នាវាទេសចរណ៍ខ្នាតយក្ស ជាប់គាំងនៅក្រុងព្រះសីហនុ ដោយសារវិប.ត្តិប្រេង
- ព្រះសីហនុ
ខេត្តព្រះសីហនុ ៖ មន្ត្រីនគរបាលអន្តោប្រវេសន៍ច្រកទ្វារកំពង់ផែស្វយ័តក្រុងព្រះសីហនុ បានឲ្យដឹងថា នាវាទេសចរណ៍ឈ្មោះ Villa Vie Odyssey សញ្ជាតិ BAHAMA ដែលបានចូលសំចតនៅវេលាម៉ោង១៥និង៥០នាទី ថ្ងៃទី២៣ ខែតុលា ឆ្នាំ២០២៦ ។ នាវានេះបានដឹកភ្ញៀវទេសចរចំនួន២០៣នាក់ ក្នុងនោះ(ស្រី១១៦នាក់) មាន១៥សញ្ជាតិ និងមាននាវឹកសរុបចំនួន១៥៦នាក់ ក្នុងនោះ(នាវឹកស្រីចំនួន១២នាក់) មាន១៦សញ្ជាតិ ។
តាមការគ្រោងទុកនាវាទេសចរណ៍នេះដឹកភ្ញៀវមកពីប្រទេសថៃ បានចូលមកព្រះរាជាណាចក្រកម្ពុជា និងចេញដំណើរបន្តទៅប្រទេសវៀតណាម ប៉ុន្តែដោយសារនាវាអស់ប្រេងសម្រាប់ប្រតិបត្តិការ មិនមានប្រាក់ទិញប្រេងឥន្ធនៈចាក់បន្ថែម ទើបមិនអាចបន្តដំណើរចាកចេញពីកំពង់ផែស្វយ័តខេត្តព្រះសីហនុឆ្ពោះទៅប្រទេសវៀតណាមបាន ហើយភ្ញៀវទេសចរ ដែលនៅលើនាវានេះ ក៏បានចាកចេញដើម្បីរកកន្លែងស្នាក់នៅជាបណ្តោះអាសន្ន តាមការចង្អុលបង្ហាញពីរដ្ឋបាលខេត្តព្រះសីហនុ ។ ក្នុងនោះភ្ញៀវទេសចរមួយចំនួនបានធ្វើដំណើរទៅលេងខេត្តសៀមរាបនិងមួយចំនួនបានស្នាក់នៅសណ្ឋាគារឯករាជ្យ ក្នុងក្រុងព្រះសីហនុ ។
ការចូលចតរបស់នាវាខាងលើ ហើយជាប់គាំងមិនអាចបន្តដំណើរទៅមុខបាន ទើបនៅព្រឹកថ្ងៃទី២៩ ខែតុលា ឆ្នាំ២០២៦ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងប្រតិភូអមដំណើរបានអញ្ជើញចុះត្រួតពិនិត្យលើនាវាទេសចរណ៍ និងបានជួបសំណេះសំណាលសាកសួរសុខទុក្ខជាមួយកាពីទែននាវាពីបញ្ហាដែលបានជួបប្រទះ ដោយឯកឧត្តមរដ្ឋមន្ត្រីបានផ្តល់ភាពកក់ក្តៅជួបជាមួយភ្ញៀវទេសចរ ដោយបានបំពាក់ក្រមាជាវត្ថុអនុស្សាវរីយ៍ ដល់អ្នកទេសចរទាំងអស់ ដែលបានបង្ហាញពីបេះដូងកម្ពុជាធំធេង មិនអាចកាត់ថ្លៃបានឡើយ ទោះបីប្រទេសតូចក្តី ។ ដើម្បីជាការផ្តល់ភាពកក់ក្តៅដោយបានប្រគល់កន្សែងវត្ថុអនុស្សាវរីយ៍ស្នាដៃកូនខ្មែរជូនដល់កាពីទែនដែលនៅប្រចាំការនៅលើនាវាផងដែរ ។
អ្នកដំណើរតាមនាវានេះជាអ្នកស្នាក់នៅអចិន្ត្រៃយ៍លើនាវាអ្នកទេសចរលើនាវាទេសចរណ៍លំដាប់ប្រណីតឈ្មោះ Villa Vie Odyssey បានបង្ខំចិត្តចុះចេញពីនាវា ដែលជាប់គាំងនៅកំពង់ផែក្នុងក្រុងព្រះសីហនុ ប្រទេសកម្ពុជា បន្ទាប់ពីក្រុមហ៊ុនប្រតិបត្តិការនាវាមួយគ្រឿងនេះ បានប្រកាសផ្អាកដំណើរការភ្លាមៗ ដោយសារតែប្រេងឥន្ធនៈឡើងថ្លៃ ។ នេះបើយោងតាមការចេញផ្សាយពី AFP, Reuters និង BBC កាលពីថ្ងៃទី២៨ ខែតុលា ។
ក្រុមហ៊ុន Villa Vie Residences មានមូលដ្ឋាននៅសហរដ្ឋអាមេរិក ដែលដំណើរការនាវា Odyssey បានប្រកាសផ្អាកប្រតិបត្តិការនាវានេះ នៅកម្ពុជា កាលពីថ្ងៃទី២៧ ខែតុលា ២០២៦ ដោយសម្អាងលើការកើនឡើងយ៉ាងគំហុកខុសពីធម្មតានៃតម្លៃប្រេងឥន្ធនៈ ដែលបណ្តាលមកពីផលវិបាកនៃសង្គ្រាមរវាងសហរដ្ឋអាមេរិក-អ៊ីស្រាអែល ជាមួយនឹងអ៊ីរ៉ង់ ។
ក្រុមហ៊ុនបានប្រកាសនៅក្នុងសេចក្តីថ្លែងការណ៍ ថា ការចំណាយលើប្រេងឥន្ធនៈប្រចាំខែគិតក្នុងមួយបន្ទប់ បានកើនឡើងពីតម្លៃជាមធ្យម១ ៨០០ដុល្លារអាមេរិក ទៅដល់ចន្លោះពី៦ ០០០ ទៅ៨ ០០០ដុល្លារអាមេរិកក្នុងមួយខែក្នុងតំបន់ខ្លះនៃទ្វីបអាស៊ី ។ តាមរយៈការឡើងថ្លៃប្រេងយ៉ាងគំហុកបែបនេះ បានដាក់សម្ពាធហិរញ្ញវត្ថុយ៉ាងខ្លាំងដល់ក្រុមហ៊ុនប្រតិបត្តិការរបស់នាវាទេសចរណ៍នេះ ។
ក្រុមហ៊ុនបានឱ្យអ្នកដំណើរទាំងអស់ចុះពីនាវា ខណៈដែលសេចក្តីរាយការណ៍បានឱ្យដឹងថា អ្នកស្នាក់នៅលើនាវាត្រូវបានផ្តល់ពេលត្រឹមតែ៧ម៉ោងប៉ុណ្ណោះ ដើម្បីរៀបចំវ៉ាលី និងចាកចេញ ។ ក្រុមហ៊ុនមិនបានឆ្លើយតបនឹងសំណើសុំការអត្ថាធិប្បាយពី AFP បានទេ ប៉ុន្តែបានបញ្ជាក់ក្នុងសេចក្តីថ្លែងការណ៍របស់ខ្លួនថា ខ្លួនកំពុងតែធ្វើការជាមួយអ្នកដំណើរ ដើម្បីសម្របសម្រួលការចុះចាកពីនាវា និងស្វែងរកកន្លែងស្នាក់នៅបណ្តោះអាសន្ន ។
ក្រុមហ៊ុនបន្ថែមថា ការផ្ទេរចំណាយដែលកើនឡើងទាំងស្រុងទៅឱ្យអ្នករស់នៅលើនាវា មិនមែនជាដំណោះស្រាយដែលអាចអនុវត្តបាននោះទេ ។ បច្ចុប្បន្ន ខ្លួនផ្តោតលើការជួយគាំទ្រអ្នករស់នៅលើនាវា សមាជិកនាវឹក និងបុគ្គលិក ខណៈពេលដែលកំពុងធ្វើការរៀបចំរចនាសម្ព័ន្ធអាជីវកម្មឡើងវិញ និងបង្កើនដើមទុនក្នុងរយៈពេល ៦០ថ្ងៃខាងមុខ ។ ការងារនេះកំពុងបន្ត ហើយមិនទាន់មានការធានាថានឹងទទួលបានលទ្ធផលយ៉ាងណានៅឡើយទេ ។
អភិបាលរងខេត្តព្រះសីហនុ លោក ឡុង ឌីម៉ង់ បានឱ្យដឹងថា នាវាមួយគ្រឿងនេះ បានមកពីប្រទេសថៃ ហើយចូលចតនៅក្រុងព្រះសីហនុ កាលពីថ្ងៃទី២៣ ខែតុលា ដោយដឹកអ្នកដំណើរ ២០៣នាក់ និងនាវិក ១៥៦នាក់ ។ អ្នកដំណើរមួយចំនួនបានជិះយន្តហោះចាកចេញ ខណៈដែលអ្នកផ្សេងទៀតនៅបន្តស្នាក់នៅក្នុងក្រុងព្រះសីហនុ និងរៀបចំការធ្វើដំណើរ ។ លោកបានបន្ថែមថា នាវានេះមានគម្រោងចាក់ប្រេងឥន្ធនៈ និងចេញដំណើរវិញ នៅថ្ងៃទី៣១ ខែតុលាខាងមុខ ។
គួរបញ្ជាក់ដែរថា នាវាទេសចរណ៍Odyssey មានប្រវែង២០០ម៉ែត្រ បានចេញដំណើរពីប្រទេសអៀរឡង់ខាងជើង តាំងពីខែតុលា ឆ្នាំ២០២៤ សម្រាប់ការធ្វើដំណើរជុំវិញពិភពលោកមិនឈប់ ដោយអ្នកដំណើរអាចទិញ ឬជួលបន្ទប់ ដើម្បីដើរលេងមួយរយៈ ឬក៏រស់នៅលើនាវាពេញមួយជីវិតក៏បាន រហូតមានអ្នកដំណើរខ្លះ បានលក់ទ្រព្យសម្បត្តិទាំងអស់ដែលខ្លួនមាន ដើម្បីបង់ប្រាក់សម្រាប់ការធ្វើដំណើរនេះទៀតផង ។
ការជាប់គាំងគឺមកពីតម្លៃប្រេងឥន្ធនៈជាសាកលតម្លៃប្រេងពិភពលោកបានកើនឡើងខ្លាំង បន្ទាប់ពីសហរដ្ឋអាមេរិក និងអ៊ីស្រាអែល រួមដៃគ្នាបង្កសង្គ្រាមប្រឆាំងអ៊ីរ៉ង់ តាំងពីដើមឆ្នាំ២០២៦មក ។ បច្ចុប្បន្ន តម្លៃប្រេងសាកល ហក់ឡើងដល់១១៥ដុល្លារក្នុង១បារ៉ែល ។ មុនសង្គ្រាម តម្លៃប្រេងពិភពលោក ស្ថិតក្នុងខ្ទង់តែ៧០ដុល្លារប៉ុណ្ណោះ ក្នុង១បារ៉ែល ។ ការកើនឡើងដ៏ច្រើននេះ បានបង្កសម្ពាធយ៉ាងខ្លាំងដល់ការចំណាយលើប្រតិបត្តិការនាវា Villa Vie Odyssey ។ សារព័ត៌មានអន្តរជាតិធំៗ ដូចជា BBC និង AP បានរាយការណ៍ថា នៅថ្ងៃទី២៨ ខែតុលា ២០២៦ ការសម្រេចចិត្តមិនធ្លាប់មានរបស់នាវាខ្នាតយក្សរបស់សហរដ្ឋអាមេរិកនេះ ដែលផ្អាកដំណើរទៅមុខ និងបន្តស្នាក់នៅកម្ពុជា ដោយសារសាំងឡើងថ្លៃ ។
ការចូលចតនៅកម្ពុជា គឺជាផ្នែកមួយនៃផែនការធ្វើដំណើរកម្សាន្តរបស់នាវានេះ ។ ក្រុមហ៊ុនអាមេរិក ដែលជាម្ចាស់នាវា Villa Vie Odyssey កំពុងសហការជាមួយអ្នកដំណើរ ដើម្បីរៀបចំកន្លែងស្នាក់នៅបណ្តោះអាសន្ន សម្រាប់ពួកគេក្នុងប្រទេសកម្ពុជា ។ ក្រុមហ៊ុន មិនទាន់អាចបញ្ជាក់បាននោះទេថា នឹងបន្តដំណើរនៅពេលណា ។
បើតាម BBC ក្រុមហ៊ុនអាមេរិក ដែលជាម្ចាស់នាវា Villa Vie Odyssey បានព្យាយាមកាត់បន្ថយការប្រើប្រាស់ប្រេង ដោយបន្ថយល្បឿនធ្វើដំណើរ និងចំណាយពេលនៅកំពង់ផែនានា ក្នុងរយៈពេលយូរជាងមុន ។ ទោះជាយ៉ាងណា ក្រុមហ៊ុនបានទទួលស្គាល់ថា វិធានការទាំងនេះ មិនអាចទប់ទល់នឹងតម្លៃប្រេង ដែលកើនឡើងខ្ពស់នោះទេ ។ ក្រុមហ៊ុន លើកឡើងទៀតថា ការដំឡើងថ្លៃ ឬការយកថ្លៃបន្ថែមពីភ្ញៀវនៅលើនាវា មិនមែនជាដំណោះស្រាយ ដែលអាចអនុវត្តបានឡើយ ។
ក្រុមហ៊ុនគ្រប់គ្រងនាវា Villa Vie Odyssey ប្រកាសថា នឹងចំណាយពេល៦០ថ្ងៃ ដើម្បីរៀបចំហិរញ្ញវត្ថុឡើងវិញ និងស្វែងរកដើមទុនបន្ថែម ដើម្បីដោះស្រាយបញ្ហាចំណាយ និងស្វែងរកមធ្យោបាយបន្តប្រតិបត្តិការ ។ នាវាលំដាប់អន្តរជាតិមួយនេះ មានប្រវែងជិត២០០ម៉ែត្រ និងអាចផ្ទុកអ្នកដំណើរបានរហូតដល់៦៥០នាក់ ។ នាវានេះ បានចេញដំណើរពីទីក្រុងបែលហ្វាស (Belfast) ប្រទេសអៀរឡង់ខាងជើង តាំងពីខែតុលា ឆ្នាំ២០២៤មកម្ល៉េះដោយកំណត់ពេល៣ឆ្នាំកន្លះ ដើម្បីធ្វើដំណើរទៅកាន់ប្រទេសជិត១៥០ នៅជុំវិញពិភពលោក ។
មុនពេលចេញដំណើរ នាវា Villa Vie Odyssey ធ្លាប់ពន្យារពេល ដោយសារត្រូវជួសជុលផ្នែកខ្លះ ដែលធ្វើឱ្យអ្នកដំណើរជាប់គាំងនៅទីក្រុងបែលហ្វាស អស់រយៈពេលជាច្រើនខែ នាពេលនោះ និងធ្វើឱ្យក្រុមហ៊ុននាវានេះ ខាតបង់ប្រាក់រាប់លានដុល្លារ ។ មុនពេលមកដល់កម្ពុជា នាវានេះ បានធ្វើដំណើរជុំវិញពិភពលោកអស់រយៈពេល២ឆ្នាំហើយ ។ ការផ្អាកប្រតិបត្តិការនៅកម្ពុជា នាពេលនេះ បានធ្វើឱ្យគម្រោងធ្វើដំណើររយៈពេលច្រើនឆ្នាំរបស់នាវា ត្រូវជាប់គាំង ខណៈក្រុមហ៊ុនកំពុងព្យាយាមដោះស្រាយបញ្ហាហិរញ្ញវត្ថុ ។
តាមគេហទំព័ររបស់ក្រុមហ៊ុន បន្ទប់ដែលអាចទិញសិទ្ធិស្នាក់នៅជាអចិន្ត្រៃយ៍លើនាវា មានតម្លៃចាប់ពី១២ម៉ឺនដុល្លារ រហូតដល់៤៤ម៉ឺនដុល្លារ ។ ចំណែកការជួលបន្ទប់ មានតម្លៃចាប់ពី៣,៥ម៉ឺនដុល្លារឡើងទៅក្នុង១ខែ ។ នាវានេះ មានភោជនីយដ្ឋាន កន្លែងហែលទឹក និងទីលានលេងកីឡា ។ល។ កាលពីឆ្នាំ២០២៥ ក្រុមហ៊ុន បានដាក់ចេញកម្មវិធីបង់ប្រាក់ស្នាក់នៅពេញមួយជីវិតលើនាវា ដែលផ្តល់ឱកាសឱ្យអ្នកចូលនិវត្តន៍ ចំណាយពេលរស់នៅរហូតលើផ្ទៃសមុទ្រ ។
នឹកឃើញនាវា Westerdam ចូលចតនៅកម្ពុជាសម័យកូវីដ-១៩ នាវាទេសចរណ៍ Westerdam ត្រូវបានអនុញ្ញាតឱ្យចូលចតនៅកំពង់ផែស្វយ័តក្រុងព្រះសីហនុនៅថ្ងៃទី២៨ ខែធ្នូ ២០២៦ ដោយផ្ទុកភ្ញៀវទេសចរជាង១៥០០នាក់ ។ ភ្ញៀវទេសចរជាង៩០០នាក់ នឹងត្រឡប់ទៅតាមនាវាវិញ ឯជាង ៦០០នាក់ទៀត នឹងបន្តស្នាក់នៅកម្ពុជា ។
នៅពេលនោះ ប្រទេសជាច្រើនបានបដិសេធមិនអោយចូល ដោយសារការព្រួយបារម្ភអំពីការរីករាលដាលជំងឺកូវីដ-១៩ ។ ទីបំផុតនាវានេះត្រូវបានអនុញ្ញាតឱ្យចូលចតនៅខេត្តព្រះសីហនុ ហើយអ្នកដំណើរ និងនាវិកទាំងអស់ត្រូវបានពិនិត្យសុខភាព និងស្វាគមន៍ ។
មូលហេតុដែលរាជរដ្ឋាភិបាលកម្ពុជា សម្រេចឱ្យនាវាអាមេរិកចូលចតនេះ ក្រោមហេតុផលថាជួយសង្គ្រោះមនុស្សជាតិ និងបង្ហាញពីសកម្មភាពមនុស្សធម៌ ជាពិសេសលុបបំបាត់ភាពភ័យខ្លាចរបស់ពលរដ្ឋ លើបញ្ហាជំងឺរលាកសួតដែលបង្កឡើងដោយកូវីដ-១៩ ។
នាពេលនោះ មានមនុស្សជាង ២ ២០០នាក់ នៅលើនាវាក្នុងនោះ អ្នកដំណើរ ១ ៤៥៥នាក់ មានជាង ៤០សញ្ជាតិ និងបុគ្គលិកបម្រើការងារតាមផ្នែកលើនាវា ៨០២នាក់ ។ ចំនួនអ្នកដំណើរច្រើនជាងគេ គឺមកពីអាមេរិក កាណាដា អង់គ្លេស ហូឡង់ អូស្ត្រាលី និងអាល្លឺម៉ង់ ។
តាំងពីពេលនោះមកក៏បានបង្ហាញទៅកាន់អន្តរជាតិថាថ្វីបើកម្ពុជាប្រទេសតូច តែបេះដូងធំ ៕
ចែករំលែកព័តមាននេះ