សមាគម​ស្បៀង​អាហារ​វៀតណាម​(VFA) ​កាលពីថ្ងៃ​សុក្របាន​ច្រានចោល​ពាក្យចចាម​​អារ៉ាមថា​ ពាណិជ្ជករ​ចិនបាន​​ទិញអង្ករ​​វៀត​ណាម​ក្នុងចំនួន​ដ៏ច្រើន​ និងដឹក​ចេញ​ដោយ​​ខុស​​ច្បាប់​ចូល​​ប្រទេស​ចិន​។

សមាគម​ស្បៀង​អាហារវៀត​ណាម​ក៏តំរូវឲ្យ​អ្នក​នាំអង្ករចេញ​ធានាអង្ករ​បំរុងរបស់​ពួកគេ​​ដើម្បី​ស្ថិរភាព​តំលៃអង្ករ​ក្នុងស្រុក​។ ​លោក ​Truong Thanh Phong ​ដែលជា ​ប្រធាន​VFA ​និយាយ​ក្នុងកិច្ច​ប្រជុំអ្នក​នាំអង្ករ​ ចេញនៅ​ទីក្រុងហូជីមិញ​កាលពីថ្ងៃ​សុក្រថា​ អង្ករ​ភាគ​ច្រើនរបស់​ប្រទេសវៀតណាម​ត្រូវបាននាំ​​ចេញទៅ​លក់នៅ​ប្រទេស​ចិនឆ្នាំនេះ​ដោយស្រប​ច្បាប់​ ហើយគ្មាន​ពាណិជ្ជករ​ចិនណាម្នាក់​​ទៅ​ទិញ​​អង្ករដល់​ដីស្រែតាម​ពាក្យចចាម​អារ៉ាម​នោះ​ទេ។​

លោក Phong ​បាន​តំរូវឲ្យសមាជិក​នៃ​សមា​គម​ស្បៀងអាហារ​វៀតណាម​ធានាចំពោះ​អង្ករ​បំរុង​ ដើម្បីបញ្ជៀស​តំលៃអង្ករ​ដែលអាច​កើន​​ឡើង​សំរាប់​ឆមាសទី២។​ លោកបន្តថា​​ ប្រទេសវៀត​ណាមបានចុះ​​កិច្ច​សន្យានាំ​អង្ករចេញ​ចំនួន១លាន​តោនក្នុង​ខែ​កក្កដា ​ហើយពាក់​កណ្តាលនោះ​ត្រូវប្រទេស ​ឥណ្ឌូ​ណេស៊ី​ជាអ្នកទិញ។​ ប្រទេសឥណ្ឌូ​ណេស៊ីនឹង​បន្តទិញច្រើន​​ថែម​ទៀត​ក្នុងឆមាស​ទី២ឆ្នាំនេះ​ ​ស្របពេល​ដែល​​ប្រទេសផ្សេងៗដូច​ជាហ្វ៊ីលីពីន ​ម៉ាឡេស៊ី ​បង់​ក្លា​ដេស​ ក៏ត្រូវការ​អង្ករផងដែរ។​ ប្រទេសវៀតណាម​ត្រូវការអង្ករ​ចំនួន​១,៥៦៤តោន​សំរាប់ដឹកចេញ​ក្នុងខែសីហា ប៉ុន្តែ​ពេល​នេះ​មានអង្ករស្តុក​ចំនួនតែ១,៤លាន​តោន​​ប៉ុណ្ណោះ។​

លោក Thanh Phong ​ស្នើឲ្យ​សមាជិក​​VFA ​ទាំងអស់មាន​ការ​ប្រុងប្រយ័ត្ន​ក្នុងការលក់​ផលិត​​ផល​របស់​ខ្លួន​​​លើ​ទីផ្សារ។​ លោកក៏បាន​ស្នើអ្នក​នាំ​អង្ករ​​ចេញ​ត្រូវគោរព​ច្បាប់​តាមអនុក្រឹត្យ​របស់​រដ្ឋា​ភិបាល​​លេខ១០៩​ ដែលចែងថា​ អ្នកនាំអង្ករ​ចេញ​ត្រូវ​​ស្តុក​​ទុកអង្ករផ្សេងមួយ​ផ្នែកទៀតសំរាប់ផ្គត់ផ្គង់​​តំរូវ​ការ​ក្នុង​ស្រុក​ និងរក្សាតំលៃ​អង្ករឲ្យ​មាន​ស្ថិរភាព៕