ទីក្រុងបាងកក ៖ បើយោងតាមព្រះបរមរាជវាំងថៃបានប្រកាសថា ស្ថានភាពព្រះរាជសុខភាពរបស់ព្រះអង្គម្ចាស់ក្សត្រី Bajrakitiyabha ព្រះរាជបុត្រីច្បងរបស់ព្រះមហាក្សត្រថៃរាមាទី ១០ Maha Vajiralongkorn បានធ្លាក់ចុះខ្សោយខ្លាំង…
ទីក្រុងបាងកក ៖ បើយោងតាមព្រះបរមរាជវាំងថៃបានប្រកាសថា ស្ថានភាពព្រះរាជសុខភាពរបស់ព្រះអង្គម្ចាស់ក្សត្រី Bajrakitiyabha ព្រះរាជបុត្រីច្បងរបស់ព្រះមហាក្សត្រថៃរាមាទី ១០ Maha Vajiralongkorn បានធ្លាក់ចុះខ្សោយខ្លាំង ដោយសារតែការឆ្លងមេរោគលើសរីរាង្គជាច្រើន និងមិនអាចគ្រប់គ្រងចង្វាក់បេះដូងឱ្យមានលំនឹងបានឡើយ។ នេះបើតាមប្រភពពី Reuters និង CNA (Channel News Asia) បានចេញផ្សាយ ។
សេចក្តីថ្លែងការណ៍ពីព្រះបរមរាជវាំង នៅព្រឹកថ្ងៃទី២១ ខែឧសភា ឆ្នាំ២០២៦ បានឱ្យដឹងថា បន្ទាប់ពីការព្យាបាលអស់រយៈពេលជាច្រើនឆ្នាំ គ្រូពេទ្យបានរកឃើញការឆ្លងមេរោគក្រពះដែលនាំឱ្យមានការរលាកក្នុងពោះវៀនធំរបស់ព្រះនាងនៅក្នុងខែមេសា បណ្តាលឱ្យសម្ពាធឈាមធ្លាក់ចុះ និងចង្វាក់បេះដូងមិនទៀងទាត់។
សេចក្តីថ្លែងការណ៍បន្តថា មុខងារសួត និងតម្រងនោមរបស់ព្រះនាងកំពុងត្រូវបានគាំទ្រដោយឧបករណ៍វេជ្ជសាស្ត្រ និងថ្នាំពេទ្យ ប៉ុន្តែសុខភាពទ្រង់នៅតែបន្តធ្លាក់ចុះខ្សោយ ហើយគ្រូពេទ្យនឹងបន្តតាមដានស្ថានភាពទ្រង់យ៉ាងដិតដល់ និងផ្តល់ការព្យាបាលបន្ថែមទៀត។ ដ្បិតស្ថានភាពរបស់ព្រះនាងកាន់តែយ៉ាប់យ៉ឺនទៅៗ ការឆ្លងមេរោគបានក្លាយជាមិនអាចគ្រប់គ្រងបាន និងប៉ះពាល់ដល់សរីរាង្គដទៃទៀត។
គួររំលឹកថា ព្រះអង្គម្ចាស់ក្សត្រី Bajrakitiyabha ដែលបច្ចុប្បន្នឈានដល់ព្រះជន្ម ៤៧ ព្រះវស្សា បានដួលសន្លប់ អំឡុងពេលហ្វឹកហាត់សត្វឆ្កែយោធាមួយក្បាល កាលពីខែធ្នូ ឆ្នាំ២០២២ ដោយព្រះបរមរាជវាំងបញ្ជាក់ថា បណ្តាលមកពីបញ្ហាបេះដូង ហើយព្រះនាងបានសម្រាកព្យាបាលនៅមន្ទីរពេទ្យដោយមិនដឹងព្រះកាយ ចាប់តាំងពីពេលនោះមក។
ព្រះអង្គម្ចាស់ក្សត្រីដែលបានសិក្សានៅចក្រភពអង់គ្លេស សហរដ្ឋអាមេរិក និងប្រទេសថៃ មួយអង្គនេះ ធ្លាប់បានកាន់តំណែងជាច្រើនជាមួយអង្គការសហប្រជាជាតិ (UN) និងបានធ្វើយុទ្ធនាការ ដើម្បីព្យាបាលស្ត្រីក្នុងពន្ធនាគារឱ្យបានប្រសើរឡើងផងដែរ៕
ចែករំលែកព័តមាននេះ