ប្រទេសចិន ៖ តាមសារព័ត៌មានចិនថា ភ្លៀងធ្លាក់យ៉ាងខ្លាំង និងទឹកជំនន់កើតមានក្នុងតំបន់ជាច្រើនរបស់ចិន នាសប្ដាហ៍នេះ បណ្ដាលឲ្យមនុស្សស្លាប់យ៉ាងតិច១២នាក់ និងបង្ខំឲ្យមនុស្សច្រើនសិបពាន់នាក់ ត្រូវជម្លៀសចេញ។
ទូរទស្សន៍រដ្ឋចិន CCTV រាយការណ៍ នាថ្ងៃទី២០ ឧសភា ពីមនុស្សស្លាប់៥នាក់ និង១១នាក់បាត់ខ្លួន ក្នុងតំបន់ស៊ីមេន ខេត្តហ៊ូណាន់ ភាគកណ្ដាលចិន បន្ទាប់ពីភ្លៀងធ្លាក់ខ្លាំងនៅតំបន់នោះ។ ប្រតិបត្តិការជួយសង្គ្រោះកំពុងធ្វើ។ តាមទីភ្នាក់ងារព័ត៌មានចិនស៊ីនហួថា នាយប់ថ្ងៃទី១៩ ឧសភា មនុស្សជាង១៩.០០០នាក់ ត្រូវបានជម្លៀសចេញ។
តំបន់នោះ ភ្លៀងបានធ្លាក់ខ្លាំងបំផុតដល់កម្រិត៣៣៩មីល្លីម៉ែត្រ រយៈពេល២៤ម៉ោង រហូតដល់ម៉ោង៧ព្រឹកថ្ងៃទី១៨ឧសភា ។ ទីក្រុងមួយក្នុងចំណោមទីក្រុងនៃតំបន់នោះ កម្រិតទឹកភ្លៀងមានដល់២៤០មីល្លីម៉ែត្ររយៈពេលត្រឹមប៉ុន្មានម៉ោងដែលនោះជាឯត្តទកម្មប្រវត្តិសាស្ត្រមួយ។
នៅខេត្តជិតខាងហ៊ឺប៉ីវិថីមួយចំនួនប្រែក្លាយទៅជាស្ទឹង ហើយពួកអ្នកជួយសង្គ្រោះ ត្រូវប្រើកាណូតកៅស៊ូ ជួយប្រជាជនដែលជាប់ក្នុងទឹកជំនន់។ ស៊ីនហួបញ្ជាក់ទៀតថា ផ្ទះជាច្រើនត្រូវទឹកជន់លិច ឬលំបាក់។ មនុស្ស៣នាក់ស្លាប់ និង៤នាក់ទៀតបាត់ខ្លួន កាលពីព្រឹកថ្ងៃទី១៩ ឧសភា។
CCTVក៏រាយការណ៍ផងដែរ នាថ្ងៃទី១៩ ឧសភា ថា ភ្លៀងធ្លាក់ខ្លាំង និងទឹកជំនន់ បណ្ដាលឲ្យមនុស្សស្លាប់៤នាក់និង៥នាក់បាត់ខ្លួននៅខេត្ត GUIZHOU ភាគនិរតីចិន។ ស៊ីនហួបន្តថា នៅតំបន់មួយចំនួនផ្ទះច្រើនខ្នងត្រូវទឹកជន់លិចបណ្ដាផ្លូវថ្នល់រងការខូចខាត ហើយគមនាគមន៍ត្រូវកាត់ផ្ដាច់។
មនុស្សជាង៣៧០០នាក់ ត្រូវបានជម្លៀសទៅដាក់នៅកន្លែងផ្សេង។ ម្យ៉ាងវិញទៀត មនុស្ស១០នាក់ស្លាប់កាលពីថ្ងៃទី១៦ ឧសភា នៅតំបន់ក្វាងស៊ី នាភាគខាងត្បូងប្រទេស ពេលដែលរថយន្តកាំមីញ៉ុងធុនតូចមួយគ្រឿងក្រឡាប់ធ្លាក់ពីលើស្ពានមួយ ៕
ចែករំលែកព័តមាននេះ