រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នារសៀលថ្ងៃទី១៣ សីហា បានអញ្ជើញជាអធិបតីដ៏ខ្ពង់ខ្ពស់ក្នុងពិធីគោរពវិញ្ញាណក្ខន្ធ សពលោកជំទាវញ៉ែម សុផានី ភរិយាលោកងួន ញ៉ិល អនុប្រធានទី១ រដ្ឋសភាដែលបានតម្កល់ធ្វើបុណ្យទក្ខិណានុប្បទានតាមប្រពៃ ណី
រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នារសៀលថ្ងៃទី១៣ សីហា បានអញ្ជើញជាអធិបតីដ៏ខ្ពង់ខ្ពស់ក្នុងពិធីគោរពវិញ្ញាណក្ខន្ធសពលោកជំទាវញ៉ែម សុផានី ភរិយាលោកងួន ញ៉ិល អនុប្រធានទី១ រដ្ឋសភាដែលបានតម្កល់ធ្វើបុណ្យទក្ខិណានុប្បទានតាមប្រពៃណីព្រះពុទ្ធសាសនានៅភូមិគ្រឹះលោកងួន ញ៉ិល ស្ថិតនៅក្នុងភូមិអណ្តូង សង្កាត់ព្រែកប្រា ខណ្ឌមានជ័យ រាជធានីភ្នំពេញ ។
ពិធីបុណ្យដ៏ក្រៀមក្រំនេះ ក៏មានការអញ្ជើញចូលរួមពីលោកឧបនាយករដ្ឋមន្ត្រីទៀ បាញ់ រដ្ឋមន្ត្រីក្រសួងការពារជាតិ លោកជំទាវឧបនាយករដ្ឋមន្ត្រីម៉ែន សំអន លោកឧបនាយករដ្ឋមន្ត្រីគាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោកឧបនាយករដ្ឋមន្ត្រីយឹម ឆៃលី លោកនាយឧត្តមសេនីយ៍កែ គឹមយ៉ាន ព្រមទាំងអស់លោក លោកស្រី ជាឥស្សរជនជាន់ខ្ពស់តំណាងគ្រប់ស្ថាប័ននៃរាជរដ្ឋាភិបាលកម្ពុជាជាច្រើនរូបទៀត ។
លោកជំទាវញ៉ែម សុផានី គឺជាភរិយាដ៏ឧត្តុង្គឧត្តមរបស់លោកងួន ញ៉ិល អនុប្រធានទី១ រដ្ឋសភា បានទទួលអនិច្ចកម្មកាលពីវេលាម៉ោង១០ និង១៣នាទីព្រឹកថ្ងៃទី១០ សីហា ឆ្នាំ២០១១ ក្នុងជន្មាយុ៦៦ឆ្នាំ ដោយរោគាពាធ បន្ទាប់ពីបានសម្រាកព្យាលរយៈពេល៦ខែនៅប្រទេសសិង្ហបុរី។
នៅក្នុងវិយោគកថាបានឱ្យដឹងថា លោកជំទាវញ៉ែម សុផានី កើតនៅក្នុងគ្រិស្តសករាជ១៩៤៥ នៅភូមិដូនដូង ឃុំបល្ល័ង្ក ស្រុកបា
រាយណ៍ ខេត្តកំពង់ធំ ។ បិតានាមញ៉ែម ដាំ អតីតមេឃុំបល្ល័ង្ក មាតានាមឌិត វឹម និងមានបងប្អូន៨នាក់ លោកជំទាវជាកូនទី២ ។ លោកជំទាវបានសិក្សារហូតដល់ថ្នាក់ទី១ទំនើបជាតិនៅទីក្រុងភ្នំពេញ ។ ក្រៅពីនេះ លោកជំទាវញ៉ែម សុផានី បានសិក្សាគរុកោសល្យ និងជំនាញដទៃបន្ទាប់មកទៀតគឺសិក្សាគរុកោសល្យកម្រិតទី១ និងកម្រិតទី២ និងទទួលការបណ្តុះបណ្តាលផ្នែកនយោបាយ ដោយចេះនិយាយភាសាបារាំង និងភាសាអង់គ្លេស ។
នៅឆ្នាំ១៩៦៧ លោកជំទាវញ៉ែម សុផានី បានរៀបអាពាហ៍ពិពាហ៍នៅទីក្រុងភ្នំពេញ ជាមួយលោកងួន ញ៉ិល ដែលមានស្រុកកំណើតនៅភូមិជាមួយគ្នាទទួលបានបុត្រា បុត្រី ៦នាក់ ព្រមទាំងមានចៅ៧នាក់ ។ លោកជំទាវញ៉ែម សុផានីមានគុណសម្បត្តិយ៉ាងធំធេងចំពោះគ្រួសារ និងប្រទេសជាតិ ។ ចំពោះស្វាមី លោកជំទាវជាឧត្តមភរិយាដ៏ល្អដែលតែងតែជួយរំលែករាល់ការលំបាកគ្រប់បែបយ៉ាង និងលើកទឹកចិត្តស្វាមីឱ្យបម្រើប្រទេសជាតិប្រកបដោយកិត្តិយស ។ ចំពោះបងប្អូន លោកជំទាវបានរាប់អានរួសរាយរាក់ទាក់ ។ ចំពោះការងារប្រទេសជាតិ លោកជំទាវបានខិតខំអស់ពីកម្លាំងកាយចិត្ត បំពេញការងារដោយស្មារតីទទួលខុសត្រូវខ្ពស់ និងលើកទឹកចិត្តសហការីក្រោមឱវាទឱ្យមានមនសិការបម្រើជាតិ ។
លោកជំទាវញ៉ែម សុផានី ជាសកម្មជនម្នាក់របស់កាកបាទក្រហមកម្ពុជា ដែលឧស្សាហ៍ព្យាយាម និងប្តូរផ្តាច់ក្នុងបុព្វហេតុមនុស្សធម៌ ។ លោកជំទាវមានទំនាក់ទំនងការងារល្អជាពិសេសជាមួយកាកបាទក្រហមបណ្តាប្រទេសផ្សេងៗធ្លាប់បានចេញទៅប្រជុំនៅប្រទេសជាច្រើនហើយទទួលបាននូវការគាំទ្រ និងជោគជ័យដ៏ធំធេង ។ លោកជំទាវតែងបានទទួលការតែងតាំងធ្វើជាតំណាងដ៏ខ្ពង់ខ្ពស់របស់លោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន អញ្ជើញទៅជួបប្រាស្រ័យសួរសុខទុក្ខ និងចែកអំណោយប្រជាពលរដ្ឋនៅតាមបណ្តាខេត្តដែលកំពុងជួបការលំបាក ។
ដោយសារគុណសម្បត្តិដ៏ថ្លៃថ្លាមិនអាចកាត់ថ្លៃបាន លោកជំទាវត្រូវបានរាជរដ្ឋាភិបាលកម្ពុជាបំពាក់មេដាយជាច្រើនគ្រឿង ក្នុងនោះមានមេដាយមុនីសារាភ័ណ្ឌថ្នាក់ធិបឌិន្ទ មេដាយព្រះរាជាណាចក្រកម្ពុជាថ្នាក់មហាសេនា និងមេដាយមហាសេរីវឌ្ឍន៍ ។
នៅក្នុងពិធីដ៏ក្រៀមក្រំនេះដែរ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា អញ្ជើញបំពាក់គ្រឿងឥស្សរិយយសព្រះរាជាណាចក្រកម្ពុជាថ្នាក់មហាសេរីវឌ្ឍន៍ ជាកិច្ចប៉ាឆាមរណៈជូនដល់វិញ្ញាណក្ខន្ធសពលោកជំទាវញ៉ែម សុផានី ងួន ញ៉ិល ផងដែរ ៕
ចែករំលែកព័តមាននេះ