រថយន្តVOLVOបើកសុខៗឆ្លងចរន្តឆេះប្លុកម៉ាស៊ីនរងការខូចខាត
- ភ្នំពេញ
រាជធានីភ្នំពេញ ៖ រថយន្តម៉ាកVOLVO ១គ្រឿងខណៈកំពុងបើកបរសុខៗ ស្រាប់តែឆ្លងចរន្តភ្លើង បណ្ដាលឲ្យមានការឆាបឆេះប្លុកម៉ាស៊ីន ហុយផ្សែងទ្រលោមនៅតាមដងផ្លូវ ហើយភ្លាមៗនោះត្រូវបានប្រជាពលរដ្ឋជួយយកទុយោទឹកទៅជួយបាញ់ពន្លត់ ។ ព្រមទាំងមានរថយន្តពន្លត់អគ្គិភ័យទៅដល់១គ្រឿងជួយបាញ់ទឹកពន្លត់ផង ទើបរលត់ទៅវិញទាំងស្រុង មិនឆេះរាលដល់តួរថយន្តនោះទាំងមូល ប៉ុន្តែរថយន្តនេះបានរងការខូចខាតប្លុកម៉ាស៊ីនយ៉ាងដំណំបាត់ទៅហើយ ។
ហេតុការណ៍នោះបានកើតឡើងកាលពីវេលាម៉ោង៥ព្រឹកថ្ងៃទី២៩ ខែឧសភា ឆ្នាំ២០២៦ នៅលើកំណាត់មហាវិថីសហព័ន្ធរុស្ស៊ី ត្រង់ចំណុចមុខអតីតអាកាសយានដ្ឋានអន្តរជាតិភ្នំពេញ ស្ថិតនៅក្នុងភូមិក្បាលដំរី១ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ។
នគរបាលបានប្រាប់ថា រថយន្តម៉ាកVOLVO ១គ្រឿងនោះ ពណ៍ខ្មៅ ពាក់ស្លាកលេខភ្នំពេញ2BA-7222 អ្នកបើកបរពុំស្គាល់អត្តសញ្ញានោះទេ ហើយក៏ពុំដឹងថាជាបុរស ឬនារីនោះដែរ នៅពេលនគរបាលប៉ុស្តិ៍កាកាបទី១ទៅដល់អត់ឃើញម្ចាស់រថយន្តនៅទីនោះទេ ។ ប៉ុន្តែនៅក្នុងរថយន្តមានស្លាកការងារជានារី ដែលជាបុគ្គលិកនៅអាកាសយានដ្ឋានអន្តរជាតិមរតកតេជោ នៅមុនពេលកើតហេតុរថយន្តនោះបានបើកបរធ្វើដំណើរចេញពីរាជធានីភ្នំពេញ ។ ក្នុងទិសដៅពីកើតទៅលិច ដោយម្ចាស់រថយន្តនេះទៅធ្វើការនៅអាកាសយានដ្ឋានអន្តរជាតិមរតកតេជោ លុះពេលទៅដល់ត្រង់ចំណុចកើតហេតុ ស្រាប់តែឆ្លងចរន្តបង្កការឆាបឆេះប្លុកម៉ាស៊ីនតែម្ដង ។
នគរបាលបានប្រាប់ឲ្យដឹងបន្តទៀតថា ខណៈនោះមានផ្សែងហុយទ្រលោម បង្កឲ្យមានការភ្ញាក់ផ្អើលទាំងព្រឹកព្រលឹម ហើយភ្លាមៗអ្នកបើកបរបានចាកចេញពីក្នុងរថយន្ត ដោយសុវត្ថិភាព ពេលនោះប្រជាពលរដ្ឋបាននាំគ្នាទុយោទឹកទៅជួយបាញ់ពន្លត់ ។ ដោយឡែកមានរថយន្តពន្លត់អគ្គិភ័យដែលប្រចាំការនៅសាលាខណ្ឌពោធិ៍សែនជ័យ ក៏បានចេញទៅ១គ្រឿងជួយបាញ់ទឹកពន្លត់ផង ទើបភ្លើងរលត់ទៅវិញទាំងស្រុង បន្ទាប់មម្ចាស់បាននាំយករថយន្តនោះទៅធ្វើការជួសជុលឡើងវិញដោយខ្លួនឯង ៕
ចែករំលែកព័តមាននេះ