បញ្ជាការដ្ឋានតំបន់ប្រតិបត្តិការសឹងរងខេត្តកោះកុង ប្រារព្ធពិធីសំណេះសំណាលជាមួយពលរដ្ឋស្ម័គ្រចិត្ត ចូលបំពេញកាតព្វកិច្ចយោធា ចំនួន៩០រូប
- កោះកុង
ខេត្តកោះកុង ៖ ពិធីសំណេះសំណាលជាមួយបងប្អូនប្រជាពលរដ្ឋ ដែលជាយុវជនស្ម័គ្រចិត្តចូលបំពេញកាតព្វកិច្ចយោធាចំនួន ៩០នាក់ មុនពេលចេញដំណើរទៅពិនិត្យកាយសម្បទា និងហ្វឹកហ្វឺននៅសាលាទ័ពពិសេសឱរ៉ាល់ ដែលបានប្រារព្ធឡើងនៅបញ្ជាការដ្ឋានតំបន់ប្រតិបត្តិការសឹងរងខេត្តកោះកុង ។
ក្រោមអធិបតីភាពដ៏ខ្ពង់ខ្ពស់របស់ លោកជំទាវ ឈី វ៉ា អភិបាល នៃគណៈអភិបាលខេត្តកោះកុង នាព្រឹក ថ្ងៃទី៤ ខែវិច្ឆិកា ឆ្នាំ២០២៦ នេះ គឺជាព្រឹត្តិការណ៍ដ៏មានអត្ថន័យជ្រាលជ្រៅ បង្ហាញឱ្យឃើញពីស្មារតីស្នេហាជាតិ និងការចូលរួមចំណែកយ៉ាងសកម្មពីសំណាក់យុវជនជំនាន់ក្រោយ ។
លោកជំទាវ ឈី វ៉ា បានមានប្រសាសន៍សំណេះសំណាល សាកសួរសុខទុក្ខ និងថ្លែងការកោតសរសើរយ៉ាងក្លៀវក្លាបំផុតចំពោះយុវជនស្ម័គ្រចិត្តទាំង ៩០រូប ការសម្រេចចិត្តចូលរួមបំពេញកាតព្វកិច្ចយោធារបស់យុវជននាពេលនេះ គឺជាការបង្ហាញនូវ ស្មារតីទទួលខុសត្រូវខ្ពស់ចំពោះសង្គមជាតិ ។
រដ្ឋបាលខេត្តកោះកុង ក៏សូមថ្លែងអំណរគុណយ៉ាងជ្រាលជ្រៅ ចំពោះមន្ត្រីក្នុងយន្តការកាតព្វកិច្ចយោធា អាជ្ញាធរគ្រប់ លំដាប់ថ្នាក់ មន្ទីរ អង្គភាពពាក់ព័ន្ធ និងអាណាព្យាបាល ទាំងអស់ ដែលបានខិតខំសហការគ្នា សម្របសម្រួល ផ្សព្វផ្សាយ និងជំរុញការចុះឈ្មោះយុវជនដែលគ្រប់អាយុ តាមច្បាប់កំណត់ឱ្យចូលរួមបំពេញកាតព្វកិច្ចយោធា ៕
ចែករំលែកព័តមាននេះ