ខេត្តកំពង់ស្ពឺ ៖ ប្រជាពលរដ្ឋជាច្រើនគ្រួសារបានឃាត់គ្រឿងចក្ររបស់មន្ត្រីជាន់ខ្ពស់ក្រសួងរៀបចំដែនដីម្នាក់ ក្រោយពីលួចធ្វើសកម្មភាពកាយបង្គោល និងលួចធ្វើរបង ខណៈដែលដីមានទំនាស់ជាយូរឆ្នាំណាស់មកហើយមិនទាន់មានដំណោះស្រាយផង ក៏ស្រាប់តែលោកធំរូបនោះបានលួចដាក់គ្រឿងចក្រទាំងបំពាន ។ បើទោះបីជាអាជ្ញាធរ និងសមត្ថកិច្ចពាក់ព័ន្ធនានាហៅមន្ត្រីជាន់ខ្ពស់…
ខេត្តកំពង់ស្ពឺ ៖ ប្រជាពលរដ្ឋជាច្រើនគ្រួសារបានឃាត់គ្រឿងចក្ររបស់មន្ត្រីជាន់ខ្ពស់ក្រសួងរៀបចំដែនដីម្នាក់ ក្រោយពីលួចធ្វើសកម្មភាពកាយបង្គោល និងលួចធ្វើរបង ខណៈដែលដីមានទំនាស់ជាយូរឆ្នាំណាស់មកហើយមិនទាន់មានដំណោះស្រាយផង ក៏ស្រាប់តែលោកធំរូបនោះបានលួចដាក់គ្រឿងចក្រទាំងបំពាន ។
បើទោះបីជាអាជ្ញាធរ និងសមត្ថកិច្ចពាក់ព័ន្ធនានាហៅមន្ត្រីជាន់ខ្ពស់ (លោក ប៉ាក់ ចាន់ផល) នោះដើម្បីមកធ្វើការដោះស្រាយជាមួយប្រជាពលរដ្ឋចំនួន ១៨៨គ្រួសារ ប៉ុន្តែលោកតែងតែគេចវេសមិនចូលខ្លួនដោះស្រាយឡើយ ។ ហើយឆ្លៀតឱកាសលួចដាក់គ្រឿងចក្ររំលោភបំពានលើដីរបស់ប្រជាពលរដ្ឋដែលមានទំនាស់មិនខ្លាចញញើតច្បាប់ទាល់តែសោះ ។
ជាក់ស្ដែង កាលពីរសៀលថ្ងៃទី ២០ ខែឧសភា ឆ្នាំ ២០២៦ ក្រុមប្រជាពលរដ្ឋជាច្រើនគ្រួសារបានទៅឃាត់សកម្មភាពគ្រឿងចក្ររបស់លោក ប៉ាក់ ចាន់ផល មានតួនាទីជាអគ្គនាយករងនៃអគ្គនាយកដ្ឋានសំណង់ ក្រសួងរៀបចំដែនដីនគរូបនីយកម្ម និងសំណង់ដែលបញ្ជាកូនចៅឱ្យធ្វើរបងនៅលើដីទំនាស់ប្រមាណជាង ២០ហិកតាដែលមានទីតាំងស្ថិតចំណុចខាងត្បូងភ្នំរលួស ក្នុងភូមិដូនអាត់ ឃុំស្គុះ ស្រុកសំរោងទង ខេត្តកំពង់ស្ពឺ ។
ជួបជាមួយអ្នកយកព័ត៌មាន លោក ជា សាវឿន អាយុ ៥៥ឆ្នាំ ជាតំណាងប្រជាពលរដ្ឋប្រមាណ ១៨៨គ្រួសារ រស់នៅក្នុងភូមិដូនអាត់ ឃុំស្គុះ ស្រុកសំរោងទងខេត្តកំពង់ស្ពឺ បាននិយាយឱ្យដឹងថា ទីតាំងដីទំនាស់ខាងលើនេះមានទំហំ ២៣ហិកតាកន្លះ ប្រជាពលរដ្ឋចំនួន ១៨៨គ្រួសារបានកាន់កាប់ និងអាស្រ័យផលតាំងពីឆ្នាំ ១៩៨០ មកម្ល៉េះ ។ លុះរហូតដល់ឆ្នាំ ២០១០-២០១១ លោកមេភូមិលោកមេឃុំបាននិយាយប្រាប់ប្រជាពលរដ្ឋថា ទីតាំងដែលដីពលរដ្ឋអាស្រ័យផលនោះ គឺរដ្ឋត្រូវការដូច្នេះហើយត្រូវតែប្រគល់ទៅឲ្យរដ្ឋគ្រប់គ្រងវិញ ។ ស្រាប់តែលេចឈ្មោះ ប៉ាក់ ចាន់ផល ដែលគេស្គាល់ថា ជាមន្ត្រីជាន់ខ្ពស់នៅក្រសួងរៀបចំដែនដីនគររូបនីយកម្ម និងសំណង់ ហើយក៏មានទំនាស់ចាប់ពីពេលនោះមក ។
ប្រជាពលរដ្ឋបានដាក់ពាក្យបណ្តឹងស្នើសុំកិច្ចអន្តរាគមន៍ទៅ ក្រសួងមហាផ្ទៃ ក្រសួងរៀបចំដែនដីនគរូបនីយកម្មនិងសំណង់ និងស្នើសុំដល់ ខុទ្ទកាល័យសម្តេចតេជោហ៊ុនសែន ដើម្បីរកយុត្តិធម៌ ។ បើទោះបីជាថ្នាក់ដឹកនាំជាន់ខ្ពស់មានសម្ដេចអគ្គមហាសេនាបតីតេជោ ហ៊ុន សែន ក្រសួងរៀបចំដែនដីនគររូបនីយកម្ម និងសំណង់ ដែលមានឯកឧត្តម សាយ សំអាល់ និងជាពិសេសរដ្ឋបាលខេត្តកំពង់ស្ពឺឲ្យមានការដោះស្រាយជាមួយប្រជាពលរដ្ឋនោះ ។ រហូតដល់បច្ចុប្បន្នមិនមានដំណោះស្រាយទាល់តែសោះ ។
លោក ជា សាវឿន តំណាងប្រជាពលរដ្ឋ ១៨៨គ្រួសារ បានបន្តថា នៅថ្ងៃទី ១៩ ខែឧសភា និងថ្ងៃទី ២០ ខែឧសភា ឆ្នាំ ២០២៦ នេះក៏ស្រាប់តែមានគ្រឿងចក្រ (អាអិច ត្រាក់ទ័រ ព្រមទាំង និងរថយន្តប្រភេទកូរ៉េ) បានធ្វើសកម្មភាពជីកកាយរបង និងភ្ជួររាស់នៅលើដីរបស់ប្រជាពលរដ្ឋដែលមានទំនាស់នោះ ។ មិនតែប៉ុណ្ណោះរបងថ្មីដែលគេលួចធ្វើនៅលើដីរបស់ប្រជាពលរដ្ឋថែមទៀតផង ។ ទាល់តែប្រជាពលរដ្ឋរបស់លោក ចុះទៅឃាត់សួរនាំ ក្រុមតៃកុងគ្រឿងចក្រខាងលើទាំងអស់នោះ បើករត់បាត់អស់ទៅ តើនេះជាទង្វើអ្វី ? របស់លោក ប៉ាក់ ចាន់ផល ដែលជាមនុស្សចេះដឹង និងជាមន្ត្រីជាន់ខ្ពស់ នៃក្រសួងរៀបចំដែនដីនគរូបនីយកម្ម និងសំណង់ ធ្វើមកលើប្រជាពលរដ្ឋស្លូតត្រង់បែបនេះ ។
អ្នកស្រី ម្លិះ សាវឿន អាយុ ៥៤ឆ្នាំ រស់នៅក្នុងភូមិដូនអាត់ ឃុំស្គុះ ស្រុកសំរោងទង ខេត្តកំពង់ស្ពឺ តំណាងប្រជាពលរដ្ឋ ១៨៨គ្រួសារ រៀបរាប់ថា ពេលដែលគាត់ចុះមកដល់ឃើញ សកម្មភាពគ្រឿងចក្រ និងគេលួចធ្វើរបងរំលោភបំពានដីធ្លីរបស់ពួកគាត់ គាត់ពិតជាឈឺចាប់ខ្លាំងណាស់ ។ បើលោកចង់បានដីធ្លីរបស់ប្រជាពលរដ្ឋមែន គួរតែមានដំណោះស្រាយសមស្របណាមួយ ។ លោកស្រីសំណូមពរដល់ឯកឧត្តមអភិបាលខេត្តកំពង់ស្ពឺ ឯកឧត្តម សាយ សំអាល់ រដ្ឋមន្ត្រីក្រសួងរៀបចំដែនដីនគររូបនីយកម្ម និងសំណង់ និងជាពិសេសសម្ដេចមហាបបវរធិបតី ហ៊ុន ម៉ាណែត នាយករដ្ឋមន្ត្រី មេត្តាជួយអន្តរាគមន៍ និងរកយុត្តិធម៌និងធ្វើការដោះស្រាយទំនាស់ដីធ្លីដ៏រ៉ាំរ៉ៃនេះជូនប្រជាពលរដ្ឋចំនួន ១៨៨គ្រួសារផង ដែលពួកគាត់រងនូវភាពអយុត្តិធម៌ជាយូរឆ្នាំណាស់មកហើយ ។
ពាក់ព័ន្ធនឹងការលើកឡើងរបស់ប្រជាពលរដ្ឋខាងលើនេះអ្នកយកព័ត៌មានយើងបានទូរស័ព្ទទៅលោក ប៉ាក់ ចាន់ផល ដើម្បីសួរនាំពីបញ្ហានេះដែរ តេចូលចំនួន ០៣ដង មិនមានអ្នកលើកទទួលទេ ។ ដូច្នេះគ្មានបានទទួលការបំភ្លឺឡើយ ។
ជាមួយគ្នានេះដែរ លោក រ៉េត ម្ចាស់គ្រឿងចក្រ បាននិយាយឱ្យដឹងតាមទូរស័ព្ទថា លោកមិនបានជីកកាយដីរបស់ប្រជាពលរដ្ឋនោះទេ ។ គ្រឿងចក្រចូលទៅក្នុងដីដែលមានប្លង់រឹងរបស់ លោក ប៉ាក់ ចាន់ផល ទេ ។ ប្អូនសួរប្រជាពលរដ្ឋសិនទៅថា តើដីរបស់ប្រជាពលរដ្ឋមានប័ណ្ណកម្មសិទ្ធិត្រឹមត្រូវដែល ឬអត់ ? ប្រជាពលរដ្ឋមកឃាត់ គឺត្រូវតែដកគ្រឿងចក្រចេញហើយ ជៀសវាងមានបញ្ហា ទុកពេលឱ្យប្រជាពលរដ្ឋ និងលោក ប៉ាក់ ចាន់ផល ធ្វើការដោះស្រាយគ្នាចុះ ។
ព័ត៌មានបន្ថនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ