ទីក្រុងហាណួយ ៖ តម្លៃលក់រាយប្រេងឥន្ធនៈនៅក្នុងប្រទេសវៀតណាម ដែលត្រូវបានចេញផ្សាយកាលពីថ្ងៃទី២៨ ខែឧសភា ឆ្នាំ២០២៦ បានបង្ហាញពីការធ្លាក់ចុះគួរឱ្យកត់សម្គាល់ ដោយសារតែតម្លៃទីផ្សារពិភពលោកក៏បង្ហាញពីការធ្លាក់ចុះផងដែរ។ នេះបើយោងតាមប្រភពពី VnExpress បានចេញផ្សាយ។
តម្លៃសាំង RON95 (សាំងស៊ុបពែរ) បានធ្លាក់ចុះដល់ ៥,៤% មកត្រឹម ២៤ ១៥០ ដុង ឬប្រហែល ៣ ៦០០ រៀលក្នុង១លីត្រ។ ចំណែកសាំង E5 RON92 (សាំងធម្មតា) បានធ្លាក់ចុះ ៤,៥% មកត្រឹម ២៣ ២៥០ ដុង ឬប្រហែល ៣ ៥០០ រៀលក្នុង១លីត្រ។ រីឯប្រេងម៉ាស៊ូតបានធ្លាក់ចុះ ៣,៩% មកត្រឹម ២៧ ៦៥០ ដុង ឬប្រហែល ៤ ២០០ រៀលក្នុង១លីត្រ។
យោងតាមរបាយការណ៍ពីក្រសួងឧស្សាហកម្ម និងពាណិជ្ជកម្ម និងក្រសួងហិរញ្ញវត្ថុរបស់វៀតណាម បានបង្ហាញថា ទីផ្សារប្រេងឥន្ធនៈសកលក្នុងរយៈពេលប៉ុន្មានថ្ងៃថ្មីៗនេះ បានទទួលរងឥទ្ធិពលពីការចរចារវាងសហរដ្ឋអាមេរិក និងប្រទេសអ៊ីរ៉ង់ ក៏ដូចជាការកើនឡើងនៃអតិផរណារបស់សហរដ្ឋអាមេរិក ដែលបានជំរុញដោយការប្រែប្រួលយ៉ាងខ្លាំងនៃតម្លៃថាមពល។
តម្លៃប្រេងសាំង RON95 ក្នុង១បារ៉ែល (១ធុង) បានធ្លាក់ចុះ ៩,២% មកនៅត្រឹម ១២៧ ដុល្លារ ខណៈដែលប្រេងម៉ាស៊ូតបានធ្លាក់ចុះ ៥,៥% មកត្រឹម ១៤៦,៧០ ដុល្លារ។
ចាប់ពីថ្ងៃទី១ ខែមិថុនា ឆ្នាំ២០២៦ សាំងជីវឥន្ធនៈ E10 RON95 នឹងត្រូវបានលក់យ៉ាងទូលំទូលាយនៅប្រទេសវៀតណាម ជំនួសសាំង RON 95។ ចំណែកសាំង E5 RON92 នឹងបន្តលក់រហូតដល់ចុងឆ្នាំ ២០៣០។
យោងតាមអនុរដ្ឋមន្ត្រីក្រសួងឧស្សាហកម្ម និងពាណិជ្ជកម្មវៀតណាម លោក ង្វៀន ស៊ីញ ញ៉ាត់ តាន់ (Nguyen Sinh Nhat Tan) បានឱ្យដឹងថា ការលក់សាំងផ្អែកលើរ៉ែធម្មជាតិ និងជីវឥន្ធនៈនៅក្នុងពេលដំណាលគ្នាក្នុងប៉ុន្មានឆ្នាំថ្មីៗនេះ គឺមានបំណងជួយឱ្យទីផ្សារសម្របខ្លួនបន្តិចម្តងៗ និងគាំទ្រដល់អាជីវកម្មក្នុងការកែលម្អហេដ្ឋារចនាសម្ព័ន្ធចែកចាយរបស់ពួកគេ។
ទោះយ៉ាងណាក៏ដោយ ដោយលើកឡើងពីបទពិសោធន៍អន្តរជាតិ លោកថា ការរក្សាប្រភេទប្រេងឥន្ធនៈច្រើនពេកក្នុងរយៈពេលយូរ នឹងបង្កើតបញ្ហាដូចជា ថ្លៃដឹកជញ្ជូន ការផ្ទុក និងការចែកចាយខ្ពស់ ជាពិសេសបង្កើតការលំបាកសម្រាប់អ្នកលក់រាយ និងកាត់បន្ថយប្រសិទ្ធភាពនៃការផ្លាស់ប្តូរទៅប្រើប្រាស់ថាមពលបៃតងផងដែរ៕
ចែករំលែកព័តមាននេះ