ទូតអាមេរិកនៅកម្ពុជា ចាត់ទុកការដោះលែងលោក កឹម សុខា ជាការវិវឌ្ឍន៍វិជ្ជមានមួយ
- ភ្នំពេញ
រាជធានីភ្នំពេញ ៖ ទូតសហរដ្ឋអាមេរិកប្រចាំកម្ពុជា បានស្វាគមន៍ពីដំណឹងនៃការដោះលែង លោក កឹម សុខា ដោយបានលើកឡើងថាការដោះលែងនេះជាការវិវឌ្ឍន៍វិជ្ជមានមួយ ។
យោងតាមសេចក្តីថ្លែងការណ៍របស់ស្ថានទូតអាមេរិកនៅភ្នំពេញ ស្តីពីការដោះលែង លោក កឹម សុខា បានបង្ហោះផ្សព្វផ្សាយនៅលើគេហទំព័រហ្វេសប៊ុករបស់ខ្លួន នៅព្រឹកថ្ងៃទី២៩ ខែឧសភា ឆ្នាំ២០២៦ បានឱ្យដឹងថា ទូតសហរដ្ឋអាមេរិក ស្វាគមន៍ពីដំណឹងនៃការដោះលែង លោក កឹម សុខា ។ ជាងនេះ សហរដ្ឋអាមេរិកតែងបានអំពាវនាវជាបន្តបន្ទាប់ឱ្យមានការដោះលែង លោក កឹម សុខា ហើយបានរក្សាជំហរថា ការផ្តន្ទាទោសរបស់លោកដែលពាក់ព័ន្ធនឹងការអះអាងអំពីការចូលរួមរបស់សហរដ្ឋអាមេរិក ក្នុងសកម្មភាពប្រឆាំងនឹងរដ្ឋាភិបាលកម្ពុជា គឺគ្មានមូលដ្ឋាន ។
ប្រភពបញ្ជាក់ទៀតថា ការដោះលែងរបស់លោក គឺជាការវិវឌ្ឍន៍វិជ្ជមានមួយ ហើយបន្តលើកទឹកចិត្តដល់រដ្ឋាភិបាលកម្ពុជាឱ្យធានាថា ពលរដ្ឋរបស់ខ្លួនអាចអនុវត្តសិទ្ធិក្នុងការជួបប្រជុំដោយសន្តិវិធី និងសេរីភាពក្នុងការបញ្ចេញមតិបានដោយសេរី ។
សូមបញ្ជាក់ថា កាលពីពេលថ្មីៗនេះ លោក កឹម សុខា អតីតប្រធានគណបក្សសង្គ្រោះជាតិ ដែលតុលាការកាត់ទោសឱ្យជាប់ពន្ធនាគារ២៧ឆ្នាំ ត្រូវបានលើកលែងទោស តាមរយៈព្រះរាជក្រឹត្យព្រះមហាក្សត្រដែលចុះហត្ថលេខាដោយសម្តេចតេជោ ហ៊ុន សែន ប្រមុខរដ្ឋស្តីទីនៃកម្ពុជា ៕
ចែករំលែកព័តមាននេះ