ខេត្តកំពង់ឆ្នាំង ៖ ផ្ទះមួយខ្នងទំហំ៤ម៉ែត្រ×៥ម៉ែត្រ ធ្វើអំពីថ្ម ដំបូលហ្វ៊ីប្រូស៊ីម៉ង់ត៍រួមទាំងអណ្តូងស្នប់មួយ ដែលជាអំណោយដ៏ថ្លៃថ្លារបស់លោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ត្រូវបានរៀបចំធ្វើពិធីប្រគល់ជូនលោកយាយសួស ថន អាយុ៨៥ឆ្នាំ និងលោកយាយសួស ធឿង អាយុ៦៥ឆ្នាំ ពីរនាក់បងប្អូន ដែលក្រីក្រលំបាកនិងមានជំងឺ រស់នៅក្នុងភូមិត្រពាំងគ ឃុំជ្រៃបាក់ស្រុរលាប្អៀរ ។ ពិធីនេះបានប្រព្រឹត្តធ្វើកាលពីព្រឹកថ្ងៃទី១២ ខែសីហា ក្រោមអធិបតីភាព លោកទូច ម៉ារីម ប្រធានកិត្តិយសសាខាកាកបាទក្រហម ខេត្តនិងជាអភិបាលខេត្ត និងលោកជំទាវ ដោយមានការអញ្ជើញចូលរួមពីលោកអ៊ុន សំអុល ប្រធានគណៈកម្មាធិការសាខា លោកហ៊ី ណាត ហិរញ្ញិក គណៈកម្មាធិការសាខា សមាជិក-សមាជិកាយុវជនកាកបាទក្រហមលោកអភិបាលស្រុក មេឃុំ និងប្រជាពលរដ្ឋជាច្រើនរូបទៀត ។
លោកប្រាក់ សោភ័ណ នាយកសាខាកាកបាទក្រហមខេត្តបានថ្លែងថា ដោយមើលឃើញទុក្ខលំបាករបស់លោកយាយទាំងពីរតាមរយៈការចុះផ្សាយរបស់សារព័ត៌មានកោះសន្តិភាពសាខាកាកបាទក្រហមដោយមានការណែនាំពីលោកប្រធានកិត្តិយសសាខា ក៏បាននាំយក អំណោយមកផ្តល់ជូនលោកយាយជាបន្តបន្ទាប់ពេលកន្លងមក។ ជាពិសេស ថ្មីៗនេះ លោកជំទាវកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បានផ្តល់ជូននូវផ្ទះមួយខ្នងមានទំហំ៤ម៉ែត្រ×៥ម៉ែត្រធ្វើអំពីថ្មក្រាលឥដ្ឋការ៉ូ ទ្វារ បង្អួចដែកនិងកញ្ចក់ ប្រក់ដំបូលហ្វ៊ីប្រូស៊ីម៉ង់ដ៍ មានបន្ទប់ទឹក១ ដែលសាខាកាកបាទក្រហមខេត្តរៀបចំជួលជាងកសាង មានរយៈពេល១៣ថ្ងៃគិតពីថ្ងៃទី២០ ខែកក្កដា ដល់ថ្ងៃទី៣ ខែសីហា រួចរាល់ជាស្ថាពរដោយចំណាយអស់ទឹកប្រាក់សរុបចំនួន២.២៥០ដុល្លារ។ ក្រៅពីនេះ ក៏បានកសាងអណ្តូងទឹកស្នប់មួយទៀតមានតម្លៃ២០០ដុល្លារ និងបានឧបត្ថម្ភរទេះរុញចំនួនមួយផងដែរ។
មានប្រសាសន៍ក្នុងឱកាសនោះ លោកទូច ម៉ារីម បានពាំនាំនូវការសាកសួរសុខទុក្ខនិងនឹករលឹករបស់សម្តេចទាំង៣ ដែលជាប្រមុខដឹកនាំ ជានិច្ចកាលតែងជួយប្រជាពលរដ្ឋក្រីក្រជួបការលំបាក ។ ដូចលោកយាយទាំងពីរនាក់បងប្អូនដែលក្រីក្រនិងគ្មានផ្ទះសំបែង រស់នៅក្នុងខ្ទមធ្លុះធ្លាយរកកន្លែងជ្រកមិនបាននិងមានជំងឺហើមស្ពឹកទៀត គឺលំបាកពេកណាស់ ទើបលោកជំទាវ កិត្តិព្រឹទ្ធបណ្ឌិតប៊ុន រ៉ានី ហ៊ុន សែន ដោយក្តីមេត្តា អាណិតអាសូរក៏បានផ្តល់ជូននូវផ្ទះថ្មយ៉ាងរឹងមាំប្រកបដោយផាសុកភាពនេះជូនលោកយាយទាំងពីរនាក់បងប្អូនហើយប្រគល់ជូនលោកយាយទាំងពីរនាក់ឱ្យចូលរស់នៅចាប់ពីពេលនេះតទៅ។ ក្នុងឱកាសនោះដែរ លោកអភិបាលខេត្តបានឧបត្ថមលោកយាយទាំងពីរនាក់នូវថវិកា២០ម៉ឺនរៀល និងឧបត្ថម្ភក្រុមកាយឫទ្ធិនិងសមត្ថកិច្ចការពារ១០ម៉ឺន៦ពាន់រៀលផងដែរ។
លោកយាយសួស ធឿង ជាប្អូន បានលើកដៃសំពះថ្លែងអំណរគុណយ៉ាងជ្រាលជ្រៅនូវមហាគុណដ៏ធំធេងរបស់លោកជំទាវប៊ុន រ៉ានី ហ៊ុន សែន និងសូមបួងសួងដល់វត្ថុស័ក្តិសិទ្ធិ ក្នុងលោកតាមជួយបីបាច់ថែរក្សាលោកជំទាវ និងសម្តេចព្រមទាំងបុត្រជួបតែសេចក្តីសុខសុភមង្គល និងប្រកបដោយពុទ្ធពរទាំង៤ប្រការ កុំបីឃ្លៀងឃ្លាតឡើយ។ លោកយាយក៏មិនភ្លេចថ្លែងអំណរគុណសារព័ត៌មានកោះសន្តិភាព ដែលបានចុះផ្សាយពីជីវិតនិងទុក្ខលំបាករបស់លោកយាយពីពេលកន្លងទៅទើបធ្វើឱ្យមានថ្ងៃនេះ ៕
ចែករំលែកព័តមាននេះ