ទីក្រុងតៃប៉ិ៖ ប្រធានាធិបតីតៃវ៉ាន់ លោកឡៃឈីងតិ ថ្លែងថាជោគវាសនា-អនាគតនៃដែនដីមួយនេះត្រូវសម្រេចដោយប្រជាជន២៣លាននាក់របស់ខ្លួន។ ពោលគឺមិនមែនសម្រេចដោយកម្លាំងបរទេសឡើយ។ នៅក្នុងឱកាសសម្ពោធខួបទី២ឆ្នាំនៃការឡើងកាន់អំណាចរបស់លោក លោកឡៃឈីងតិថ្លែងថាគោលដៅរបស់លោកដែលឡើងមកកាន់អំណាចជាប្រធានាធិបតីតៃវ៉ាន់គឺដើម្បីថែរក្សាសន្តិភាព និងស្ថិរភាពនៅច្រកសមុទ្រតៃវ៉ាន់ និងដើម្បីទប់ស្កាត់មិនឱ្យកម្លាំងបរទេសកែប្រែស្ថានភាពបច្ចុប្បន្ន។
លោកឡៃឈីងតិថ្លែងបន្តទៀតថាលោកនៅតែទន្ទឹងរង់ចាំការប្រាស្រ័យទាក់ទងជាមួយប្រទេសចិនជានិច្ច ប៉ុន្តែនៅក្នុងភាពស្មើមុខមាត់គ្នា និងភាពថ្លៃថ្នូរ។ លោកអះអាងថាតៃវ៉ាន់ជាសមាជិកនៃសហគមន៍អន្តរជាតិ មិនមែនជាភាគីដែលធ្វើឱ្យចុះខ្សោយស្ថិរភាពនោះឡើយ។ ថ្ងៃនេះ ការិយាល័យទំនាក់ទំនងជាមួយកោះតៃវ៉ាន់នៅប្រទេសចិនបានចោទប្រកាន់ថាលោកឡៃឈីងតិជាអ្នកញុះញង់ឱ្យមានការប្រឈមមុខគ្នាព្រោះគាត់គាំទ្រឯករាជ្យភាពសម្រាប់កោះតៃវ៉ាន់។
អ្នកនាំពាក្យការិយាល័យនេះ លោកស្រីជូហ្វឹងលាន ថ្លែងថាលោកឡៃឈីងតិធ្វើឱ្យក្រុមដែលចង់ផ្ដាច់ទឹកដីភាន់ច្រឡំការពិត ហើយសប្បាយភ្លេចខ្លួន។ លោកប្រើប្រាស់វោហារសាស្ត្រប្រជាធិបតេយ្យទល់នឹងអំណាចផ្ដាច់ការដើម្បីពិពណ៌នាអំពីទំនាក់ទំនងរវាងប្រទេសចិន និងកោះតៃវ៉ាន់។ លោកស្រីជូក៏បានចោទប្រកាន់ទៀតថាលោកឡៃឈីងតិមិនខ្វាយខ្វល់អំពីសុខុមាលភាពរបស់ប្រជាជនខ្លួនឯងទេ ប៉ុន្តែសុខចិត្តផ្គាប់ផ្គន់កម្លាំងខាងក្រៅដែលចង់ស្វះស្វែងរកឯករាជ្យភាពតៃវ៉ាន់តាមរយៈជំនួយបរទេស និងការប្រកាសឯករាជ្យដោយកម្លាំង។
លោកឡៃឈីងតិឡើងកាន់អំណាចរយៈពេល២ឆ្នាំកន្លងទៅនេះទទួលរងសម្ពាធពីខាងក្រៅផង និងពីក្នុងចំណោមប្រជាជននៅតៃវ៉ាន់ផង។ ក្នុងនោះ លោកក៏ទទួលរងសម្ពាធពីអាមេរិកដែលជាសម្ព័ន្ធមិត្តតាំងពីយូរយារណាស់មកហើយ។ រដ្ឋសភាដែលមានសំឡេងភាគច្រើនមកពីខាងគណបក្សប្រឆាំងបានកាត់បន្ថយគម្រោងចំណាយលើវិស័យការពារជាតិដែលលោកស្នើសុំ៤០ពាន់លានដុល្លារនោះបញ្ចុះមកនៅត្រឹម២៥ពាន់លានដុល្លារ។ នៅសប្ដាហ៍នេះ សភាព្យាយាមបោះឆ្នោតដកតំណែងលោកឡៃឈីងតិថែមទៀត ប៉ុន្តែត្រូវបរាជ័យ៕ ប្រភព៖ Al Jazeera
ចែករំលែកព័តមាននេះ