កម្មករសំណង់ម្នាក់ត្អូញប្រាប់ថា ចេះតែចុកទ្រូង លុះព្រឹកឡើងមិត្តរួមការងារទៅដាស ផ្អើលយ៉ាងរន្ធ.ត់
- ភ្នំពេញ
រាជធានីភ្នំពេញ ៖ បុរសជាកម្មករសំណង់ម្នាក់បានត្អូញត្អែរប្រាប់មិត្តភក្ដិរួមការងារប៉ុន្មានថ្ងៃមកនេះថា គាត់ចេះតែមានអាការៈចុកណែនទ្រូង ប៉ុន្តែពុំបានទៅពិគ្រោះជំងឺជាមួយគ្រូពេទ្យដើម្បីព្យាបាលជំងឺនេះទេ ។ គាត់នៅតែធ្វើការជាធម្មតា ទីបំផុតក៏ដេកស្លាប់ ប៉ុន្តែភ្លាមៗនោះគ្មាននរណាបានដឹងថាគាត់ស្លាប់នោះឡើយ រហូតមិត្តភក្ដិឃើញគាត់ដេកយូរពេក ចូលទៅដាសឲ្យក្រោកទៅធ្វើការ ទើបដឹងថាគាត់ស្លាប់បាត់ទៅហើយ ។
ហេតុការខាងលើនោះបានកើតឡើង កាលពីវេលាម៉ោង៩ព្រឹកថ្ងៃទី០៤ ខែវិច្ឆិកា ឆ្នាំ២០២៦ នៅក្នុងរោងកម្មករស្នាក់ ស្ថិតនៅក្នុងការដ្ឋានសំណងផ្ទះល្វែងក្រុមហ៊ុនមួយកន្លែង នៅតាមផ្លូវបេតុងភូមិត្រពាំងសាលា សង្កាត់ពងទឹក ខណ្ឌដង្កោ រាជធានីភ្នំពេញ ។
បុរសរងគ្រោះរូបនោះឈ្មោះ ថៃ និន អាយុ៤៤ឆ្នាំ មុខរបរកម្មករសំណង់ ទីលំនៅភូមិត្រពាំងគុយ ឃុំល្បើក ស្រុកឈូក ខេត្តកំពត និងស្នាក់នៅកន្លែងកើតហេតុខាងលើ ។
បើតាមបុរសម្នាក់ឈ្មោះ ឃន សុខស៊ីវត្ថិ អាយុ២៩ឆ្នាំ ជាកម្មកររួមការងារជាមួយជនរងគ្រោះបានបំភ្លឺប្រាប់សមត្ថកិច្ចថា កន្លងមករូបគាត់រួមជាមួយបុរសឈ្មោះ ថៃ និន(ជនរងគ្រោះ) ព្រមទាំងមិត្តភក្ដិរួមការងារមួយចំនួនទៀតតែងតែផឹកស្រាថ្នាំជុំគ្នាក្រោយពេលចប់ម៉ោងការងារ ។
ដោយឡែកមួយរយៈចុងក្រោយនេះបុរសរងគ្រោះចេះតែនិយាយត្អូញត្អែរថា «មានអាការៈចុកណែនដើមទ្រូងសង្ស័យលើសជាតិខ្លាញ់» ប៉ុន្តែមិនបានទៅមន្ទីរពេទ្យពិនិត្យសុខភាពនោះឡើយ ។
បុរសខាងលើបាននិយាយបន្តទៀតថា រហូតដល់វេលាល្ងាចថ្ងៃទី០៣ ខែវិច្ឆិកា ឆ្នាំ២០២៦ គាត់និងជនរងគ្រោះ ព្រមទាំងមិត្តភក្ដិ២នាក់ទៀតបានចេញពីធ្វើការ រួចទិញស្រាថ្នាំមកផឹកជាមួយគ្នាដូចពេលមុនៗទៀត។ ក្រោយផឹករួចក៏បែកគ្នាចូលទៅក្នុងបន្ទប់រៀងៗខ្លួន លុះដល់វេលាព្រឹកថ្ងៃទី០៤ ខែតុលា ឆ្នាំ២០២៦ ដោយឃើញលោកថៃ និន ដេកយូរពេកអត់ក្រោករៀបចំខ្លួនទៅធ្វើការ គាត់ក៏បានទៅដាស ។ ទើបដឹងថាស្លាប់បាត់ទៅហើយ ពុំដឹងស្លាប់តាំងពីពេលណានោះទេ ទើបគាត់ស្រែកប្រាប់អ្នកជិតខាងបង្កឲ្យមានការភ្ញាក់ផ្អើល រួចរាយការណ៍ប្រាប់សមត្ថកិច្ចតែម្ដង ។
សមត្ថកិច្ចបានប្រាប់ថា ក្រោយពេលទទួលបានដំណឹងថាមានអ្នកស្លាប់ កម្លាំងនគរបាលប៉ុស្តិ៍ពងទឹក និងនគរបាលខណ្ឌដង្កោបានចុះទៅពិត្យកន្លែងកើតហេតុ ។ បន្ទាប់មករាយការបន្តទៅកាន់នគរបាលការិយល័យបច្ចេកទេសនិងវិទ្យាសាស្ត្រ នៃស្នងការដ្ឋាននគរបាលរាជធានីភ្នំពេញ ព្រមទាំងឯកឧត្តមវេជ្ជបណ្ឌិត ជាង រ៉េន គ្រូពេទ្យកោសល្យវិច័យអមតុលាការរាជធានីភ្នំពេញ ចុះទៅធ្វើកោសល្យវិច័យ ។ ជាលទ្ធផលសន្និដ្ឋានថា បុរសរងគ្រោះស្លាប់ដោយសារគាំងបេះដូង អាចបណ្ដាលមកពីជំងឺបេះដូង ។ បន្ទាប់មកប្រគល់សពជូនក្រុមគ្រួសារនាំយកទៅធ្វើបុណ្យតាមប្រពៃណី ៕
ចែករំលែកព័តមាននេះ