដំណើរមកពីប្រទេសថៃ បានចូលចតនៅកំពង់ផែអន្តរជាតិក្រុងព្រះសីហនុ កាលពីថ្ងៃទី២៣ ខែតុលា ឆ្នាំ២០២៦ បន្ទាប់ពីបានចេញដំណើរពីប្រទេសអៀរឡង់ខាងជើងតាំងពីខែតុលា ឆ្នាំ២០២៤ ក្នុងគោលដៅធ្វើដំណើរជុំវិញពិភពលោក រយៈពេលជាង ៣ឆ្នាំ។
ការចូលចតដោយអាក់ខានធ្វើដំណើរជាបណ្តោះអាសន្ននេះ គឺបណ្តាលមកពីកត្តា២សំខាន់ៗ៖
១-បញ្ហាប្រេងឥន្ធនៈឡើងថ្លៃ ៖ នាវា (Villa Vie Residences) បានជួបប្រទះការឡើងថ្លៃប្រេងឥន្ធនៈយ៉ាងគំហុក។
២-បញ្ហាហិរញ្ញវត្ថុ ៖ ក្រុមហ៊ុនខ្វះថវិកាបន្តដំណើរការ និងការគ្រប់គ្រង ដែលធ្វើឱ្យដំណើរនាវាជុំវិញពិភពលោកត្រូវរាំងស្ទះទើបសម្រេចចិត្តចូលចតនៅកំពង់ផែស្វ័យតខេត្តព្រះសីហនុ នៃព្រះរាជាណាចក្រកម្ពុជា។
សូមរំលឹកឡើងវិញថា ជុំវិញបញ្ហាជាប់គាំងនាវាទេសចរណ៍ខ្នាតយក្សខាងលើនេះ កាលពី ព្រឹកថ្ងៃទី២៩ ខែតុលា ឆ្នាំ២០២៦ កន្លងមកនេះ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានចុះផ្ទាល់ទៅពិនិត្យមើលស្ថានភាពនាវាទេសចរណ៍អន្តរជាតិ Odyssey នេះផងដែរ។
មន្ត្រីកម្ពុជាបានបញ្ជាក់ថា នាវានេះគ្រោងនឹងបំពេញប្រេងឥន្ធនៈដោយមានការសម្របសម្រួលពីក្រុមហ៊ុនជាដៃគូ ដើម្បីធ្វើដំណើរចាកចេញទៅវិញ ខណៈដែលអ្នកដំណើរភាគច្រើនកំពុងជួបប្រទះការលំបាក និងត្រូវស្វែងរកមធ្យោបាយធ្វើដំណើរត្រឡប់ស្រុកកំណើតវិញ.។ ចំណែកឯអាជ្ញាធរ និងស្ថាប័នពាក់ព័ន្ធរបស់កម្ពុជា កំពុងជួយអន្តរាគមន៍តាមដានយ៉ាងដិតដល់ និងជួយសម្រួលដល់ស្ថានភាពបច្ចុប្បន្នរហូតទទួលបានការជួយសម្របសម្រួលពីក្រុមហ៊ុនជាដៃគូ ក្នុងការចាក់ប្រេងឥន្ទនៈបំពេញសម្រាប់ក្នុងការធ្វើដំណើរមាតុភូមិនិវត្តន៍ចាកចេញពីព្រះរាជាណាចក្រកម្ពុជា ហើយនៅវេលាម៉ោង១២និង៣០នាទីឈានចូលថ្ងៃទី៤ ខែ វិច្ឆិកា ឆ្នាំ ២០២៦ នាវាបានចាកចេញឆ្ពោះទៅសមុទ្រអន្តរជាតិ ដោយក្តីរំភើប និងអាឡោះអាល័យនៅក្នុងបេះដូងជាពន់ពេក នៅក្នុងរយៈពេលនៃការស្នាក់នៅរបស់ពួកគាត់ ដែលទទួលបានការយកចិត្តទុកដាក់ និងផ្តល់ភាពកក់ក្តៅក្រៃលែងពីសំណាក់ថ្នាក់ដឹកនាំគ្រប់លំដាប់ថ្នាក់ដូចជាពិសារអាហារសាមគ្គី និងបានផ្តល់វត្ថុអនុស្សាវរីយ៍ដែលជាស្នាដៃរបស់កូនខ្មែរផងដែរ.៕
ចែករំលែកព័តមាននេះ