ខេត្តកំពង់ធំ ៖ មុខសញ្ញាក្មេងស្ទាវម្នាក់ត្រូវបានសមត្ថកិច្ចនគរបាលស្រុកកំពង់ស្វាយឃាត់ ខ្លួនជាលើកទី៤ បន្ទាប់ពីរូបគេធ្វើសកម្មភាពលួចហើយលួចទៀតមិនរាងចាល កាលពីថ្ងៃទី១០ សីហា ដោយបានគាស់ផ្ទះស្ត្រីចំណាស់ម្នាក់ចូលលួចយកលុយនិងមាសប្រាក់នៅភូមិព្រៃ ព្រាល«ក» ឃុំត្រពាំងឫស្សី ស្រុកកំពង់ស្វាយ។
ខេត្តកំពង់ធំ ៖ មុខសញ្ញាក្មេងស្ទាវម្នាក់ត្រូវបានសមត្ថកិច្ចនគរបាលស្រុកកំពង់ស្វាយឃាត់ខ្លួនជាលើកទី៤ បន្ទាប់ពីរូបគេធ្វើសកម្មភាពលួចហើយលួចទៀតមិនរាងចាល កាលពីថ្ងៃទី១០ សីហា ដោយបានគាស់ផ្ទះស្ត្រីចំណាស់ម្នាក់ចូលលួចយកលុយនិងមាសប្រាក់នៅភូមិព្រៃព្រាល«ក» ឃុំត្រពាំងឫស្សី ស្រុកកំពង់ស្វាយ។
ជនស្ទាវសង្ស័យដែលគុកស្រែកហៅមិនឈប់រូបនេះត្រូវបាននគរបាលឱ្យដឹងថា ឈ្មោះផុន អណ្ដែត អាយុ១៧ឆ្នាំ មានទីលំនៅភូមិព្រៃព្រាល«ក» ឃុំត្រពាំងឫស្សី ស្រុកកំពង់ស្វាយ ត្រូវបានសមត្ថកិច្ចឃាត់ខ្លួនបន្ទាប់ពីរូបគេបានធ្វើសកម្មភាពគាស់ទ្វារផ្ទះរបស់ស្ត្រីឈ្មោះយ៉ង ផាន អាយុ៦៨ឆ្នាំ ខណៈម្ចាស់រវល់លក់ដូរកាលពីវេលាម៉ោង៩និង៣០នាទីព្រឹកថ្ងៃទី១០ សីហា។
ជាមួយហេតុការណ៍ខាងលើនេះ ស្ត្រីម្ចាស់ផ្ទះបានរៀបរាប់ប្រាប់នគរបាលថា មុនពេលកើតហេតុគាត់កំពុងជាប់ដៃលក់ដូរអីវ៉ាន់នៅខាងមុខផ្ទះ បន្ទាប់ពីស្បើយភ្ញៀវបន្តិចគាត់ក៏ក្រឡេកមើលទៅផ្ទះស្រាប់តែឃើញឈ្មោះផុន អណ្តែត ដើរចេញទៅក្រោយផ្ទះ ។ ពេលនោះគាត់មានការសង្ស័យយ៉ាងខ្លាំងក៏ឡើងទៅមើលលើផ្ទះស្រាប់តែឃើញក្ដារទ្វារផ្ទះរបើកនិងហិបដាក់ប្រាក់និងគ្រឿងអលង្ការមាសប្រាក់ត្រូវបាត់អស់ទើបគាត់ប្តឹងនគរបាលតែម្ដង។ ស្ត្រីម្ចាស់ផ្ទះខាងលើបន្តថា ពេលឈ្មោះផុន អណ្តែត នៅក្នុងភូមិអ្នកភូមិតែងបារម្ភខ្លាចបាត់ទ្រព្យសម្បត្តិព្រោះវាជាចោរលួចមិនរើសមុខ ។ គាត់បានបញ្ជាក់ថា ទ្រព្យសម្បត្តិរបស់គាត់ដែលឈ្មោះផុន អណ្តែតលួចយកទៅមានលុយចំនួន១៧០ម៉ឺនរៀល និងមាស១តម្លឹង៥ជី៥ហ៊ុន ។
មន្ត្រីនគរបាលស្រុកកំពង់ស្វាយបានបន្តថា ក្រោយពីទទួលពាក្យបណ្ដឹងរបស់ម្ចាស់ផ្ទះភ្លាមសមត្ថកិច្ចបានធ្វើការឃាត់ខ្លួនជនស្ទាវសង្ស័យតែម្ដង និងបានដកហូតវត្ថុតាងដែលនៅសេសសល់មួយចំនួនប្រគល់ឱ្យម្ចាស់ដើមវិញ។ មន្ត្រីនគរបាលដដែលបានបញ្ជាក់ឱ្យដឹងផងដែរថា ឈ្មោះ ផុន អណ្ដែត នេះគឺជាមុខសញ្ញាចាស់មិនរាងចាល និងធ្លាប់ជាប់គុក៣លើករួចមកហើយពីបទចោរកម្ម។ នៅរសៀលថ្ងៃទី១១ សីហា ចោរ ស្ទាវផុន អណ្ដែត បានអណ្ដែតខ្លួនចូលដេកពន្ធនាគារម្ដងទៀតហើយ ៕
ចែករំលែកព័តមាននេះ