ពិធីប្រណាំងទូក.ង នៅទំនប់ស្ពានស្រែង ដើម្បីអបអរក្នុងឱកាសបុណ្យភ្ជុំបិណ្ឌ ចាប់ផ្តើមបើកកម្មវិធី នារសៀលនេះ
- សៀមរាប
ខេត្តសៀមរាប ៖ នៅរសៀលថ្ងៃទី ១២ ខែតុលា ឆ្នាំ ២០២៦ នេះ លោក សុខ ណារ៉េត អភិបាល នៃគណៈអភិបាលស្រុកក្រឡាញ់ បានថ្លែងក្នុង «ពិធីបើកកម្មវិធីប្រណាំងទូក ង ក្នុងឱកាសបុណ្យភ្ជុំបិណ្ឌ» ស្ថិតនៅទំនប់ស្ពានស្រែង ក្នុងភូមិសសៃពង ឃុំតាអាន ស្រុកក្រឡាញ់ ខេត្តសៀមរាប។ ដោយមានការនិមន្ត និងអញ្ជើញចូលរួមពីសំណាក់ព្រះអង្គ ឡន ម៉ក់ ព្រះធម្មធរអនុគណស្រុកក្រឡាញ់ ព្រះថេរានុត្ថេរៈគ្រប់ព្រះអង្គ និងលោក លោក ស្រី មន្ត្រីរាជការ កងកម្លាំងប្រដាប់អាវុធ គ្រប់ប្រភេទ លោកមេឃុំ ក្រុមប្រឹក្សាឃុំតាអាន ស្រុកក្រឡាញ់ និង ឃុំស្ពានស្រែង ស្រុកភ្នំស្រុក និងក្រុមយុវជន បងប្អូនប្រជាពលរដ្ឋ ភ្ញៀវកិត្តិយស និងបងប្អូនកីឡាករទូក «ង» ទាំងអស់ ដែលបានចូលរួមយ៉ាងច្រើនកុះករ។ គួររំលឹកថា ខេត្តសៀមរាប រៀបចំពិធីប្រណាំងទូក.ង រយៈពេល២ថ្ងៃ នៅទំនប់ស្ពានស្រែង ដើម្បីអបអរក្នុងឱកាសបុណ្យភ្ជុំបិណ្ឌ
លោកអភិបាលស្រុក មានសេចក្តីសោមនស្សរីករាយ និងរំភើបញាប់ញ័រយ៉ាងក្រៃលែង ដែលបានមកចូលរួមជាអធិបតីក្នុង «ពិធីបើកកម្មវិធីប្រណាំងទូក ង ក្នុងឱកាសបុណ្យភ្ជុំបិណ្ឌ» លើទឹកដីប្រវត្តិសាស្ត្រ និងទេសភាពដ៏ត្រកាលនៃទំនប់ស្ពានស្រែង ស្ថិតក្នុងភូមិសសៃពង ឃុំតាអាន ស្រុកក្រឡាញ់ ខេត្តសៀមរាប នាពេលនេះ។ ក្នុងនាមរដ្ឋបាលស្រុកក្រឡាញ់ លោកសូមសម្តែងនូវការកោតសរសើរ និងអរព្រះគុណយ៉ាងជ្រាលជ្រៅបំផុតចំពោះគំនិតផ្តួចផ្តើម និងការខិតខំប្រឹងប្រែងរបស់ព្រះចៅអធិការវត្ត ព្រះនាម មេត្តាពលោ ឡន ម៉ក់ ព្រះធម្មធរអនុគណស្រុកក្រឡាញ់ និងគណៈកម្មការវត្តចន្ទសាយសត្ថារាម (ហៅវត្តសសៃពង) ដែលបានសហការយ៉ាងជិតស្និទ្ធជាមួយរដ្ឋបាលឃុំ និងទទួលបានការគាំទ្រពីថ្នាក់ដឹកនាំរដ្ឋបាលស្រុកផងដែរ ។
ទន្ទឹមនឹងនេះ លោកសូមថ្លែងអំណរគុណយ៉ាងជ្រាលជ្រៅបំផុតជូនចំពោះ ឯកឧត្ដម ប្រាក់ សោភ័ណ អភិបាលនៃគណៈអភិបាល ខេត្តសៀមរាប ដែលបានផ្ដល់ការគាំទ្រយ៉ាងពេញទំហឹងចំពោះកម្មវិធីនេះ ព្រមទាំងបានបញ្ជូនក្រុមកីឡាករទូក ង ចំនួន ២ គ្រឿង មកចូលរួមប្រកួតមិត្តភាព ដកស្រង់បច្ចេកទេស និងផ្លាស់ប្តរបទពិសោធន៍ ជាមួយកីឡាករ ក្នុងមូលដ្ឋានយើង ដែលនេះគឺជាការបង្ហាញពីការយកចិត្តទុកដាក់ខ្ពស់លើការលើកស្ទួយវិស័យកីឡាទូកប្រពៃណី និងពង្រឹងសាមគ្គីភាពក្នុងខេត្ត។
គួរបញ្ជាក់ថា កន្លងមក ព្រះអង្គ និងគណៈកម្មការវត្ត តែងតែបានរៀបចំកម្មវិធីប្រណាំងទូក «ង» ជារៀងរាល់ឆ្នាំក្នុងលក្ខណៈបងប្អូន និងក្នុងឆ្នាំ២០១៧ ក៏ធ្លាប់បានរៀបចំជាព្រឹត្តិការណ៍ធំដុំ ប្រកបដោយបរិយាកាសរីករាយ និងមានប្រជាពលរដ្ឋចូលរួមយ៉ាងកុះកររួចមកហើយ។ សម្រាប់ឆ្នាំនេះ លោកសូមវាយតម្លៃខ្ពស់ចំពោះស្មារតីសាមគ្គីភាព និងការខិតខំប្រឹងប្រែងយ៉ាងស្វាហាប់របស់គណៈកម្មការរៀបចំកម្មវិធី អាជ្ញាធរដែនដីគ្រប់លំដាប់ថ្នាក់ ព្រមទាំងបងប្អូនប្រជាពលរដ្ឋទាំងអស់ ដែលបានរួមគ្នារៀបចំឱ្យមានព្រឹត្តិការណ៍ដ៏អធិកអធមនេះឡើង។ ការរៀបចំនេះ មិនត្រឹមតែជាការបង្កើតបរិយាកាសសប្បាយ រីករាយក្នុងឱកាសបុណ្យភ្ជុំបិណ្ឌប៉ុណ្ណោះទេ ប៉ុន្តែថែមទាំងជាការចូល រួមចំណែក យ៉ាងសំខាន់ក្នុងការថែរក្សា លើកស្ទួយប្រពៃណី ទំនៀមទម្លាប់ និង កីឡាប្រពៃណីជាតិរបស់ដូនតា ខ្មែរ យើង បានឱ្យគង់វង្ស យូរអង្វែង។
នៅក្នុងព្រឹត្តិការណ៍ប្រកួតដែលមានទូក «ង» ចូលរួមប្រកួតប្រជែងសរុបចំនួន ១០ ទូក នាពេលនេះ លោកសូមផ្តាំផ្ញើដល់បងប្អូនកីឡាករទាំងអស់ សូមចូលរួមប្រកួតដោយឈរលើស្មារតី «កីឡា ដើម្បីសុខភាព មិត្តភាព និងសាមគ្គីភាព»តាមបទបញ្ជានៃការប្រកួត ដោយស្មោះត្រង់ យោគយល់អធ្យាស្រ័យគ្នា និងប្រកបដោយក្រមសីលធម៌ខ្ពស់។
ទន្ទឹមនឹងបរិយាកាសយ៉ាងសប្បាយរីករាយនេះ ដើម្បីឱ្យកម្មវិធីប្រណាំងទូករបស់យើងប្រព្រឹត្តទៅដោយរលូន សុវត្ថិភាព និងទទួលបានជោគជ័យទាំងស្រុង ចាប់តាំងពីពេលចាប់ផ្ដើមរហូតដល់បញ្ចប់ លោក សូមអំពាវ នាវ និងសង្កត់ធ្ងន់លើការចូលរួមអនុវត្តដូចខាងក្រោម៖
-សុវត្ថិភាពចរាចរណ៍ផ្លូវទឹក (ចំណុចបន្ថែមសំខាន់)៖ ដោយសារកម្មវិធីនេះប្រព្រឹត្ត ទៅនៅលើផ្ទៃទឹក ទំនប់ស្ពានស្រែង លោក សូមអំពាវនាវដល់បងប្អូនកីឡាករទូក «ង» ទាំងអស់ ត្រូវបង្កើនការយកចិត្តទុកដាក់ខ្ពស់លើសុវត្ថិភាពផ្ទាល់ខ្លួន ដោយត្រូវបំពាក់ឧបករណ៍សុវត្ថិភាព និងពាក់អាវពោងឱ្យបានគ្រប់ៗគ្នា មុននឹងចុះទូកប្រកួត។ ក្រុមការងារបច្ចេកទេស និងក្រុមសង្គ្រោះបឋម ត្រូវប្រចាំការឱ្យបានម៉ត់ចត់ជាប្រចាំ ដើម្បីត្រៀមខ្លួនអន្តរាគមន៍បាន ទាន់ពេលវេលាក្នុងករណីមានគ្រោះថ្នាក់ជាយថា ហេតុ។ សម្រាប់បងប្អូនប្រជាពលរដ្ឋដែលជិះទូកលេង កម្សាន្តតាមដងទឹក ក៏ត្រូវប្រុង ប្រយ័ត្នខ្ពស់ និងជៀសវាងការផ្ទុកលើសទម្ងន់។
ការបង្ការគ្រោះថ្នាក់លង់ទឹក (ពិសេសកុមារ) អាណាព្យាបាលទាំងអស់ ត្រូវយកចិត្តទុកដាក់មើលថែកូនចៅតូចៗ ឱ្យបានដិតដល់បំផុត ដោយមិនត្រូវបណ្តោយឱ្យចុះលេងទឹកដោយគ្មានការត្រួត ពិនិត្យនោះឡើយ។
-ការចៀសវាងគ្រឿងស្រវឹង និងគ្រឿងញៀន សូមបងប្អូនប្រជាពលរដ្ឋ និង យុវជន ទាំងអស់ ជៀសវាងដាច់ខាតនូវការប្រើប្រាស់សារធាតុញៀន និងការពិសារគ្រឿងស្រវឹងហួសប្រមាណរហូតបាត់បង់ម្ចាស់ការ ដែលនាំឱ្យកើតមានជម្លោះ ឬអំពើហិង្សាក្នុងពេលកម្សាន្ត។
-ការលុបបំបាត់ល្បែងស៊ីសង និង អំពើហិង្សា ហាមដាច់ខាតការលួចលាក់បើក ឬលេងល្បែងស៊ីសងគ្រប់ប្រភេទ និង ត្រូវរួមគ្នារក្សាភាពស្ងប់ស្ងាត់ យោគយល់អធ្យាស្រ័យគ្នា ដើម្បីបង្ការអំពើហិង្សាគ្រប់រូបភាព។
-ការបង្ការគ្រោះថ្នាក់ចរាចរណ៍គោកក្នុងអំឡុងពេលធ្វើដំណើរមកកម្សាន្តនិងត្រឡប់ទៅផ្ទះវិញ សូមធ្វើដំណើរដោយប្រុងប្រយ័ត្ន បើកបរគោរពច្បាប់ចរាចរ ណ៍ និងពាក់មួកសុវត្ថិភាព និងប្រកាន់ខ្ជាប់គោល ការណ៍ ក្នុងពេល«បើកបរមិនត្រូវពិសារគ្រឿងស្រវឹង»។
បន្ថែមពីនេះ លោកសូមសំណូមពរដល់អាជ្ញាធរដែនដី កងកម្លាំងប្រដាប់អាវុធគ្រប់ប្រភេទ សូមបង្កើនកិច្ចសហ ការសម្រួលចរាចរណ៍ទាំងផ្លូវគោក និងផ្លូវទឹក ការពារសន្តិសុខ សណ្តាប់ធ្នាប់សាធារណៈ និង សូមឱ្យបងប្អូនប្រជាពលរដ្ឋ ភ្ញៀវទេសចរទាំងអស់ ចូលរួមថែរក្សាអនាម័យ បរិស្ថាន វេចខ្ចប់ និងទុកដាក់សំរាមក្នុងធុងសំរាមឱ្យបានត្រឹមត្រូវ។
សូមបងប្អូនទាំងអស់គ្នាបំផុសស្មារតីចូលរួមគាំទ្រដំណើរការកម្មវិធីនេះឱ្យបានផុសផុល ដើម្បីធានាថា ព្រឹត្តិការណ៍របស់យើងទទួលបានជោគជ័យត្រចះ ត្រចង់ នាំមកនូវមោទនភាពសម្រាប់ស្រុកក្រឡាញ់យើងទាំងមូល ផងដែរ ៕
ចែករំលែកព័តមាននេះ