ទីក្រុងកាឡាទី, ប្រទេសរ៉ូម៉ានី៖ តើរុស្ស៊ីកំពុងធ្វើតេស្តអង្គការណាតូ ឬយ៉ាងណា? ថ្ងៃនេះ រ៉ូម៉ានីដែលជាសមាជិកអង្គការណាតូប្រកាសថាដ្រូនមួយគ្រឿងរបស់រុស្ស៊ីបានធ្លាក់នៅលើទឹកដីរបស់ខ្លួនបណ្ដាលឱ្យរបួសមនុស្ស២នាក់នៅទីក្រុងភាគអាគ្នេយ៍នៃប្រទេសរបស់ខ្លួន។ នៅពេលនោះ រុស្ស៊ីកំពុងវាយប្រហារប្រទេសអ៊ុយក្រែន។ តាមពិត ករណីដ្រូនរបស់រុស្ស៊ីហោះចូលប្រទេសរ៉ូម៉ានីធ្លាប់កើតមានជាច្រើនករណីហើយ។ ប៉ុន្តែនេះជាករណីដំបូងបំផុតដែលដ្រូនរបស់រុស្ស៊ីធ្លាក់ទៅលើតំបន់ទីប្រជុំជន ហើយធ្វើឱ្យមនុស្សមានរបួសថែមទៀត។
ឧបទ្ទវហេតុនៅរ៉ូម៉ានីអាចនឹងបង្កភាពតានតឹងនៅតំបន់ការពារភាគខាងកើតរបស់ណាតូនៅក្នុងស្ថានភាពដែលក្រុមសម្ព័ន្ធមិត្តរបស់អ៊ុយក្រែនកំពុងព្រួយបារម្ភថាសង្គ្រាមអាចនឹងរីករាលដាលទៅដល់ប្រទេសជិតខាង។ អ្នកនាំពាក្យអង្គការណាតូបានបង្ហោះសារនៅលើបណ្ដាញអ៊ិចថា «យើងសូមថ្កោលទោសទង្វើខ្ជីខ្ជារបស់រុស្ស៊ី។ អង្គការណាតូនឹងបន្តពង្រឹងសមត្ថភាពការពារជាតិរបស់ខ្លួនទល់នឹងការគំរាមកំហែងតាមគ្រប់រូបភាព រួមទាំងការគំរាមដោយប្រើប្រាស់ដ្រូនផងដែរ»។
ដ្រូនមួយគ្រឿងនោះធ្លាក់ចំដំបូលអគារកម្ពស់ដប់ជាន់នៅទីក្រុងកាឡាទី និងបង្កជាការផ្ទុះដ៏ធំមួយ។ នេះបើយោងតាមអាជ្ញាធររ៉ូម៉ានី។ ក្រសួងការពារជាតិរ៉ូម៉ានីបានចេញសេចក្ដីប្រកាសថាយោងតាមព័ត៌មានបឋម ដ្រូនរបស់រុស្ស៊ីនោះនៅពេលហោះទៅបុកអគារនោះក៏ផ្ទុះឡើងភ្លាមតែម្ដង។ ប្រទេសរ៉ូម៉ានីដែលមានព្រំដែនជាប់នឹងអ៊ុយក្រែនចម្ងាយ៦៥០គីឡូម៉ែត្រឧស្សាហ៍ជួបប្រទះនឹងករណីដ្រូនរបស់រុស្ស៊ីហោះចូលដែនអាកាសរបស់ខ្លួន។ ពោលគឺរហូតដល់២៨ករណីចាប់តាំងពីរុស្ស៊ីឈ្លានពានអ៊ុយក្រែន។
រដ្ឋមន្ត្រីការបរទេសរ៉ូម៉ានីចាត់ទុកឧបទ្ទវហេតុនេះជាការរំលោភច្បាប់អន្តរជាតិដ៏ធ្ងន់ធ្ងរ។ លោកស្រីថារដ្ឋាភិបាលរបស់លោកស្រីបានស្នើសុំឱ្យមានវិធានការនៅចំពោះមុខដើម្បីផ្ទេរមធ្យោបាយប្រឆាំងនឹងដ្រូនទៅឱ្យរ៉ូម៉ានីទុកសម្រាប់ការពារខ្លួន។ លោកស្រីថ្លែងបន្តទៀតថារ៉ូម៉ានីបានកោះហៅឯកអគ្គរដ្ឋទូតរុស្ស៊ីទៅសាកសួរ និងបង្ហាញការកើតទុក្ខមិនសុខចិត្តចំពោះបញ្ហានេះ។ ប្រតិកម្មក៏មានផងដែរពីសហភាពអឺរ៉ុប។ ប្រធានគណៈកម្មការអឺរ៉ុបចាត់ទុកថារុស្ស៊ីបានដើរកន្លងខ្សែបន្ទាត់ម្ដងទៀតហើយ៕ ប្រភព៖ Reuters
ចែករំលែកព័តមាននេះ