ទីក្រុងម៉ានីឡា៖ បណ្ដាថ្នាក់ដឹកនាំប្រទេសសមាជិកអាស៊ាននឹងចូលរួមកិច្ចប្រជុំកំពូលជាមួយលោកពូទីននៅប្រទេសរុស្ស៊ីនាខែមិថុនាខាងមុខនេះ។ នេះបើយោងតាមការថ្លែងថារបស់ប្រមុខការទូតហ្វ៊ីលីពីន។ រដ្ឋមន្ត្រីការបរទេសហ្វ៊ីលីពីន លោកស្រីតេរ៉េសា ឡាហ្សារ៉ូ (Theresa Lazaro) បង្ហោះសារនៅលើបណ្ដាញអ៊ិចថាលោកស្រី និងសមភាគីរុស្ស៊ី គឺលោកសឺហ្គេឡាវរ៉ូស (Sergey Lavrov) បានសន្ទនាគ្នាតាមទូរស័ព្ទពាក់ព័ន្ធនឹងកិច្ចប្រជុំអាស៊ានដែលនឹងរៀបចំឡើងនៅទីក្រុងកាហ្សាន (Kazan) ប្រទេសរុស្ស៊ី។
ស្ថានទូតរុស្ស៊ីប្រចាំទីក្រុងម៉ានីឡាថ្លែងថាមុនពេលរៀបចំកិច្ចប្រជុំកំពូលចាប់ពីថ្ងៃទី១៧-១៨ ខែមិថុនា លោកឡាវរ៉ូស និងលោកស្រីឡាហ្សារ៉ូបានពិគ្រោះគ្នាអំពីលទ្ធភាពនៃការពង្រីកភាពជាដៃគូយុទ្ធសាស្ត្ររវាងរុស្ស៊ី និងអាស៊ាន។ រដ្ឋជាសមាជិកអាស៊ានភាគច្រើនបោះឆ្នោតនៅឯមហាសន្និបាតអង្គការសហប្រជាជាតិដើម្បីថ្កោលទោសរុស្ស៊ីពីបទឈ្លានពានអ៊ុយក្រែន។ ប៉ុន្តែសមាគមអាស៊ាននិយាយជារួមនៅតែបន្តរក្សាទំនាក់ទំនងជាធម្មតាជាមួយរដ្ឋាភិបាលទីក្រុងម៉ូស្គូដដែលក្នុងនាមជាដៃគូសន្ទនា។
នៅក្នុងចំណោមរដ្ឋជាសមាជិកអាស៊ាន គេមើលឃើញថាប្រទេសខ្លះចងសម្ព័ន្ធភាពជិតស្និទ្ធជាមួយអាមេរិក ឧទាហរណ៍ដូចជាហ្វ៊ីលីពីនជាដើម។ ចំណែកប្រទេសខ្លះទៀតមានទំនាក់ទំនងពាណិជ្ជកម្មនិងសន្តិសុខជាតិខ្លាំងជាមួយប្រទេសចិន និងរុស្ស៊ី។ នៅក្នុងការបោះឆ្នោតនៅអង្គការសហប្រជាជាតិដើម្បីសម្រេចទៅលើដំណោះស្រាយថ្កោលទោសរុស្ស៊ីនោះ វៀតណាម និងឡាវបោះឆ្នោតអនុបវាទ។
រដ្ឋជាសមាជិកអាស៊ានខ្លះរួមទាំងហ្វ៊ីលីពីន ឥណ្ឌូណេស៊ី ថៃ និងវៀតណាមជាដើមបាននាំចូលប្រេងឆៅពីរុស្ស៊ី ឬបង្ហាញការចាប់អារម្មណ៍ចង់ទិញប្រេងឆៅពីរុស្ស៊ីបន្ទាប់ពីប្រេងឆៅនៅលើទីផ្សារអន្តរជាតិឡើងថ្លៃកាន់តែខ្លាំងទៅៗដោយសារសង្គ្រាមអ៊ីរ៉ង់។ មន្ត្រីរដ្ឋាភិបាលហ្វ៊ីលីពីនថ្លែងថានៅក្នុងកិច្ចប្រជុំកំពូលរវាងអាស៊ាន និងរុស្ស៊ីនោះ លោកម៉ាកូសប្រមុខដឹកនាំហ្វ៊ីលីពីន នឹងអញ្ជើញទៅរុស្ស៊ី។ ចំពោះប្រទេសសិង្ហបុរីវិញ គេមិនទាន់ថាថ្នាក់ដឹកនាំប្រទេសដែនកោះមួយនេះនឹងចូលរួម ឬយ៉ាងណាទេព្រោះប្រទេសនេះថ្កោលទោសរុស្ស៊ីពីបទឈ្លានពានអ៊ុយក្រែន និងដាក់ទណ្ឌកម្មរុស្ស៊ីថែមទៀត៕ ប្រភព៖ Arab News
ចែករំលែកព័តមាននេះ