ទីក្រុងប៉េកាំង ៖ ប្រធានាធិបតីរុស្ស៊ី លោក វ្ល៉ាដឺមៀ ពូទីន (Vladimir Putin) បានទៅដល់ទីក្រុងប៉េកាំង ប្រទេសចិន កាលពីយប់ថ្ងៃទី១៩ ខែឧសភា ឆ្នាំ២០២៦ ដើម្បីជួបពិភាក្សាការងារជាមួយប្រធានាធិបតីចិន លោក ស៊ី ជីនពីង (Xi Jinping) នៅព្រឹកថ្ងៃទី២០ ខែឧសភា សម្រាប់ដំណើរទស្សនកិច្ចផ្លូវរដ្ឋរយៈពេល២ថ្ងៃ។ នេះបើតាមប្រភពពី Reuters, Euronews, BBC, The Guardian និង Aljazeera បានចេញផ្សាយ។
ជំនួបកំពូលនេះ កើតឡើងក្រោយរយៈពេលត្រឹមតែប៉ុន្មានថ្ងៃប៉ុណ្ណោះ បន្ទាប់ពីមេដឹកនាំកំពូលរបស់ចិន ទើបតែបានទទួលស្វាគមន៍ដំណើរទស្សនកិច្ចផ្លូវរដ្ឋរយៈពេល៣ថ្ងៃរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) កាលពីថ្ងៃទី១៣-១៥ ខែឧសភា កន្លងទៅ។ ដំណើរទស្សនកិច្ចកំពូលផ្ទួនៗគ្នានេះ ត្រូវបានបណ្តាអ្នកវិភាគមើលឃើញថា គឺជាយុទ្ធសាស្ត្រការទូតក្រេបតែរបស់ទីក្រុងប៉េកាំង ដើម្បីបង្ហាញឥទ្ធិពល និងតួនាទីស្នូលរបស់ខ្លួនលើឆាកអន្តរជាតិ។
ចំណុចសំខាន់ៗនៃកិច្ចប្រជុំកំពូលរបស់លោក ពូទីន ជាមួយលោក ស៊ី ត្រូវបានគេជឿថាមានគោលបំណងពិភាក្សាអំពីរឿងរ៉ាវជាច្រើន រាប់ចាប់ពីទំនាក់ទំនងទ្វេភាគី រហូតដល់ភាពរីកចម្រើនពាណិជ្ជកម្ម និងកិច្ចសហប្រតិបត្តិការរវាងសម្ព័ន្ធមិត្តកំពូលទាំងពីរ ក៏ដូចជាពិភាក្សាអំពីរបៀបវារៈសកល រួមទាំងសង្គ្រាមនៅអ៊ុយក្រែន និងអ៊ីរ៉ង់ផងដែរ។
ប្រទេសចិន គឺជាដៃគូពាណិជ្ជកម្មដ៏សំខាន់មួយសម្រាប់ប្រទេសរុស្ស៊ី ជាពិសេសបន្ទាប់ពីការឈ្លានពានទ្រង់ទ្រាយធំរបស់ប្រទេសនេះលើប្រទេសអ៊ុយក្រែនក្នុងឆ្នាំ ២០២២ បានធ្វើឱ្យរុស្ស៊ីក្លាយជាប្រទេសឯកោឃ្លាតឆ្ងាយពីឆាកអន្តរជាតិ និងបានកាត់ផ្តាច់ទំនាក់ទំនងយ៉ាងច្រើនជាមួយបណ្តាប្រទេសលោកខាងលិច។ ប៉ុន្តែចិនបានរក្សាជំហរអព្យាក្រឹតខ្លួនជាយូរមកហើយក្នុងជម្លោះនេះ បើទោះបីបានបង្កើនទំនាក់ទំនងពាណិជ្ជកម្មជាមួយរុស្ស៊ីក្នុងចំណោមទណ្ឌកម្មសេដ្ឋកិច្ច និងហិរញ្ញវត្ថុដោយសហរដ្ឋអាមេរិក និងអឺរ៉ុបយ៉ាងណាក៏ដោយ។
ប្រទេសចិនបានក្លាយជាដៃគូពាណិជ្ជកម្មកំពូលរបស់រុស្ស៊ី បន្ទាប់ពីការចាប់ផ្តើមសង្គ្រាមនៅអ៊ុយក្រែន ហើយជាអតិថិជនកំពូលទិញប្រេង និងឧស្ម័នរបស់រុស្ស៊ី។ ស្របពេលរុស្ស៊ីរំពឹងថា សង្គ្រាមនៅអ៊ីរ៉ង់នឹងបង្កើនតម្រូវការខ្ពស់សម្រាប់ប្រទេសចិន។
លោក យូរី យូសាកូវ (Yuri Ushakov) ជំនួយការប្រធានាធិបតីរុស្ស៊ីបានឱ្យដឹងថា ការនាំចេញប្រេងរបស់រុស្ស៊ីទៅកាន់ប្រទេសចិនបានកើនឡើង ៣៥% នៅក្នុងត្រីមាសទី១ នៃឆ្នាំ ២០២៦ ហើយថា រុស្ស៊ីគឺជាប្រទេសនាំចេញឧស្ម័នធម្មជាតិធំជាងគេមួយទៅកាន់ចិន ដោយបានពណ៌នាប្រទេសចិនថា «អ្នកប្រើប្រាស់ដែលមានទំនួលខុសត្រូវ»៕
ចែករំលែកព័តមាននេះ