ជនដៃដល់កា.ប់សង្សាររបួ.សធ្ងន់ ត្រូវបានម្ដាយនិងពូជូនទៅសារភាពនៅប៉ុស្តិ៍នគរបាលចោមចៅទី៣
- ភ្នំពេញ
រាជធានីភ្នំពេញ៖ ជនដៃដល់ដែលបានកាប់ប្រហារនារីជាសង្សារ ដែលជានិស្សិតស្រី និងជាបុគ្គលិកហាងបណ្ដាលឲ្យនាងរងរបួសធ្ងន់ ព្រោះតែខឹងនាងសុំផ្ដាច់ស្នេហ៍នោះត្រូបានម្ដាយនិងពូបង្កើតរបស់ខ្លួនម្នាក់ដែលជាសន្តិសុខសាលាខណ្ឌសែនសុខលួងលោមតាមទូរស័ព្ទឲ្យទទួលកំហុស ។ បន្ទាប់មកពួកគាត់ក៏ហៅម៉ូតូកង់បីដឹកជូនជននោះទៅសារភាពនៅប៉ុស្តិ៍នគរបាលរដ្ឋបាលចោមចៅទី៣ នៃអធិការដ្ឋានខណ្ឌពោធិ៍សែនជ័យ រាជធានីភ្នំពេញ កាលពីវេលាម៉ោង៧និង៣០នាទីយប់ថ្ងៃទី២៨ ខែឧសភា ឆ្នាំ២០២៦ហើយ បន្ទាប់ពីរត់ខ្លួនបានប៉ុន្មានម៉ោងក្រោយមក ។ គួររំលឹកថា ចាប់ខ្លួនបានហើយ យុវជនដៃដល់ដែលកាប់សង្សារមិនប្រណីដៃពេលនាងសុំបែក ក្រោយរស់នៅជាមួយគ្នា៩ខែ
ជនដៃដល់រូបនោះឈ្មោះឡុក បូណា អាយុ១៩ឆ្នាំ មុខរបរបុគ្គលិករតត់តុហាង ចំណែកនារីរងគ្រោះឈ្មោះសូ រិយា អាយុ២០ឆ្នាំ ដែលតាមសមត្ថកិច្ចប្រាប់ថា នាងជានិស្សិតឆ្នាំទី៣ និងជាបុគ្គលិកហាងជាមួយគ្នា ។ សព្វថ្ងៃអ្នកទាំង២ស្នាក់នៅក្នុងបន្ទប់ជួលលេខ៤១B ជាន់ទី១ ស្ថិតនៅក្នុងភូមិជម្ពូវ័ន២ សង្កាត់ចោមចៅទី៣ ខណ្ឌពោធិសែនជ័យ រាជធានីភ្នំពេញ ជាមួយគ្នាដូចជាប្ដីប្រពន្ធមិនទាន់រៀបការដែរ ។
ក្រោយពេលចូលដល់ប៉ុស្តិ៍នគរបាលរដ្ឋបាលចោមចៅទី៣ នគរបាលបានវាយខ្នោះដៃទៅក្រោយ ហើយជនដៃដល់ខាងលើបានប្រាប់នគរបាលថា ខ្លួននិងនារីរងគ្រោះបានស្រលាញ់និងរស់នៅជាមួយគ្នាអស់រយៈពេលជាង១ឆ្នាំមកហើយ មិនមែនទើបតែ៩ខែនោះទេ និងបានប្រើទូរស័ព្ទតែមួយជាមួយគ្នាទៀតផង ។ ដោយឡែកមូលហេតុដែលឈានដល់មានទំនាស់គ្នាធ្វើឲ្យខ្លួនទប់ចិត្តមិនបានកាប់នាងនោះទី១,គឺខ្លួនខឹងនាងសុំបែក និងទី២,នៅថ្ងៃទី២៧ ខែឧសភា ឆ្នាំ២០២៦ ពេលនាងទៅធ្វើការបាត់ ខ្លួនបានយកទូរស័ព្ទឆែកមើល ។ ខណៈនោះស្រាប់តែឃើញសារនាងឆាតឆ្លើយឆ្លងជាមួយប្រុសម្នាក់ផ្សេងទៀត ហើយខ្លួនមិនដឹងថាប្រុសនោះជានរណានោះទេ ប៉ុន្តែបានឆាតបបួលនាងដើរលេងជាមួយគ្នា ដែលបានធ្វើឲ្យខ្លួនផ្ទុះការប្រច័ណ្ឌយ៉ាងខ្លាំង ។
ជននោះបាននិយាយបន្តទៀតថា ភ្លាមនោះខ្លួនមិនបានធ្វើអ្វីទេ រហូតដល់វេលាល្ងាចថ្ងៃដដែលពេលនាងត្រលប់ទៅដល់បន្ទប់ជួលវិញ ខ្លួនក៏បានសួរនាំពីរឿងនោះ ប៉ុន្តែនាងមិននិយាយប្រាប់ខ្លួនឡើយ ហើយខ្លួននិងនាងបានស្ថិតនៅក្នុងបន្ទប់នោះជាមួយគ្នា រហូតដល់វេលាម៉ោង១យប់រំលងអាធ្រាត្រឈានចូលថ្ងៃទី២៨ ខែឧសភា ក៏បានឈ្លោះគ្នាខ្លាំងឡើង ។ ពេលនោះខ្លួនក៏ជ្រុលកាប់នាងតែម្ដង ដោយកាប់៤ទៅ៥កាំបិតចិតបន្លែ ត្រូវកដៃទាំងសងខាង ស្មា និងក្បាល បណ្ដាលឲ្យនាងដួលដេកក្នុងបន្ទប់ជួលនោះ ហើយភ្លាមៗនោះខ្លួនមិនបានដឹងថានាងស្លាប់ឬរស់នោះទេ ខ្លួនក៏បានរត់ចូលទៅក្នុងបន្ទប់ទឹក រួចយកដងអំបោសដាក់គងលើបន្ទប់ទឹកនោះ ។ បន្ទាប់មកយកយកខ្សែគោទៅចងជាប់ជាមួយដងអំបោសហើយចងកសម្លាប់ខ្លួនតាមក្រោយ ប៉ុន្តែមិនស្លាប់ ដោយសារតែបាក់ដងអំបោសធ្លាក់មក បណ្ដាលឲ្យសន្លប់មួយសន្ទុះទើបដឹងខ្លួនវិញ រួចក៏រត់ចេញក្រៅគេចខ្លួនទៅដេកនៅហាងដែលខ្លួនធ្វើការ ។
ឡុក បូណា បានសារភាពបន្តថា រហូតដល់វេលាម៉ោង៨ព្រឹកថ្ងៃទី២៨ ដដែលខ្លួនក៏បានហៅម៉ូតូកង់បីជិះចាកចេញពីកន្លែងធ្វើការទៅដេកនៅផ្ទះសំណាក់ម្ដុំផ្សារអូឡាំពិក រហូតដល់វេលាម៉ោងប្រមាណ៦ល្ងាចថ្ងៃដដែលនោះ ទើបខ្លួនខលទៅកាន់ម្ដាយឲ្យទៅយកខ្លួនមកចូលសារភាពនៅប៉ុស្តិ៍នគរបាលចោមចៅទី៣តែម្ដង ។ សូមបញ្ជាក់ថា ត្រង់ចំណុចនេះ បើតាមម្ដាយនិងពូបង្កើតជននោះ ដែលជាសន្តិសុខសាលាខណ្ឌសែនសុខបានប្រាប់នគរបាលថា ជនដៃដល់បានខលទៅពួកគាត់ ហើយពួកគាត់ក៏បានលួងលោមឲ្យទទួលកំហុសកុំឲ្យរត់គេចខ្លួនតទៅទៀត ។ លុះពេលជននោះយល់ព្រមហើយ ទើបម្ដាយនិងពូហៅម៉ូតូកង់បីជិះទៅយកជននេះពីផ្ទះសំណាក់នៅម្ដុំផ្សារអូឡាំពិក ឆ្ពោះទៅកាន់ប៉ុស្តិ៍នគរបាលរដ្ឋបាលចោមចៅទី៣ នៃអធិការដ្ឋានខណ្ឌពោធិ៍សែនជ័យ ដើម្បីចូលខ្លួនសារភាពតែម្ដង ។
សមត្ថកិច្ចបានប្រាប់ថា ក្រោយពេលជនដៃដល់ចូលទៅដល់ប៉ុស្តិ៍នគរបាលរដ្ឋបាលចោមចៅទី៣ ស្ត្រីជាម្ដាយបានអង្គុយយំនៅលើបង់ថ្មក្បែរប៉ុស្តិ៍ ដោយគាត់សោកស្ដាយនូវទង្វើដែលកូនបានប្រព្រឹត្តឃោរឃៅលើនារីរងគ្រោះ បណ្ដាលឲ្យក្លាយជាអ្នកទោសបែបនេះ ។ បន្ទាប់មកនគរបាលបានសាកសួរចម្លើយជននោះត្រួសៗ ហើយកន្លះម៉ោងក្រោយមក កម្លាំងការិយាល័យនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ បានទៅដល់ រួចបាននាំខ្លួនជននោះដឹកតាមរថយន្តទៅកាន់ការិយាល័យដើម្បីសាកសួរនិងចាត់ការបន្តតាមនិតិវិធីច្បាប់ ។
សូមរម្លឹកផងដែរថា អំពើហិង្សាខាងលើ បានកើតឡើងបង្កឲ្យមានការភ្ញាក់ផ្អើលកាលពីវេលាម៉ោង ២និង៣០នាទីយប់រំលងអាធ្រាត្រឈានចូលថ្ងៃទី២៨ ខែឧសភា ឆ្នាំ២០២៦ នៅចំណុចបន្ទប់ជួលលេខ៤១B ជាន់ទី១ ស្ថិតនៅក្នុងភូមិជម្ពូវ័ន ២ សង្កាត់ចោមចៅទី៣ ខណ្ឌពោធិសែនជ័យ រាជធានីភ្នំពេញ ៕
ចែករំលែកព័តមាននេះ