រចនាសម្ព័ន្ធអគ្គស្នងការដ្ឋាននគរបាលជាតិ និងអង្គភាពនគរបាលនានានឹងរៀបចំឋានន្តរស័ក្តិឡើងវិញ នេះបើតាមលិខិតមួយដែលចេញ នៅថ្ងៃទី ២១ ខែឧសភា ឆ្នាំ២០២៦ របស់ទីស្តីការគណៈរដ្ឋមន្ត្រី ។ តាមលិខិតដែលបញ្ជូនទៅលោក…
រចនាសម្ព័ន្ធអគ្គស្នងការដ្ឋាននគរបាលជាតិ និងអង្គភាពនគរបាលនានានឹងរៀបចំឋានន្តរស័ក្តិឡើងវិញ នេះបើតាមលិខិតមួយដែលចេញ នៅថ្ងៃទី ២១ ខែឧសភា ឆ្នាំ២០២៦ របស់ទីស្តីការគណៈរដ្ឋមន្ត្រី ។
តាមលិខិតដែលបញ្ជូនទៅលោក ស សុខា ឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃ ដោយយោងទៅតាមលិខិតរបស់ខុទ្ទកាល័យសម្តេចធិបតីផងដែរនោះ បានបញ្ជាក់ថា មន្ត្រីនគរបាលចាប់ពីកម្រិតអគ្គស្នងការ ដល់នាយរងផ្នែក នាយរងប៉ុស្តិ៍ នគរបាលរដ្ឋបាលឃុំ សង្កាត់ឯណោះ ។
តាមសំណើនោះ បានបញ្ជាក់ថា អគ្គស្នងការនៃអគ្គស្នងការដ្ឋាននគរបាលជាតិ មានឋានន្តរស័ក្តិនាយឧត្តមសេនីយ៍ដដែល ហើយថ្នាក់អគ្គនាយកនៃអគ្គនាយកដ្ឋាននានាមានឋានន្តរស័ក្តិ ឧត្តមសេនីយ៍ឯក រីឯអគ្គស្នងការរងនៃអគ្គស្នងការដ្ឋាននគរបាលជាតិ ក៏មានឋានន្តរស័ក្តិ ឧត្តមសេនីយ៍ឯកដែរ ប៉ុន្តែអគ្គនាយករង និងថ្នាក់ប្រហាក់ប្រហែលមានឋានន្តរស័ក្តិត្រឹមឧត្តមសេនីយ៍ទោ។
ប្រភពដដែលបានបន្តថា ប្រធានសេនាធិការដ្ឋាន និងប្រធាននាយកដ្ឋានកណ្តាល មានឋានន្តរស័ក្តិ ឧត្តមសេនីយ៍ទោ រីឯអនុប្រធានសេនាធិការដ្ឋាន និងអនុប្រធាននាយកដ្ឋានកណ្តាល មានឋានន្តរស័ក្តិ ឧត្តមសេនីយ៍ត្រី ។
ប្រភពដដែលបានបន្តទៀតថា សម្រាប់ប្រធាននាយកដ្ឋាន ស្នងការនៃស្នងការដ្ឋាននគរបាលរាជធានី ខេត្ត និងថ្នាក់ប្រហាក់ប្រហែល មានឋានន្តរស័ក្តិ ឧត្តមសេនីយ៍ត្រី រីឯអនុប្រធាននាយកដ្ឋាន ស្នងការរងនៃស្នងការដ្ឋាននគរបាលរាជធានី ខេត្ត និងថ្នាក់ប្រហាក់ប្រហែល មានឋានន្តរស័ក្តិ វរសេនីយ៍ឯក ។
រីឯនាយការិយាល័យ អធិការនៃអធិការដ្ឋាននគរបាលក្រុង ស្រុក ខណ្ឌ និងថ្នាក់ប្រហាក់ប្រហែល មានឋានន្តរស័ក្តិ វរសេនីយ៍ទោ ហើយសម្រាប់នាយរងការិយាល័យ អធិការរងនៃអធិការដ្ឋាន
នគរបាលក្រុង ស្រុក ខណ្ឌ និងថ្នាក់ប្រហាក់ប្រហែល មានឋានន្តរស័ក្តិវរសេនីយ៍ត្រី។
ចំពោះនាយផ្នែក នាយប៉ុស្តិ៍នគរបាលរដ្ឋបាលឃុំ សង្កាត់ និងថ្នាក់ប្រហាក់ប្រហែល មានឋានន្តរស័ក្តិ អនុសេនីយ៍ឯក ហើយនាយរងផ្នែក នាយរងប៉ុស្តិ៍នគរបាលរដ្ឋបាលឃុំ សង្កាត់ និងថ្នាក់ប្រហាក់ប្រហែល មានឋានន្តរស័ក្តិ អនុសេនីយ៍ទោ។
ចែករំលែកព័តមាននេះ