ខេត្ត​កំពង់​ចាម​ ៖ កម្ពស់ទឹកទន្លេមេគង្គបាន​ឡើងដល់១៥,២២ម៉ែត្រហើយ នាព្រឹកថ្ងៃទី​១៤ សីហា ២០១១ ដែលជាកម្រិត​មួយត្រូវប្រកាស​អាសន្ន និងបានធ្វើឲ្យ​ផលដំណាំ​របស់ប្រជា​កសិករត្រូវ​លិចលង់ខូចខាត ផ្លូវលំនិងហេដ្ឋា​រចនា​​សម្ព័ន្ធមួយចំនួនត្រូវបំផ្លាញ មិនតែប៉ុណ្ណោះ​ថែមទាំងបាន​ឆក់យកអាយុជីវិតប្រជាពលរដ្ឋ​អស់ចំនួន២​នាក់ផងដែរ ។ ដោយឡែក នៅ​ក្រុងកំពង់​ចាម​ទឹកទន្លេបានហូរចូល​តាមលូចេញ​មកថ្នល់នៅមុខសណ្ឋាគារមេគង្គតែបន្តិច
ប៉ុណ្ណោះ ។

តាមលោក ធុច ថាត អភិបាលក្រុង​កំពង់​ចាម មានប្រសាសន៍ថា ដោយ​មានការណែនាំពី​លោកហ៊ុន ណេង អភិ​បាលខេត្ត បានចាត់ឲ្យ​រូប​លោកដឹកនាំកម្លាំង​មន្រ្តីរាជការសាលាក្រុង កំពង់​ចាម ចៅសង្កាត់ទាំង៤ ព្រមទាំងកម្លាំង​ប្រដាប់​អាវុធឲ្យមានវិធានការប្រុងប្រយ័ត្នខ្ពស់ ដោយបានបិទទ្វារទឹកលូទាំងអស់ដែលនៅជាប់ តាមដងទន្លេមេគង្គរួមមាន សង្កាត់បឹងកុក  សង្កាត់​វាលវង់ និងសង្កាត់សំបួរមាស។ ចំណែក​ទ្វារទឹកមេដែលធំជាងគេនៅសង្កាត់វាលវង់  ក្បែរ​ស្ពានគីហ្ស៊ុណាបានដាក់ម៉ាស៊ីន​ធុន​ធំ១​គ្រឿងនិងម៉ូទ័រយក្ស១គ្រឿងដើម្បី​ត្រៀម​បូម​ទឹកចេញពីក្នុងក្រុងកំពង់ចាមបញ្ចូលទៅក្នុង ទន្លេមេគង្គ​វិញ ប្រសិនណាបើនៅរសៀលថ្ងៃទី​១៤ សីហា ក្រោយពីសែនក្បាលទឹកចប់ទឹក​ទន្លេ​នៅ​តែបន្តឡើងនោះ ។

លោក​ធុច ថាត បន្ត​ថា រូប​លោក​ ត្រូវ​យាម​ប្រចាំការ២៤ម៉ោងលើ២៤ម៉ោង ដោយ​ស្មារតីប្រុងប្រយ័ត្នខ្ពស់ជាមួយ​នឹងចៅ​សង្កាត់​ទាំង៤(សង្កាត់បឹងកុក សង្កាត់សំបួរមាស សង្កាត់វាលវង់ សង្កាត់កំពង់ចាម) ព្រមទាំង​ណែ​នាំមិនឲ្យរថយន្តដឹកទំនិញធំៗបើកឆ្លងកាត់​តាម​ផ្លូវមាត់ទន្លេទេដើម្បីចៀស​វាងបាក់ស្រុតផ្លូវ ។ ចំពោះកម្ពស់​ទឹកទន្លេមេគង្គដែលត្រូវប្រកាស​អាសន្ននោះគឺ១៥,២០ម៉ែត្រ ហើយ​រហូតមក​ដល់ម៉ោង​២រសៀលថ្ងៃ១៤សីហាកម្ពស​់ទឹក​ទន្លេបានឡើងតែបន្តិចប៉ុណ្ណោះ​ និង​កំពុង​រង់​ចាំ​​តាម​ដាន​មើល​បន្ត​ទៀត​។

គួររំលឹកថា នៅក្នុងឆ្នាំ២០០២ កម្ពស់ទឹក ទន្លេមេគង្គ​នៅ​ក្រុង​កំពង់​ចាម​បានឡើងដល់​១៥,៩៦ម៉ែត្រ ពេលនោះមន្ត្រីរាជការជុំវិញ​ខេត្ត​បានរៀបចំបាវខ្សាច់ដាក់ទប់នៅតាមច្រាំងទន្លេ មេគង្គធ្វើឲ្យទឹកបាន​ហូរចូលលិចផ្លូវតាម​ដងទនេ្ល​តែមិនមានសភាពធ្ងន់ធ្ងរទេ។ បើនិយាយពី​កម្ពស់ទឹកទន្លេវិញ គឺខ្ពស់ជាងក្រុងកំពង់ចាម​០,៦០​ម៉ែត្រ ប្រសិនណាបើបាក់បាវខ្សាច់នោះ​ក្រុងកំពង់ចាមនឹងត្រូវលិចលង់ ។

បើយោងតាមរបាយការណ៍របស់សាលា ខេត្តបានឲ្យដឹងថា គិតត្រឹមថ្ងៃទី១៤ សីហា ២០១១ទឹកទន្លេមេគង្គបានលិចស្រុកចំនួន៧​ឃុំ៣៧ ស្មើនឹង២៤១ភូមិ បណ្តាលឲ្យបាក់ផ្លូវ​លំចំនួន៣កន្លែងប្រវែង១២.០៣៤ម៉ែត្រ​(ក្នុងឃុំទ្រាន ស្រុកកំពង់សៀម និងឃុំឈូក ស្រុក​ក្រូចឆ្មារ) សាលារៀនចំនួន២៣កន្លែង បាក់
ទំនប់២កន្លែង ប្រវែង១០៥ម៉ែត្រ (ស្រុកកោះ​សូទិន និងស្រុកក្រូចឆ្មារ)បាក់ច្រាំងទន្លេប្រវែង​១.៧០០ម៉ែត្រ ផ្ទះរបស់ប្រជាពលរដ្ឋចំនួន២៣​ខ្នងត្រូវបានរុះរើ ក្នុងនោះឃុំពាមកោះស្នា ស្រុក​ស្ទឹងត្រង់៧ខ្នង និងឃុំជីរោទី១ ស្រុកត្បូងឃ្មុំ​១៦ខ្នង ។ ប្រជាពលរដ្ឋរត់ទៅផ្ទះអ្នកជិតខាង​ចំនួន១៦គ្រួសារសើ្មនឹង៤៨នាក់ នៅស្រុកកោះ​សូទិន និងទៅស្នាក់នៅទីទួលសុវត្ថិភាព៦កន្លែង មានចំនួន៤៨១គ្រួសារស្មើនឹង១.៤០៣នាក់ និងគោចំនួន៦៣ក្បាលនៅស្រុកកោះសូទិន ស្រុកត្បូងឃ្មុំ និងស្រុកកំពង់សៀម  ។ ក្នុង​ហេតុ​ការណ៍​ទឹក​ទន្លេ​មេ​គង្គជន់​លិច​នេះ​ដែរ​ក៏​បណ្តាល​ឱ្យ​មនុស្ស​លង់ទឹកស្លាប់២នាក់ (ស្រុកកង​មាស​ម្នាក់​ ស្រុកក្រូចឆ្មារម្នាក់​) ស្រូវវស្សាចំនួន​៦១២,០៧ហិកតា ឈូកចំនួន៩២,០៧ហិកតា   ដំឡូងមីចំនួន៧ហិកតា សំណាប២ហិកតា និង កៅស៊ូចំនួន១,៩០ហិកតា ។

លោកវេជ្ជបណ្ឌិត គឹមសួរ ភិរុណ ប្រធាន មន្ទីរសុខាភិបាលខេត្តមានប្រសាសន៍​ថា ចាប់​តាំងពីពេលដែលទឹកទន្លេមេគង្គ​បាន​ឡើងរហូត​មកដល់ព្រឹកថ្ងៃទី១៤សីហា ២០១១ ពុំទាន់​មាន​ឃើញប្រជាពលរដ្ឋណាម្នាក់ដែលរងគ្រោះ​ដោយពស់ចឹកត្រូវបាននាំមកសង្គ្រោះនៅមន្ទីរ​ពេទ្យខេត្តនោះទេ ។ ជាមួយនេះនៅការិ​យា​ល័យ​សុខាភិបាលស្រុកក្រូចឆ្មារបាន​ផ្តល់​វ៉ាក់​សាំងព្យាបាលពស់ចឹកត្រៀមទុកជា​ស្រេច​ហើយ​ដែរសម្រាប់​ជួយដល់ប្រជាពលរដ្ឋ​ដែល​រងគ្រោះ​ដោយពស់ចឹក ។ មិនតែ​ប៉ុណ្ណោះ​បានណែនាំ​ដល់​ប្រជាពលរដ្ឋដែលរស់នៅតាមដងទន្លេ​មេគង្គ ត្រូវតែប្រកាន់ឲ្យបានខ្ជាប់ខ្ជួនធ្វើយ៉ាង​ណា« ផឹកស្អាត ហូបស្អាត និងរស់នៅ​ស្អាត» ។ កាល​ពីឆ្នាំ២០១០កន្លងទៅ មាន​ប្រជាពលរដ្ឋ​ចំនួន៤ទៅ៥នាក់ដែលរងគ្រោះដោយសារ​ពស់​ចឹក ត្រូវបាននាំមកសង្គ្រោះនៅ​មន្ទីរពេទ្យទាន់​ពេលវេលាផុតពីគ្រោះថ្នាក់ដល់​អាយុជីវិត​ក្នុង​រដូវទឹកទន្លេមេគង្គជន់ឡើងនេះដែរ ៕