រាជធានីភ្នំពេញ ៖ នគរបាលការិយាល័យព្រហ្មទណ្ឌរាជធានីភ្នំពេញ កាលពីថ្ងៃទី១៩ ខែឧសភា ឆ្នាំ២០២៦ បានបញ្ជូនសំណុំរឿងប្តីប្រពន្ធជាជនជាតិស៊ុយអែតទៅតុលាការ ពាក់ព័ន្ធនឹងករណីប្រើអំពើហិង្សា និងធ្វើឲ្យខូចខាតដោយចេតនាលើទ្រព្យសម្បត្តិអ្នកដទៃ នៅក្នុងផ្សារម៉ាតមួយកន្លែង…
រាជធានីភ្នំពេញ ៖ នគរបាលការិយាល័យព្រហ្មទណ្ឌរាជធានីភ្នំពេញ កាលពីថ្ងៃទី១៩ ខែឧសភា ឆ្នាំ២០២៦ បានបញ្ជូនសំណុំរឿងប្តីប្រពន្ធជាជនជាតិស៊ុយអែតទៅតុលាការ ពាក់ព័ន្ធនឹងករណីប្រើអំពើហិង្សា និងធ្វើឲ្យខូចខាតដោយចេតនាលើទ្រព្យសម្បត្តិអ្នកដទៃ នៅក្នុងផ្សារម៉ាតមួយកន្លែង ក្នុងខណ្ឌមានជ័យ ។
ប្តីប្រពន្ធជនជាតិស៊ុយអែតនេះ ប្តីឈ្មោះ Christian Oberg អាយុ៤៥ឆ្នាំ ប្រពន្ធឈ្មោះ MALIN TILVING អាយុ៤២ឆ្នាំ ស្នាក់នៅខុនដូជ័រអឺហ្កាឌិន បន្ទប់លេខ១៨២៥ ភូមិឫស្សី សង្កាត់ស្ទឹងមានជ័យទី៣ ខណ្ឌមានជ័យ ។ សមត្ថកិច្ចបានពិនិត្យរកឃើញថា ជនបរទេសទាំង២នាក់ ប្តីប្រពន្ធមានពាក់ព័ន្ធប្រើគ្រឿងញៀនរហូតដល់លើសកម្រិតដែលគេហៅថា «បែកថ្នាំ» ។
សូមជម្រាបថា អនុវត្តតាមបទបញ្ជារបស់លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ កាលពីថ្ងៃទី១៥ ខែឧសភា ឆ្នាំ២០២៦ វេលាម៉ោងប្រមាណ៣និង៣០នាទីរសៀល កម្លាំងការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញ បានធ្វើការស្រាវជ្រាវនិងឃាត់ខ្លួនជនសង្ស័យ២នាក់ខាងលើ នៅចំណុចផ្ទះសំណាក់មួយកន្លែង ស្ថិតនៅតាមផ្លូវលេខ១៧២សង្កាត់ជ័យជំនះ ខណ្ឌដូនពេញ ។
បរទេសទាំង២នាក់នេះ ពាក់ព័ន្ធនឹងករណីធ្វើសកម្មភាពវាយកម្ទេចសម្ភារក្នុងផ្សារម៉ាតមួយកន្លែងស្ថិតនៅផ្លូវលេខ២១៧ ភូមិដំណាក់ធំ៥ សង្កាត់ស្ទឹងមានជ័យទី៣ ខណ្ឌមានជ័យកាលពីវេលាម៉ោង១១ និង៤២នាទីយប់ថ្ងៃទី១៣ ខែឧសភា ឆ្នាំ២០២៦ កន្លងទៅ ។
ការស្រាវជ្រាវឃាត់ខ្លួននេះ ដឹកនាំដោយលោកឧត្តមសេនីយ៍ត្រី ប៊ុន សត្យា ស្នងការរងទទួលផែនការងារនគរបាលព្រហ្មទណ្ឌ លោកឧត្តមសេនីយ៍ទោ លី ប៊ុនអេង ស្នងការរងទទួលការិយាល័យនគរបាលព្រហ្មទណ្ឌកម្រិតស្រាល និងលោកវរសេនីយ៍ឯក ម៉ម សាវន នាយការិយាល័យនគរបាលព្រហ្មទណ្ឌកម្រិតស្រាល សហការជាមួយកម្លាំងនៃអធិការដ្ឋាននគរបាលខណ្ឌមានជ័យ ។
ជនរងគ្រោះពាក់ព័ន្ធនឹងសំណុំរឿងនេះ គឺបុរសឈ្មោះ អ៊ា ណៃហៀង អាយុ៣៩ឆ្នាំ ជាម្ចាស់ផ្សារអិលអិចម៉ាត ស្នាក់នៅផ្ទះលេខ៩២៥D ផ្លូវលេខ២ ភូមិបុរីកម្មករ សង្កាត់ទឹកថ្លា ខណ្ឌសែនសុខ ៕
ចែករំលែកព័តមាននេះ