ខេត្តកោះកុង ៖ អំណោយសម្តេចអគ្គមហាពញាចក្រីកិត្តិព្រឹទ្ធបណ្ឌិតហេង សំរិន ប្រធានរដ្ឋសភា និងលោកជំទាវបណ្ឌិតឧបនាយករដ្ឋមន្ត្រីម៉ែន សំអន រួមមានមីចំនួន៦០កេស ត្រីខកំប៉ុង១០កេស ស្មើនឹង១.០០០កំប៉ុង ប្រេងឆា៥កេសធំ នំធុង៥ធុង ប៊ីចេង២០កញ្ចប់ ខ្ទឹមស៣០គីឡូក្រាម រួមនឹងថវិកា
ខេត្តកោះកុង ៖ អំណោយសម្តេចអគ្គមហាពញាចក្រីកិត្តិព្រឹទ្ធបណ្ឌិតហេង សំរិន ប្រធានរដ្ឋសភា និងលោកជំទាវបណ្ឌិតឧបនាយករដ្ឋមន្ត្រីម៉ែន សំអន រួមមានមីចំនួន៦០កេស ត្រីខកំប៉ុង១០កេស ស្មើនឹង១.០០០កំប៉ុង ប្រេងឆា៥កេសធំ នំធុង៥ធុង ប៊ីចេង២០កញ្ចប់ ខ្ទឹមស៣០គីឡូក្រាម រួមនឹងថវិកាចំនួន៤លានរៀលផងដែរ ត្រូវបានលោកអាំ ផល្លីន ទីប្រឹក្សាផ្ទាល់សម្តេចអគ្គមហាពញាចក្រីហេង សំរិន និងលោកជំទាវម៉ែន សំអូន ដែលត្រូវជាប្អូនស្រីបង្កើតរបស់លោកជំទាវបណ្ឌិតឧបនាយករដ្ឋមន្ត្រីម៉ែន សំអន នាំយកមកចែកជូនកងទ័ពនៃយោធភូមិភាគទី៣ ដែលកំពុងឈរជើងការពារខ្សែក្រវាត់ព្រំដែននៅទិសខេត្តកោះកុង ។
នៅក្នុងឱកាសទទួលអំណោយនិងថវិកាខាងលើនេះដែរ លោកឧត្តមសេនីយ៍ត្រីមុំ សាមឌី នាយរងសេនាធិការនៃយោធភូមិភាគ៣ និងជាតំណាងដ៏ខ្ពង់ខ្ពស់លោកឧត្តមសេនីយ៍ឯកកែវ សាមួន មេបញ្ជាការយោធភូមិភាគទី៣ លោកវរសេនីយ៍ឯកសោម សាមិត្ត នាយការិយាល័យទី២ នៃយោធភូមិភាគទី៣ ប្រចាំការនៅទីបញ្ជាការស្រាលប្រចាំទិសកោះកុង និងជួសមុខឱ្យកម្លាំងទ័ពដែលកំពុងឈរជើងនៅតាមខ្សែត្រៀមជួរមុខ សូមថ្លែងអំណរគុណយ៉ាងជ្រាលជ្រៅចំពោះសម្តេចអគ្គមហាពញាចក្រីកិត្តិព្រឹទ្ធបណ្ឌិតហេង សំរិន ប្រធានរដ្ឋសភាជាតិ និងលោកជំទាវបណ្ឌិតឧបនាយករដ្ឋមន្ត្រីម៉ែន សំអន ដែលបានយកចិត្តទុកដាក់គិតគូរដល់សុខទុក្ខរបស់កងកម្លាំងឈរជើងតាមខ្សែក្រវាត់ព្រំដែនហើយបានចែករំលែកនូវគ្រឿងឧបភោគ បរិភោគរួមនឹងថវិកាផងដែរ ដើម្បីផ្គត់ផ្គង់ជីវភាពកងទ័ពនៅសមរភូមិមុខ ។
លោកឧត្តមសេនីយ៍ត្រីមុំ សាមឌី ក៏បានធ្វើរបាយការណ៍សង្ខេបជូនប្រតិភូដែលបាននាំអំណោយមកផ្តល់ជូននាពេលនេះថា កម្លាំងយោធភូមិភាគទី៣គឺជាកម្លាំងបន្ថែមពីលើកម្លាំងតំបន់ប្រតិបត្តិការសឹកកោះកុង ហើយមានចំនួនច្រើន ។ ចំពោះសភាពការណ៍ឈរជើងនៅតែមានសភាពតានតឹងមិនអាចធ្វេសប្រហែសបាន ឡើយ ព្រោះទ័ពចោរសៀមឈ្លានពានតែងឆ្លៀតឱកាសចូលមកបោះតង់លើតំបន់ហាមឃាត់ ។ ប៉ុន្តែចំពោះទំនាក់ទំនងកងទ័ពរវាងប្រទេសទាំងពីរហាក់ដូចជាមានភាពប្រសើរជាងមុន ខណៈពេលដែលលោកស្រីយីង ឡាក់ ដណ្តើមសន្លឹកឆ្នោតពីអតីតនាយករដ្ឋមន្ត្រីអាប់ភីស៊ីត បានពេលណាមក ។ ចំពោះការលំបាកនៅក្នុងភូមិសាស្ត្រកំពុងឈរជើង គឺភូមិសាស្ត្រមានលក្ខណៈស្មុគស្មាញសម្បូរដោយព្រៃភ្នំជ្រោះអូរ ប្រឈមនឹងជំងឺគ្រប់ប្រភេទ ខ្វះមធ្យោបាយធ្វើដំណើរ ព្រោះការដឹកជញ្ជូនស្បៀងនិងសព្វាវុធត្រូវធ្វើដំណើរតាមអូប័រផង តាមម៉ូតូផង និងថ្មើរជើងផង និងមានការលំបាកក្នុងការទំនាក់ទំនងគ្នាព្រោះគ្មានបណ្តាញសេវាទូរស័ព្ទ ខ្វះខាតនូវវិទ្យុទាក់ទង ។
បន្ទាប់ពីបានស្តាប់របាយការណ៍សង្ខេបខាងលើ លោកអាំ ផល្លីន និងលោកជំទាវម៉ែន សំអូន បានថ្លែងអំណរគុណយ៉ាងជ្រាលជ្រៅចំពោះវីរភាពដ៏អង់អាចក្លាហានរបស់កងទ័ពយើងទាំងអស់ដែលបានលះបង់ពេលវេលានិងហ៊ានបូជាជីវិតដើម្បីឈរជើងការពារបូរណភាពទឹកដី ។ លោកអាំ ផល្លីន និងលោកជំទាវម៉ែន សំអូន សន្យាថា និងពាំនាំនូវកង្វះខាតទាំងអស់នេះ ទៅជម្រាបសម្តេច និងលោកជំទាវបណ្ឌិតឧបនាយករដ្ឋមន្ត្រីម៉ែន សំអន និងអំពាវនាវរកសប្បុរសជនដើម្បីជួយទ្រទ្រង់ជីវភាពនិងធានាដល់ការឈរជើងរបស់កងទ័ពនៅទីនោះជាបន្តទៀត ។
លោកអាំ ផល្លីន បានបញ្ជាក់បន្ថែមថា កាយវិការទាំងអស់នេះ គឺជារូបមន្តចែករំលែករបស់សម្តេចអគ្គមហាសេនាបតីតេជោហ៊ុន សែន និងក្រៅពីនេះក៏នៅមានអង្គភាពសម្ព័ន្ធមេត្រីភាពជាមួយកងទ័ពទៀតផង ដែលសុទ្ធសឹងជារូបមន្តប្រកបដោយគតិបណ្ឌិតរបស់ប្រមុខរាជរដ្ឋាភិបាល ដើម្បីធានាដល់ការឈរជើងរបស់កងទ័ពនៅសមរភូមិមុខ ។ ពេលនេះពលរដ្ឋខ្មែរ គ្រប់ៗរូបគិតថា សេចក្តីទុក្ខលំបាករបស់កងទ័ពជាសេចក្តីទុក្ខលំបាករបស់យើងទាំងអស់គ្នា ហើយសេចក្តីសុខរបស់យើងទាំងអស់គ្នាគឺជាសេចក្តីសុខរបស់កងទ័ពផងដែរ ៕
ចែករំលែកព័តមាននេះ