រាជធានីភ្នំពេញ ៖ គណៈកម្មាធិការអនុសាខាកាកបាទក្រហមខណ្ឌឫស្សីកែវ រួមជាមួយព្រះតេជគុណ សុវណ្ណជោតិ ខឹម សម្បត្តិ ប្រធានសហគមន៍មូលនិធិនគរកាយវត្តព្រះពុទ្ធសាសនាកម្ពុជា និងជាចៅអធិការវត្តញាណរង្សី កាលពីព្រឹកថ្ងៃទី៤ សីហា បាននាំអំណោយយកទៅឧបត្ថម្ភដល់គ្រួសារ
រាជធានីភ្នំពេញ ៖ គណៈកម្មាធិការអនុសាខាកាកបាទក្រហមខណ្ឌឫស្សីកែវ រួមជាមួយព្រះតេជគុណ សុវណ្ណជោតិ ខឹម សម្បត្តិ ប្រធានសហគមន៍មូលនិធិនគរកាយវត្តព្រះពុទ្ធសាសនាកម្ពុជា និងជាចៅអធិការវត្តញាណរង្សី កាលពីព្រឹកថ្ងៃទី៤ សីហា បាននាំអំណោយយកទៅឧបត្ថម្ភដល់គ្រួសារប្រជាពលរដ្ឋផ្ទុកមេរោគអេដស៍ និងចាស់ជរាចំនួន១០គ្រួសារ រស់នៅក្នុងមូលដ្ឋានសង្កាត់ជ្រោយចង្វា ខណ្ឌឫស្សីកែវ ។
អំណោយដែលនាំយកទៅចែកជូនក្នុងឱកាសនោះក្នុងមួយគ្រួសារទទួលបាន អង្ករ៥៥គីឡូក្រាម ចានស្រាក់១ តែ៩កញ្ចប់ ស្ករស៤គីឡូក្រាម ទឹកដោះគោ៥កំប៉ុង ធុងទឹកកក១ ទឹកត្រី៩ដប ទឹកស៊ីអ៊ីវ៨ដប មី២កេស និង១០កញ្ចប់ ត្រីខ៥កំប៉ុង តម្បៀតចាប់ភ្លើង១ ឆ្នាំងដាំបាយ១ ចង្អើរអាំងត្រី១ កំសៀវ១ វែក២ និងថវិកា១០មឺុនរៀល ។ អំណោយទាំងនេះជាអំណោយរួមគ្នារបស់គណៈកម្មាធិការអនុសាខាកាកបាទក្រហមកម្ពុជាខណ្ឌឫស្សីកែវ សហគមន៍មូលនិធិនគរកាយវត្តព្រះពុទ្ធសាសនាកម្ពុជា និងចៅអធិការវត្តប្រជុំសាគរ ។
លោកនុត ពុធដារ៉ា ប្រធានគណៈកម្មាធិការអនុសាខាកាកបាទក្រហមខណ្ឌឫស្សីកែវ បានឱ្យដឹងថា ដោយសារមានការយកចិត្តទុកដាក់ពីអាជ្ញាធរភូមិសង្កាត់ដែលបានចុះផ្ទាល់ជាមួយប្រជាពលរដ្ឋ ស្រាវជ្រាវរកគ្រួសារងាយរងគ្រោះ ផ្ទុកមេរោគអេដស៍ ចាស់ជរា និងជនពិការ ហើយបានរាយការណ៍មកអនុសាខាកាកបាទក្រហមខណ្ឌឫស្សីកែវ សហការជាមួយសហគមន៍មូលនិធិនគរកាយវត្តព្រះពុទ្ធសាសនាកម្ពុជា ដែលមានព្រះតេជគុណសុវណ្ណ ជោតិ ខឹម សម្បត្តិ ជាប្រធាន និងជាចៅអធិការវត្តញាណរង្សី នាំអំណោយមកចែកជូននៅពេលនេះ ។
លោកនុត ពុធដារ៉ា បានបន្តទៀតថា កន្លងមក អនុសាខាកាកបាទក្រហមខណ្ឌឫស្សីកែវ បានយកចិត្តទុកដាក់យ៉ាងខ្លាំងចំពោះប្រជាពលរដ្ឋក្នុងមូលដ្ឋាន ហើយតែងតែនាំអំណោយចុះទៅជួយឧបត្ថម្ភដល់គ្រួសារងាយរងគ្រោះរាល់ខែ ។ កាកបាទក្រហមកម្ពុជា ដែលមានលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាប្រធាន តែងយកចិត្តទុកដាក់ចំពោះគ្រួសារផ្ទុកមេរោគអេដស៍ ជនពិការ ចាស់ជរាគ្មានទីពឹង និងជនរងគ្រោះគ្រប់ប្រភេទដោយមិនរើសអើងនិន្នាការនយោបាយ ជាតិសាសនា និងពណ៌សម្បុរឡើយ ។ ទីណាមានជនរងគ្រោះ ទីនោះមានកាកបាទក្រហមកម្ពុជា ។
លោកបានថ្លែងអំណរគុណដល់ព្រះតេជគុណសុវណ្ណ ជោតិ ខឹម សម្បត្តិ រួមជាមួយសប្បុរសជនដទៃទៀតដែលបានជួយឧបត្ថម្ភដល់អនុសាខាកាកបាទក្រហមខណ្ឌឫស្សីកែវ ដើម្បីជួយដល់ជនរងគ្រោះក្នុងនាមមនុស្សធម៌ ។ លោកក៏បានផ្តាំផ្ញើដល់គ្រួសារផ្ទុកមេរោគអេដស៍ត្រូវចេះតស៊ូក្នុងជីវិតកុំអស់សង្ឃឹម ហើយនាំគ្នាទៅបើកថ្នាំពន្យារជីវិតឱ្យបានទៀងទាត់ ៕
ចែករំលែកព័តមាននេះ