សង្គ្រាមអ៊ុយក្រែន ៖ កាសែតអាល្លឺម៉ង់មួយ ឈ្មោះDIE WELT បានចោទប្រកាន់កងទ័ពចិនថា ជួយបណ្ដុះបណ្ដាលជាសម្ងាត់ក្នុងដែនដីខ្លួន ទាហានរុស្ស៊ីច្រើនរយនាក់ ក្នុងនោះ មានទាហានមួយចំនួនដែលដាក់ពង្រាយនៅអ៊ុយក្រែនផង…
សង្គ្រាមអ៊ុយក្រែន ៖ កាសែតអាល្លឺម៉ង់មួយ ឈ្មោះDIE WELT បានចោទប្រកាន់កងទ័ពចិនថា ជួយបណ្ដុះបណ្ដាលជាសម្ងាត់ក្នុងដែនដីខ្លួន ទាហានរុស្ស៊ីច្រើនរយនាក់ ក្នុងនោះ មានទាហានមួយចំនួនដែលដាក់ពង្រាយនៅអ៊ុយក្រែនផង ។ កាសែតនេះ លាតត្រដាងបែបដោយផ្អែកជាពិសេសលើបណ្ដាឯកសាររបស់ភ្នាក់ងារស៊ើបការណ៍អឺរ៉ុប ។
ការលាតត្រដាងនោះ ដែលមិនមានការបញ្ជាក់ដោយឯករាជ្យ កើតមានពេលប្រធានាធិបតីរុស្ស៊ីលោកវ្ល៉ាឌីមៀរ ពូទីន កំពុងបំពេញទស្សនកិច្ចនៅចិន ជួបពិភាក្សាគ្នាកំពូលជាមួយសមភាគីចិនលោកស៊ីជីនពីង ។
តាមកាសែតអាលឺ្លម៉ង់នោះថា ទាហានរុស្ស៊ីច្រើនរយនាក់ បានចូលរួមកាលពីដំណាច់ឆ្នាំ២០២៥ ក្នុងកម្មវិធីបណ្ដុះបណ្ដាលរបស់កងទ័ពចិននៅតាមទីតាំងយោធា៦ផ្សេងគ្នានៅចិន។ កម្មវិធីទាំងនោះផ្ដោតលើការប្រើប្រាស់ប្រព័ន្ធរ៉ូបូឬដ្រូន ការតតាំងជាមួយដ្រូនដោយអាវុធអេឡិចត្រូនិក ព្រមទាំងការហ្វឹកហាត់ធ្វើត្រាប់ការប្រយុទ្ធសម័យទំនើប ។ កងទាហានរុស្ស៊ី ដែលមកចូលរួមក្នុងការហ្វឹកហ្វឺននោះ មកពីអង្គភាពយោធារុស្ស៊ីផ្សេងៗគ្នា ។ ក្នុងចំណោមពួកគេមួយចំនួនជាសមាជិកកងកម្លាំងពិសេសរុស្ស៊ី ROBICON មានឯកទេសខាងដ្រូន ។
កាសែតនេះបន្តថា ក្រោយទទួលការបណ្ដុះបណ្ដាលរួចហើយ មានទាហានរុស្ស៊ីច្រើនសិបនាក់បានចូលរួមកាលពីដើមឆ្នាំ២០២៦ក្នុងការប្រយុទ្ធនៅអ៊ុយក្រែន ហើយមួយចំនួនបម្រើការនៅតាមប៉ុស្តិ៍ទីបញ្ជាការដ្ឋាន ។
កាសែតនេះក៏លាតត្រដាងដែរថា ក្រុងមូស្គូក៏បានជួយបណ្ដុះបណ្ដាលជាសម្ងាត់ ទាហានចិន៦០០នាក់កាលពីឆ្នាំទៅមិញ ដែលទាក់ទិនជាពិសេស ទាហានខាងរថពាសដែក ខាងកាំភ្លើងធំ ទាហានវិស្វកម្មនិងទាហានការពារអាកាស។ ក្រុងមូស្គូ និងក្រុងប៉េកាំង ក៏ផ្លាស់ប្ដូរព័ត៌មានគ្នាដែរ ពីបណ្ដាអាវុធផលិតនៅលោកខាងលិច ផ្ដល់ដល់អ៊ុយក្រែនប្រើ ពិសេសប្រព័ន្ធបាញ់រ៉ុក្កែតចម្រុះអាមេរិកHIMARS ឬប្រព័ន្ធការពាអាកាសប៉ាទ្រីយ៉ូតដែលអាមេរិកផ្ដល់ឲ្យ ៕
ចែករំលែកព័តមាននេះ