ទីក្រុងវ៉ាស៊ីនតោន៖ លោកត្រាំត្រៀមបញ្ជូនកងទ័ពបន្ថែម៥០០០នាក់ទៀតទៅប៉ូឡូញ។ នៅលើបណ្ដាញសង្គមទ្រូសសូសលលោកបានបញ្ជាក់អំពីមូលហេតុនៃការបញ្ជូនកងទ័ពបន្ថែមថាដោយសារលោកមានទំនាក់ទំនងល្អជាមួយប្រធានាធិបតីប៉ូឡូញលោកការ៉ូល ណាវរ៉ុកគីដែលជាអ្នកជាតិនិយមបែបអរិរក្សនិយម។ ការប្រកាសបញ្ជូនទ័ពនេះកើតមានឡើង២ថ្ងៃបន្ទាប់ពីអនុប្រធានាធិបតិអាមេរិក លោកជេឌីវេន ថ្លែងប្រាប់អ្នកសារព័ត៌មានថាគម្រោងបញ្ជូនទ័ពទៅប៉ូឡូញត្រូវបានពន្យារពេល។
អាមេរិកកំពុងពិនិត្យមើលឡើងវិញទៅលើវត្តមានកងទ័ពរបស់ខ្លួននៅអឺរ៉ុប ហើយត្រូវគេរំពឹងថាអាចនឹងកាត់បន្ថយចំនួនកងទ័ពបន្ទាប់ពីលោកដូណាល់ត្រាំចង់ឱ្យអង្គការណាតូមានតួនាទីកាន់តែធំទូលាយជាងពេលបច្ចុប្បន្នដើម្បីការពារទ្វីបអឺរ៉ុប។ លោកបានបង្ហោះសារនៅលើបណ្ដាញសង្គមថាដោយផ្អែកទៅលើការទទួលជោគជ័យក្នុងការបោះឆ្នោតរបស់លោកការ៉ូល ណាវរ៉ុកគីដែលលោកប្រកាសគាំទ្រ និងដោយសារទំនាក់ទំនងល្អជាមួយគ្នាផងនោះ លោកមានកិត្តិយសសូមប្រកាសថាអាមេរិកនឹងបញ្ជូនកងទ័ព៥០០០នាក់បន្ថែមទៀតទៅប៉ូឡូញ។
លោកត្រាំបានទទួលជួបលោកណាវរ៉ុកគីនៅសេតវិមានកាលដែលលោកអញ្ជើញទៅវ៉ាស៊ីនតោនកាលពីខែឧសភា ឆ្នាំមុន ហើយលោកប្រកាសគាំទ្រលោកណាវរ៉ុកគីនៅក្នុងពេលសំខាន់មុនពេលបោះឆ្នោត។ លោកណាវរ៉ុកគីយកឈ្នះលើបេក្ខជនម្ខាងទៀតជានាយករដ្ឋមន្ត្រីប៉ូឡូញ និងជាអ្នកគាំទ្រសហភាពអឺរ៉ុបគឺលោកដូណាល់ទូស។ លោកត្រាំជួបលោកណាវរ៉ុកគីម្ដងទៀតនៅសេតវិមានកាលពីខែកញ្ញា ឆ្នាំមុន។ លោកថ្លែងថាអាមេរិកអាចនឹងបង្កើនចំនួនកងទ័ពរបស់ខ្លួននៅប៉ូឡូញ និងសន្យាជួយការពារសន្តិសុខជាតិរបស់ប៉ូឡូញ។
ការសម្រេចចិត្តនេះបង្ហាញពីជំហរផ្លាស់ប្ដូររបស់អាមេរិកនៅក្នុងការបញ្ជូនទ័ពទៅអឺរ៉ុបចំពេលកំពុងមានភាពតានតឹង និងភាពមិនប្រាកដប្រជាថាតើអាមេរិកនឹងចូលរួមនៅក្នុងអង្គការណាតូកម្រិតណា។ លោកត្រាំថ្លែងថាការពង្រឹងទំនាក់ទំនងនៅក្នុងសម័យលោកណាវរ៉ុកគីកាន់អំណាចគឺជាកត្តាគន្លឹះដែលនាំឱ្យលោកផ្លាស់ប្ដូរជំហរ។ ចំណាត់ការនេះអាចជួយពង្រឹងកម្លាំងរបស់ណាតូនៅតំបន់ខាងកើតនៅពេលសង្គ្រាមអ៊ុយក្រែនបន្តឆាបឆេះដោយមិនដឹងថានឹងបញ្ចប់ទៅវិញនៅពេលណាទេ៕ ប្រភព៖ Reuters, Newsweek
ចែករំលែកព័តមាននេះ