រាជធានីភ្នំពេញ ៖ ជំនួបរវាងលោកថោង ខុន រដ្ឋមន្ត្រីក្រសួងទេសចរណ៍ និងលោកអគ្គរាជទូតថ្មីនៃព្រះរាជាណាចក្រថៃកាលពីរសៀលថ្ងៃទី៩ សីហា នៅឯទីស្តីការក្រសួងទេសចរណ៍បានផ្តោតលើការពង្រឹង និងបង្កើនកិច្ចសហប្រតិបត្តិការកម្ពុជា-ថៃលើវិស័យទេសចរណ៍ ស្របពេលដែលរដ្ឋាភិបាលថ្មីនៃព្រះរាជាណាចក្រថៃ
រាជធានីភ្នំពេញ ៖ ជំនួបរវាងលោកថោង ខុន រដ្ឋមន្ត្រីក្រសួងទេសចរណ៍ និងលោកអគ្គរាជទូតថ្មីនៃព្រះរាជាណាចក្រថៃកាលពីរសៀលថ្ងៃទី៩ សីហា នៅឯទីស្តីការក្រសួងទេសចរណ៍បានផ្តោតលើការពង្រឹង និងបង្កើនកិច្ចសហប្រតិបត្តិការកម្ពុជា-ថៃលើវិស័យទេសចរណ៍ ស្របពេលដែលរដ្ឋាភិបាលថ្មីនៃព្រះរាជាណាចក្រថៃ ទើបត្រូវបានបង្កើតឡើងដឹកនាំដោយលោកស្រីយីងឡាក់ ។
លោកថោង ខុន អបអរសាទរចំពោះការបង្កើតរដ្ឋាភិបាលថ្មីរបស់ព្រះរាជាណាចក្រថៃហើយថ្លែងថា លោកនឹងបន្តខិតខំពង្រឹង និងបង្កើនកិច្ចសហប្រតិបត្តិការលើវិស័យទេសចរណ៍រវាងកម្ពុជា-ថៃ ឱ្យកាន់តែល្អប្រសើរឡើងថែមទៀត ។ លោកសង្ឃឹមថា ទេសចរណ៍ថៃក៏ដូចជាទេសចរណ៍អន្តរជាតិដែលមកទស្សនាកម្ពុជាតាមច្រកថៃនឹងមានការកើនឡើងជាងពេលមុនចាប់ពីពេលនេះតទៅ ដោយយើងខិតខំធ្វើយ៉ាងណាជម្រុញដល់ការធ្វើដំណើរ និងការដឹកជញ្ជូនទេសចរណ៍ឆ្លងកាត់ព្រំដែនប្រទេសទាំងពីរឱ្យកាន់តែមានភាពងាយស្រួល និងល្អប្រសើរឡើង។
លោក SOMPONG SANGUANBU ឯកអគ្គរាជទូតនៃព្រះរាជាណាចក្រថៃដែលទើបតែតែងតាំងថ្មីប្រចាំនៅប្រទេសកម្ពុជាបានថ្លែងស្វាគមន៍គាំទ្រចំពោះគំនិតរបស់លោករដ្ឋមន្ត្រីក្រសួងទសចរណ៍ ដោយមានប្រសាសន៍ថា លោកនឹងខិតខំពិភាក្សាគ្នា ដើម្បីជំរុញកិច្ចសហការវិស័យទេសចរណ៍រវាងប្រទេសទាំងពីរឱ្យកាន់តែប្រសើរឡើង ដើម្បីផលប្រយោជន៍ប្រទេសទាំងពីរ និងប្រជាជនទាំងពីរ ។
លោករដ្ឋមន្ត្រីក្រសួងទេសចរណ៍ និងលោកអគ្គរាជទូតថៃបានឯកភាពគ្នាថា ទន្ទឹមនឹងការជម្រុញចលនាការធ្វើដំណើរ និងដឹកជញ្ជូនទេសចរណ៍តាមផ្លូវអាកាស ផ្លូវគោក ក៏គប្បីត្រូវជម្រុញការដឹកជញ្ជូនទេសចរណ៍តាមផ្លូវទឹកផងដែរ ពិសេសពីខេត្តភាគខាងត្បូងនៃប្រទេសថៃមកកាន់តំបន់ឆេ្នរសមុទ្រកម្ពុជា ព្រោះឆ្នេរសមុទ្រ កម្ពុជាជាឆ្នេរល្អស្អាត ទើបបានជាប់ជាសមាជិកឆ្នេរសមុទ្រស្អាតបំផុតលើពិភពលោក ហើយភ្ញៀវទេសចរទាំងអស់អាចភ្ជាប់ការទស្សនារបស់គេពីតំបន់ឆ្នេរទៅកាន់ខេត្តសៀមរាប និងតំបន់អេកូទេសចរណ៍ដទៃទៀត។
ទៅថ្ងៃអនាគតតំបន់ទេសចរណ៍ភ្នំបូកគោ នឹងអាចទាក់ទាញភ្ញៀវទេសចរវៀតណាម និងថៃមកកម្ពុជាបានយ៉ាងច្រើន ។ ក្នុងរយៈពេល៦ខែដើមឆ្នាំ២០១១នេះ ភ្ញៀវទេសចរអន្តរជាតិមកទស្សនាកម្ពុជាមានចំនួន១.៣៤៥.០២៩នាក់ កើនឡើង១៣,៤% ដោយឡែកទេសចរណ៍ថៃក្នុងរយៈពេល៦ខែដើមឆ្នាំនេះ មានការថយចុះប្រមាណ៣៦,៤% តែសង្ឃឹមថា ក្នុងរយៈពេល៦ខែឆមាសទី២នៃឆ្នាំនេះនឹងមានការកើនឡើងវិញ ៕
ចែករំលែកព័តមាននេះ