ខេត្តស្ទឹងត្រែង ៖ កំពុងបោះជំហានទៅរករបត់ថ្មីមួយទៀត តាមរយៈការបង្កើតខ្សែច្រវាក់ផលិតកម្មដាំដើមមន និងចិញ្ចឹមដង្កូវនាង ដើម្បីផលិតជាសូត្រសម្រាប់ផ្គត់ផ្គង់ទៅកាន់ទីផ្សារអន្តរជាតិ។ យោងតាមប្រសាសន៍របស់ លោក ទុំ នីរ៉ូ…
ខេត្តស្ទឹងត្រែង ៖ កំពុងបោះជំហានទៅរករបត់ថ្មីមួយទៀត តាមរយៈការបង្កើតខ្សែច្រវាក់ផលិតកម្មដាំដើមមន និងចិញ្ចឹមដង្កូវនាង ដើម្បីផលិតជាសូត្រសម្រាប់ផ្គត់ផ្គង់ទៅកាន់ទីផ្សារអន្តរជាតិ។
យោងតាមប្រសាសន៍របស់ លោក ទុំ នីរ៉ូ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តស្ទឹងត្រែង នាព្រឹកថ្ងៃទី២១ ឧសភា ឆ្នាំ២០២៦ នេះ បានឱ្យដឹងថា ក្រុមហ៊ុនកសិកម្ម«ហ័ងអញវៀតណាម» ដែលមានទីតាំងស្ថិតនៅក្នុងស្រុកបុរីអូស្វាយសែនជ័យ បាននិងកំពុងអនុវត្តគម្រោងដាំដុះដើមមនយកស្លឹកសម្រាប់ធ្វើជាចំណីដង្កូវនាង ក្នុងគោលបំណងផលិតជាសូត្រធម្មជាតិ ។
លោកប្រធានមន្ទីរបានគូសបញ្ជាក់ថា «បច្ចុប្បន្ន ខ្សែច្រវាក់ផលិតកម្មនេះ ស្ថិតក្នុងដំណាក់កាលផលិតវត្ថុធាតុដើមនៅឡើយ ដោយសារខេត្តស្ទឹងត្រែងមិនទាន់មានរោងចក្រកែច្នៃផ្ទាល់ ។ ផលិតផលសូត្រដែលប្រមូលបានត្រូវដឹកជញ្ជូនទៅកាន់រោងចក្រកែច្នៃរបស់ក្រុមហ៊ុន ស្ថិតនៅក្នុងខេត្តយ៉ាឡាយ ប្រទេសវៀតណាម ដើម្បីផលិតជាសរសៃសូត្រសម្រេច រួចបន្តនាំចេញទៅកាន់ទីផ្សារធំ គឺប្រទេសឥណ្ឌា» ។
លោកប្រធានមន្ទីរបន្ថែមថា ពាក់ព័ន្ធនឹងឱកាសពង្រីកសក្ដានុពលសេដ្ឋកិច្ចក្នុងស្រុក តាម
រយៈដំណើរទស្សនកិច្ចរបស់ថ្នាក់ដឹកនាំខេត្ត លោកអភិបាលខេត្តស្ទឹងត្រែង បានស្នើឱ្យក្រុមហ៊ុនពិចារណាបើករោងចក្រកែច្នៃសរសៃសូត្រនេះផ្ទាល់នៅក្នុងខេត្តស្ទឹងត្រែង ។
ជាការឆ្លើយតប តំណាងក្រុមហ៊ុនបានប្ដេជ្ញាចិត្តថា នឹងបង្កើតរោងចក្រកែច្នៃនាពេលអនាគតនៅពេលណាដែលទិន្នផលដាំដុះ និងការផលិតសូត្រកើនឡើងដល់កម្រិតមួយដែលអាចផ្គត់ផ្គង់ខ្សែសង្វាក់រោងចក្របានថេរ៕
ចែករំលែកព័តមាននេះ