ផ្ទះ១ខ្នង នៅក្រុងសៀមរាប ត្រូវអគ្គិភ័យឆេះអស់ទាំងស្រុង កាលពីព្រឹកមិញ
- សៀមរាប
ខេត្តសៀមរាប ៖ មានករណីអគ្គិភ័យឆាបឆេះផ្ទះ១ខ្នង បង្កការភ្ញាក់ផ្អើលដល់អ្នកជិតខាង រហូតដល់សមត្ថកិច្ច និងអាជ្ញាធរមូលដ្ឋាន សំណាងល្អ គ្មានគ្រោះថ្នាក់ដល់អាយុជីវិត និងឆ្លងរាលដាលដល់ផ្ទះអ្នកជិតខាងឡើយ ។
ហេតុការណ៍ឆេះផ្ទះពលរដ្ឋនោះបានកើតឡើងនៅវេលាម៉ោង៦និង៣០នាទីព្រឹកថ្ងៃទី៤ ខែវិច្ឆិកា ឆ្នាំ ២០២៦ ស្ថិតនៅក្រុមទី៨ ភូមិបន្ទាយចាស់ សង្កាត់ស្លក្រាម ក្រុងសៀមរាប ខេត្តសៀមរាប ។
បើតាមប្រភពពីមន្ត្រីអាជ្ញាធរមូលដ្ឋាន បានប្រាប់ភ្នាក់ងារកោះសន្តិភាពនៅវេលាម៉ោងប្រមាណ ៩ និង ៥០ នាទីព្រឹក ថ្ងៃទី៤ ខែវិច្ឆិកា ឆ្នាំ២០២៦ នេះថា មានករណីអគ្គីភ័យបានឆាបឆះលំនៅដ្ឋានប្រជាពលរដ្ឋមួយកន្លែង ដែលមានម្ចាស់ផ្ទះឈ្មោះ ស៊ាន ស៊ុនសុខជាតិ ភេទស្រី អាយុ៥៥ មុខរបរលក់នំប៉័ង បច្ចុប្បន្នស្ថិតនៅក្រុមទី៨ ភូមិបន្ទាយចាស់ សង្កាត់ស្លក្រាម ក្រុងសៀមរាប ខេត្តសៀម រាប មានសមាជិកគ្រួសារស្នាក់នៅក្នុងបន្ទុកសរុបចំនួន៧នាក់ (ស្រី៥នាក់) កូនស្រី២នាក់ ចៅស្រី ២នាក់ ប្អូនប្រុស២នាក់ ។
ប្រភពបន្ថែមថា ករណីឆេះផ្ទះនេះ ធ្វើពីផ្ទះថ្មក្រោម ឈើលើ មានទំហំ ៦.៥០ម៉ែត្រ x ៨ម៉ែត្រ មាន គ្រែ៤, ពូក២, ចង្ក្រានហ្គាស២គ្រឿង, ទូដាក់ខោអាវចំនួន៤, តុដែក៤, តុឈើ១, កៅអីជ័រ៥ និងសម្ភារប្រើប្រាស់មួយចំនួនទៀត ត្រូវបានអគ្គិភ័យឆាបឆេះផ្ទះអស់ទាំងស្រុង។
មូលហេតុ តាមការបញ្ជាក់ពីម្ចាស់ផ្ទះខាងលើ បង្កឡើងដោយឆ្លងចរន្តអគ្គិសនី បង្កើតបានទៅជាអគ្គិភ័យឆាបឆេះ មកពីជាន់ខាងលើ (ផ្ទះឈើ )។
តាមប្រភពពីមន្ត្រីមូលដ្ឋានបានបញ្ជាក់ថា ក្នុងករណីឆេះនោះដែរ ដោយមានការសហការគ្នាល្អ រវាងអង្គភាពនគរបាលបង្ការ និងពន្លត់អគ្គិភ័យនៃស្នងការដ្ឋាននគរបាលខេត្តសៀមរាប បានប្រើឡានទឹកអស់ចំនួន ៧ គ្រឿង ប្រើប្រាស់ ទឹកអស់ចំនួន៣រថយន្ត រថយន្តពន្លត់អគ្គិភ័យរបស់ កងរាជអាវុធហត្ថខេត្តសៀមរាប ចំនួន ១ រថយន្ត អាជ្ញាធរជាតិអប្សរាចំនួន ៣ រថយន្ត-អគ្គិភ័យបានពន្លត់ចប់សព្វគ្រប់នៅវេលាម៉ោង៨ព្រឹកថ្ងៃខែឆ្នាំដដែល។
បច្ចុប្បន្ន ផ្ទះប្រជាពលរដ្ឋដែលត្រូវបានអគ្គិភ័យឆាបឆេះអស់ទាំងស្រុងនោះ បើគិតជាទឹកប្រាក់ប្រមាណជាង ៥ពាន់ដុល្លារ ៕
ចែករំលែកព័តមាននេះ