ខ្វះខាតបន្ទប់រៀន ! អ្នកគ្រូសាលាបឋមសិក្សាខ្យង ក្នុងខេត្តព្រះវិហារ អំពាវនាវសុំជំនួយសាងសង់អគារថ្មីជំនួសអគារឈើទ្រុឌទ្រោម
- ព្រះសីហនុ
ខេត្តព្រះវិហារ ៖ លោកគ្រ អ្នកគ្រូ នៃសាលាបឋមសិក្សាខ្យង កំពុងបង្ហាញក្តីបារម្ភយ៉ាងខ្លាំងពីសុវត្ថិភាព និងកង្វះខាតកន្លែងសិក្សារបស់សិស្សានុសិស្ស បន្ទាប់ពីអគារសិក្សាធ្វើពីឈើចំនួន ២ខ្នង បានរងការខូចខាត និងទ្រុឌទ្រោមយ៉ាងខ្លាំង ។ បើតាមការរៀបរាប់របស់អ្នកគ្រូ សុ ម៉ានិច ដែលជាគ្រូបង្រៀននៅសាលាបឋមសិក្សាខ្យង ស្ថិតក្នុងភូមិស្លែង ឃុំខ្យង ស្រុកជ័យសែន ខេត្តព្រះវិហារ បានឱ្យដឹងថា បច្ចុប្បន្ននៅក្នុងបរិវេណសាលាទាំងមូល មានអគារសិក្សាចំនួន ៣ខ្នង ។ ក្នុងនោះមានអគារថ្ម តែ ១ខ្នង មាន ៤បន្ទប់ប៉ុណ្ណោះ ដោយត្រូវបែងចែក ១បន្ទប់ធ្វើជាទីចាត់ការ ចំណែកឯ ២ខ្នងទៀត ជាអគារចាស់សាងសង់ពីឈើ មាន ២បន្ទប់ដូចគ្នា ប៉ុន្តែបច្ចុប្បន្នបានរងការខូចខាតទ្រុឌទ្រោមយ៉ាងខ្លាំង មិនអាចធានាសុវត្ថិភាពក្នុងការសិក្សាបានល្អប្រសើរឡើយ ។
អ្នកគ្រូបានបន្តថា សាលាបឋមសិក្សាខ្យង មានសិស្សានុសិស្សសរុបចំនួន ២៤១នាក់ ។ ដោយសារតែកង្វះខាតបន្ទប់រៀន និងស្ថានភាពអគារឈើមិនអំណោយផល ដំណើរការបង្រៀន និងរៀនជួបការលំបាកយ៉ាងខ្លាំង ដោយក្នុងមួយថ្នាក់ៗត្រូវផ្ទុកសិស្សចាប់ពី ៣០ ទៅដល់ ៥០នាក់ ។ ពាក់ព័ន្ធនឹងបញ្ហានេះ ខាងគណៈគ្រប់គ្រងសាលា ក៏ដូចជានាយកសាលា ធ្លាប់បានដាក់លិខិតស្នើសុំអន្តរាគមន៍ទៅខាងការិយាល័យអប់រំស្រុក និងមន្ទីរអប់រំ យុវជន និងកីឡាខេត្តរួចមកហើយដែរ ។
អ្នកគ្រូ សុ ម៉ានិច បានផ្តួចផ្តើមគំនិតផ្សព្វផ្សាយ និងកៀរគរជំនួយសប្បុរសធម៌ពីសប្បុរសជននានា តាមរយៈបណ្តាញសង្គម ដើម្បីជួសជុល និងសង្គ្រោះបឋមទៅលើអគារឈើដែលទ្រុឌឌទ្រោមទាំងនោះ ។ ទោះជាយ៉ាងណា នេះគ្រាន់តែជាដំណោះស្រាយ ។ អ្នកគ្រូ សុ ម៉ានិច បានសម្តែងការដឹងគុណចំពោះសប្បុរសជនដែលបានជួយឧបត្ថម្ភកន្លងមក និងបានស្នើសុំបន្ថែមយ៉ាងទទូចដូច្នេះថា ៖ «សូមសំណូមពរដល់ថ្នាក់ដឹកនាំគ្រប់លំដាប់ថ្នាក់ និងសប្បុរសជនទាំងអស់ជួយពិនិត្យលទ្ធភាព និងផ្តល់អគារសិក្សាថ្មី ដល់សាលាបឋមសិក្សាខ្យងផង ដើម្បីឱ្យកូនចៅប្រជាពលរដ្ឋនៅក្នុងតំបន់ដាច់ស្រយាលនេះ មានកន្លែងរៀនសូត្រសមរម្យ និងមានសុវត្ថិភាពដូចគេឯង» ៕
ចែករំលែកព័តមាននេះ